Xalq deputatlari Amudaryo tuman Kengashining navbatdan tashqari 54-sessiyasi toʻgʻrisida AXBOROT

2022-yil 9-noyabr kuni Amudaryo tumani hokimligining majlislar zalida Xalq deputatlari tuman Kengashining navbatdan tashqari 54-sessiyasi boʻlib oʻtdi.

Sessiyani tuman hokimi – xalq deputatlari Amudaryo tuman Kengashi raisi Sultonboy Yoʻldoshev ochdi va olib bordi.

Ijtimoiy tarmoqlar orqali toʻgʻridan-toʻgʻri efirga uzatilgan sessiyada deputatlar, sektorlar rahbarlari, hokim oʻrinbosarlari, hokimlik masʼul xodimlari, boʻlimlar, tashkilotlar rahbarlari hamda ommaviy axborot vositalari vakillari ishtirok etdi.

Sessiya kotibligiga 10-Tosh yop saylov okrugidan deputat Ilhom Palvanov saylandi hamda sessiya kun tartibi va reglamenti tasdiqlandi.

Sessiyada dastlab Oʻzbekiston Respublikasi Prezidentining 2022-yil 25-oktyabrdagi “Mahallalar infratuzilmasini yanada yaxshilash qoʻshimcha chora tadbirlari toʻgʻrisida”gi qaroriga asosan 2022-2023-yillarda Qoraqalpogʻiston Respublikasi mahallalar infratuzilmasini rivojlantirish dasturi boʻyicha tuman hokimining qurilish, kommunikatsiyalar, kommunal xoʻjalik, ekologiya va koʻkalamzorlashtirish masalalari boʻyicha oʻrinbosari Nodirbek Kamolovning hisoboti tinglandi.

Hisobotda qayd qilinganidek, Oʻzbekiston Respublikasi Prezidentining yuqoridagi qaroriga asosan 2022-2023-yillarda Qoraqalpogʻiston Respublikasi mahallalar infratuzilmasini rivojlantirish dasturi ishlab chiqilmoqda. Mazkur dastur doirasida tuman hududidagi 25 ta mahallada umumiy qiymati 22 mlrd 209 mln. soʻm mablagʻ evaziga qurilish-taʼmirlash ishlari amalga oshirilishi koʻzda tutilgan.

Dastur doirasida jami 19 ta mahallada umumiy qiymati 11 mlrd 753 mln. soʻm mablagʻ evaziga 50,3 km ichki yoʻllarni taʼmirlash rejalashtirilmoqda.

Bundan tashqari, Namuna mahallasi hududida ichimlik suvi taʼminotini yaxshilash maqsadida 3 mlrd 242 mln. soʻmga suvni chuchuklashtiruvchi stantsiya va 7,1 km suv tarmoqlarini yangidan qurish hamda mavjud 1,4 km suv tarmogʻini mukammal taʼmirlash, Qipchoq shaharchasi hududida elektr energiyasi taʼminotini yaxshilash maqsadida 100 mln. soʻmga 248-sonli transformatordan chiquvchi tarmoqqa yangidan 2 km kabellar tortish, Doʻstlik mahallasi hududida 350 mln. soʻmga yangidan bolalar maydonchasi qurish, Xizr eli va Yuqori qishloq mahalla fuqarolar yigʻinlarining har biriga 450 mln. soʻmga yangidan zamonaviy mahalla binolari qurish koʻzda tutilmoqda.

Shuningdek, Qum yop mahallasi hududida ichimlik suvi taʼminotini yaxshilash maqsadida 5 mlrd 100 mln. soʻmga suvni chuchuklashtiruvchi stantsiya qurish va 10,1 km suv tarmoqlarini tortish ham rejaga kiritilgan.

Deputatlar tuman hokimi oʻrinbosariga ushbu manzilli dasturga oid turli savollar bilan murojaat qilib, tegishli javoblar oldi.

Muhokamalardan keyin kun tartibidagi mazkur masala boʻyicha xalq deputatlari tuman Kengashining tegishli qarori qabul qilindi.

Kun tartibidagi navbatdagi masala yuzasidan tuman hokimining birinchi oʻrinbosari Rashid Salayevning hisoboti tinglandi.

Oʻzbekiston Respublikasi Prezidentining 2021-yil 5-martdagi “Xotin-qizlarni qoʻllab-quvvatlash, ularning jamiyat hayotidagi faol ishtirokini taʼminlash tizimini yanada takomillashtirish chora-tadbirlari toʻgʻrisida”gi hamda 2021-yil 13-apreldagi “Byudjet jarayonida fuqarolarning faol ishtirokini taʼminlash boʻyicha qoʻshimcha chora-tadbirlar toʻgʻrisida”gi, shuningdek Oʻzbekiston Respublikasi Vazirlar mahkamasining 2021-yil 11-martdagi “Yoshlarni ijtimoiy qoʻllab-quvvatlash boʻyicha qoʻshimcha chora-tadbirlar toʻgʻrisida”gi qarorlarga asosan har chorak yakuni boʻyicha mahalliy byudjetning ortirib bajarilgan qismining 15 foizi “Ayollar daftari”ga kiritilgan xotin-qizlarni qoʻllab-quvvatlash jamgʻarmasiga, 30 foizi jamoatchilik fikri asosida shaklantirilgan “Tashabbusli byudjet” jamgʻarmasiga hamda 15 foizi “Yoshlar daftari”ga kiritilgan yoshlarni qoʻllab-quvatlash jamgʻarmasiga oʻtkazish belgilangan.

Yuqoridagilarni inobatga olib, deputatlar Qoraqalpogʻiston Respublikasi Joʻqorgʻi Kengisining tegishli qaroriga asosan tuman mahalliy byudjetning 3-chorakda orttirib bajarilgan qismidan “Ayollar daftari”, “Tashabbusli byudjet” hamda “Yoshlar daftari” jamgʻarmalariga mablagʻlar ajratilishi uchun ovoz berdilar.

Kun tartibidagi barcha masalalar atroflicha muhokama qilinib, xalq deputatlari tuman Kengashining tegishli qarorlari qabul qilindi.

Shuning bilan sessiya oʻz ishini yakunladi.

Tuman hokimligining Axborot xizmati