Oq oltin ovulidagi “Yakubova Gavhar” fermer xoʻjaligi ishchilari shartnomaviy rejadagi 296 tonna oʻrniga 300 tonna hosil yigʻib olishdi

Dehqonchilikda oson kelgan yilning oʻzi yoʻq. Goh bahor seryogʻin kelib, ekin-tikin ishlari kechiksa, ayni gʻoʻza parvarishi avj olgan yoz pallasida suv tanqisligi kuzatiladi. Kuzda esa dehqonlar sovuq kunlarning barvaqt boshlanishidan oldin yigʻim-terim ishlarini yakunlashga intiladilar.

Amudaryolik “Yakubova Gavhar” fermer xoʻjaligi rahbari Davron Xolmenov shu boisdan ham fermer xoʻjaligini tashkil etgan ilk kunlardanoq, avvalo ishni xoʻjalik yerlarining tabiiy xususiyatlarini oʻrganishdan boshladi. Sizot suvlarining  tuproqning unumdor qatlamiga qanchalik yaqinligi, yerlarning shoʻrlanish darajasini puxta  oʻrganib, ekin-tikin ishlarini aniq reja asosida tashkil etdi. Chunki shoʻrlanish darajasi yuqori boʻlgan dalalarga shoshilinchda chigit ekilsa, namlik meʼyordan baland boʻlganligi uchun unib chiqishi qiyinlashib, aksariyat hollarda urugʻ chirib ketishi mumkin. Shu bois, bunday yerlarning shoʻrini yuvishga alohida eʼtibor qaratdi, xoʻjalik hududidagi ichki kollektorlarning zax suvlarni oʻtkazuvchanlik holatini yaxshiladi. Natijada xoʻjalik yerlari meliorativ talablar darajasiga yetkazildi. Mana, 18-yildirki, “Yakubova Gavhar” fermer xoʻjaligi tumanda ilgʻor xoʻjaliklar qatorida tilga olinadi.

Joriy dehqonchilik yili ham fermer xoʻjaligi ishchilari uchun sinovlar bilan boshlandi. Oqar suv tanqisligi, bahorgi tabiat  injiqliklarini mardonavor yenggan dehqonlar 90 gektar yerda paxtadan moʻl hosil undirdilar.

Asosan “Sulton” navli urugʻlik paxta yetishtirishga ixtisoslashtirilgan fermer xoʻjaligida dalalar 180 nafardan ziyod ishchilarga ijara pudrati asosida taqsimlab berilgan. Barcha  agrotexnika tadbirlari oʻz vaqtida, sifatli olib berilgani bois, gʻoʻza parvarishi jarayonida muammo boʻlmadi. Gʻoʻza parvarishi bilan bir vaqtning oʻzida 2021-2022-yil hosili uchun ekilgan 60 gektar yerdagi gʻalladan ham yuksak xirmon koʻtarildi. Shartnomaviy rejadagi 150 tonna oʻrniga 300 tonna “qirmizi don” yigʻishtirib olindi. Hosildorlik har gektar hisobiga 50 tsentnerga yetkazilib, reja 200 foizga uddalandi. Bundan  ham quvonchlisi, shartnomaviy  rejadan tashqari yetishtirilgan 150 tonna bugʻdoy xoʻjalik ixtiyorida qoldi va maʼlum qismi fermer xoʻjaligi ishchilari uchun tarqatildi.

Paxtachilikda ham bu yilgi mavsumni zalvorli qadamlar bilan boshlagan xoʻjalik dehqonlari birinchi terimdayoq shartnomaviy rejani ortigʻi bilan uddaladilar. 90 gektar paxta maydonining har gektaridan 34 tsentnerdan, shartnomaviy rejadagi 296 tonna oʻrniga 300 tonna hosil yigʻib olishdi.

Erishilgan yuksak natijada mavsum boshidan beri har biri 5-6 tonna paxta terishib, boshqalarga namuna boʻlgan fermer xoʻjaligi ishchilaridan Zumrad Qutlimurodova, Muhayyo Nurmanova, Gulbahor Matsafoyevalarning hissasi katta boʻldi. Ayni paytda chevar terimchilar orasida mavsum boshidan beri 9-10 mln. soʻm atrofida ish haqi olganlar koʻpchilikni tashkil qiladi.

Xoʻjalik dalalarida paxta terayotgan terimchilar va koʻngilli hasharchilarga dala boshida choshgohlik va tushlik uchun yaxshi sharoitlar  yaratilgan. Kunlik ish haqlari ayni paytda har bir kilogramm paxta uchun 2 000 soʻmdan, tarozi boshida hisob-kitob qilinayotganidan terimchilar mamnun. Shunga yarasha ish unumi ham yuqori.

Joriy yilgi paxta yigʻim-terim mavsumini yanada muvaffaqiyatli yakunlash maqsadida fidoyilik bilan mehnat qilayotgan fermer xoʻjaligi rahbari Davron Xolmenovning hisob-kitoblariga koʻra, faqat paxtachilikning oʻzidan 3 mlrd. soʻm daromad olinishi kutilmoqda.

Ayni paytda esa xoʻjalik dalalarida paxta yigʻim-terimi davom ettirilib, qabul punktlariga kuniga 2-3 tonna atrofida paxta topshirilmoqda.

Xoʻjalikning 2022-2023-yil hosili uchun ekilgan 64 gektar yerdagi bugʻdoyzorlarida esa bir tekis unib chiqib, bachkilashni boshlagan yam-yashil bugʻdoy maysalariga kuzgi ishlov berish, oziqlantirish ishlari samarali amalga oshirilmoqda.

Robiya YOʻLDOShEVA.