“AMUDARYo” JAMOASI OʻZBEKISTON ChEMPIONATI SOVRINDORI BOʻLDI

Shu yilning 27-31-oktyabr kunlarida Oʻzbekiston futbol assotsiatsiyasi 14 yoshgacha boʻlgan qizlar orasida futbol boʻyicha Oʻzbekiston chempionatining final oʻyinlarini oʻtkazdi. Ushbu bahslarning ilk bosqichida mamlakatimizning turli hududlaridan iqtidorli qizlardan tarkib topgan jami 32 ta jamoalar qatnashgan boʻlsa, Buxoro viloyatida boʻlib oʻtgan final bosqichida 8 ta jamoa qizlari oʻzaro kuch sinashdilar.

Quvonarlisi amudaryolik yosh futbolsevar qizlarning “Amudaryo” jamoasi ushbu musobaqalarda yuksak mahorat va chaqqonlik koʻrsatib, faxrli ikkinchi oʻrinni egalladilar. Ular yakuniy  bahsda “Sevinch” jamoasi bilan maydonga tushib, gʻoliblik uchun shiddatli jang olib borishdi. Biroq chempionatning oʻtgan yillardagi sovrindori boʻlgan “Sevinch” futbol klubida muntazam mashgʻulotlar olib borayotgan qizlar osonlikcha magʻlub boʻlmadi.

Oʻtkazilgan bahslarda “Amudaryo” jamoasi aʼzosi Laylo Baxtiyorova, Sevinchoy Tangirovalar “Eng yaxshi oʻyinchi” deb topildilar. Jamoa bosh murabbiyi Rufat Bobojonov shogirdlari erishgan muvaffaqiyat haqida quvonib soʻzlarkan, keyingi yil albatta gʻoliblikni qoʻlga kiritishga harakat qilishini aytdi.

Biz sovrindor jamoani erishgan yutugʻi bilan qutlab qolamiz.

Oygul RAJABOVA