MAʼNAVIY-MAʼRIFIY HAMDA TARBIYaVIY IShLAR SAMARADORLIGINI OShIRISh KONTsEPTsIYaSI MAZMUN-MOHIYaTI TUShUNTIRILDI

Amudaryo tumani xalq taʼlimi boʻlimiga qarashli umumiy oʻrta taʼlim maktablarida Vazirlar Mahkamasining joriy yil 3-oktyabr kungi “Umumiy oʻrta taʼlim muassasalarida maʼnaviy-maʼrifiy hamda tarbiyaviy ishlar samaradorligini oshirish kontseptsiyasini tasdiqlash toʻgʻrisida”gi tegishli qarori mazmun-mohiyatini keng targʻib qilishga bagʻishlangan seminar oʻtkazildi.

Shu yil 2-noyabr kuni boʻlib oʻtgan seminarda barcha umumtaʼlim maktablarining maʼnaviy-maʼrifiy ishlari boʻyicha direktor oʻrinbosarilari, sinf rahbarlari va pedagoglar jamoasi qatnashishdi. Seminar davomida Prezidentimizning “Xalq taʼlimini rivojlantirishga oid qoʻshimcha chora-tadbirlar toʻgʻrisida”gi va Vazirlar Mahkamasining “Umumiy oʻrta taʼlim muassasalarida maʼnaviy-maʼrifiy hamda tarbiyaviy ishlar samaradorligini oshirish kontseptsiyasini tasdiqlash toʻgʻrisida”gi tegishli qarorlariga muvofiq ishlab chiqilgan kontseptsiya haqida maʼlumot berildi.

Seminarda taʼkidlanganidek, maktab taʼlimini umummilliy harakatga aylantirish borasida amalga oshirilayotgan ishlarni mazmunan yangi bosqichga koʻtarish, maktab oʻquvchilari kitob mutolaasi va kitobxonlik madaniyatini oshirish, maʼnaviy kuch va milliy isteʼdodlarni saqlash hamda harbiy vatanparvarlik hamda buyuk ajdodlar jasoratini targʻib etish, oʻrganish, uzluksiz taʼlim tizimida maʼnaviy tarbiya asoslarini kuchaytirish kabilar mazkur kontseptsiyaga koʻra amalga oshirilishi lozim boʻlgan vazifalar hisoblanadi. Shuningdek, ushbu kontseptsiyada oʻquvchilarni zamonaviy bilim va tajriba, milliy va umuminsoniy qadriyatlar asosida tarbiyalash jarayonida maktab, mahalla va oila hamkorligini mustahkamlash ham koʻrsatib oʻtilgan.

Undan tashqari, kontseptsiyada maktab taʼlimini umummilliy harakatga aylantirish, oʻquvchilarda kitob mutolaasi va kitobxonlik madaniyatini oshirish, buyuk ajdodlar jasorati hamda harbiy vatanparvarlik, zamonamiz qahramonlari – yoshlarga ibrat timsoli, maktab, mahalla va oila hamkorligini mustahkamlash kabilar asosiy yoʻnalishlar sifatida belgilangan.

Seminar davomida maktab taʼlimini umummilliy harakatga aylantirish yoʻnalishi boʻyicha kontseptsiyaga muvofiq oʻtkaziladigan tadbirlar toʻgʻrisida ham maʼlumotlar berib oʻtildi. Oʻquvchilar oʻrtasida “Oʻzbekiston – Vatanim manim” mavzusida ijodiy ishlar tanlovi, “Davlat ramzlari – faxrim, gʻururim” mavzusida tadbirlar, “Davlat tili – millat ruhi” gʻoyasi asosida turkum maʼnaviy-maʼrifiy, adabiy-badiiy tadbirlar tashkil etilishi kerakligi, bunday tadbirlar oʻquvchi-yoshlar qalbidagi vatanparvarlik tuygʻularini mustahkamlashga xizmat qilishi taʼkidlab oʻtildi.

Kitob mutolaasi va kitobxonlik madaniyatini oshirish maqsadida esa Xalq taʼlimi vazirining “Kitobxon oʻquvchi” tanlovi, “Kitobxonlik haftaligi”ni tashkil etib, bolalar va oʻsmirlar adabiyoti masalalariga bagʻishlangan adabiy uchrashuvlar va kitob festivallari, “Notiq oʻquvchi” hamda insholar tanlovlari oʻtkazilishi kerakligi eʼtirof etildi. Shuningdek, boshlangʻich sinf oʻquvchilari “Jajji akademik” toʻgaraklariga jalb etish, ularga mutolaa sirlari va kitobxonlik madaniyati boʻyicha tushunchalar berib borish, “Farzandimga kitob sovgʻa qilaman” va “Maktab kutubxonasiga kitob sovgʻasi” ijtimoiy aktsiyalarini tashkil etish boʻyicha ham tavsiyalar berildi.

Seminar ishtirokchilariga buyuk ajdodlar jasorati hamda harbiy vatanparvarlik hamda maktab, mahalla va oila hamkorligini mustahkamlash boʻyicha amalga oshiriladigan ishlar toʻgʻrisida ham maʼlumotlar berib oʻtildi.  Ushbu yoʻnalishlar boʻyicha amalga oshiriladigan tadbirlar oʻquvchilarda  Vatanga sadoqat tuygʻularini, harbiy xizmat muqaddas burchi ekanligi haqidagi tushunchani mustahkamlash, ular ongida adolatparvarlik va bunyodkorlik tuygʻularini tarbiyalashga xizmat qiladi. “Muvaffaqiyatga erishish sirlari” loyihasi doirasida oʻz sohasida yuqori natijalarga erishgan yurtdoshlarimiz bilan doimiy muloqotlar tashkil etish, ilmiy va ijodiy maktab yaratgan atoqli olim va ijodkorlarning uy-muzeylari hamda ishxonalarida sayohat-darslar oʻtkazish, “Yangi Oʻzbekistonning maʼnaviyat maskanlari” rukni ostida turkum tadbirlar va sayohatlar uyushtirish esa oʻquvchi-yoshlarning maʼnaviy dunyoqarashlari kengayishini taʼminlaydi.

Qiziqarli oʻtgan seminar yakunida maktablarining maʼnaviy-maʼrifiy ishlari boʻyicha direktor oʻrinbosarilari, sinf rahbarlari va pedagoglar tomonidan berilgan savollarga batafsil javoblar berildi.

O.Xudoyberganova.