Qoraqalpogʻiston Respublikasi Joʻqorgʻi Kengesi Raisi Amanbay Orinbayev Amudaryo tumanida boʻldi

Qoraqalpogʻiston Respublikasi Joʻqorgʻi Kengesi Raisi Amanbay Orinbayev Amudaryo tumanini ijtimoiy-iqtisodiy jihatdan rivojlantirish hamda aholi turmush sharoitini yanada yaxshilash yoʻnalishlarida amalga oshirilayotgan ishlar bilan tanishish maqsadida 15-noyabr kuni tumanda boʻldi.

Dastlab Joʻqorgʻi Kenges Raisi tumandagi bunyodkorlik ishlarini koʻzdan kechirib, qurilish surʼati belgilangan rejadan orqada qolayotga obʼektlar – 27-sonli maktab va 30-sonli maktabgacha taʼlim tashkiloti faoliyati bilan yaqindan tanishdi hamda mutasaddilarga tegishli topshiriqlar berdi.

Shundan keyin tuman hokimligi binosida Qoraqalpogʻiston Respublikasi Joʻqorgʻi Kengesi Raisi Amanbay Orinbayev Amudaryo tumani faollari, muassasa, korxona va tashkilotlar rahbarlari, shuningdek Qoraqalpogʻiston Respublikasi miqyosidagi vazirliklar, boshqarmalar va tashkilotlar rahbarlari ishtirokida yigʻilish oʻtkazdi.

Yigʻilishda tuman aholisi kundalik hayotida uchrayotgan muammolarga yechim topish, aholining farovon turmush kechirishini taʼminlash yoʻlida amalga oshirilayotgan chora-tadbirlar va bu yoʻnalishda baʼzi sohalarda yoʻl qoʻyilayotgan kamchiliklar haqida soʻz yuritildi.

Tanqidiy ruhda oʻtkazilgan yigʻilishda koʻpchilik byudjet tashkilotlarida davlat byudjetidan ajratilgan mablagʻlarni tasarruf etish jarayonida moliyaviy xato-kamchiliklar uchrayotgani, mablagʻlarni maqsadsiz ishlatilish holatlari roʻy berayotganligi alohida taʼkidlandi. Oʻrganishlar davomida Amudaryo tumanida ham shu kabi noxush holatlar aniqlangan. Bu kabi qonun buzilish holatlarini bartaraf etish va kelgusida takrorlanishining oldini olish boʻyicha mutasaddilarga hamda iqtisodiy soha masʼullariga tegishli topshiriqlar berildi.

Shuningdek, fuqarolar murojaatlari bilan ishlashda ham qator kamchiliklar mavjudligi, asosan hudud aholisini ijtimoiy qoʻllab-quvvatlash, kommunal xizmatlar sifati, turar joy bilan taʼminlash, ichki yoʻllarni taʼmirlash masalalarida koʻplab murojaatlar kelib tushayotgani taʼkidlandi.

Bundan tashqari, taʼlim, yoshlar bilan ishlashish, transport xizmatini koʻrsatish, davlat dasturlari ijrosini taʼminlash, mahsulotlarini eksport qilish kabi sohalarda qoʻshimcha imkoniyatlar mavjudligi taʼkidlanib, ularni ishga solgan holda tumanning ijtimoiy-iqtisodiy rivojlanish suratini yanada yaxshilash lozimligi aytib oʻtildi.

Aytish joizki, mamlakatimizda ijtimoiy himoyaga muhtoj kishilarni, ayniqsa ayol-qizlarni moddiy va maʼnaviy qoʻllab-quvvatlash borasida tizimli ishlar amalga oshirilmoqda. Jumladan, boquvchisini yoʻqotgan va ijtimoiy himoyaga muhtoj oilalarni uy-joy bilan taʼminlash borasida ham qator amaliy ishlar qilinmoqda.

Shu kuni Amudaryo tumani Boyovul mahallasida yashovchi ijtimoiy himoyaga muhtoj, boquvchisini yoʻqotgan Malika Ahmedovaga Qoraqalpogʻiston Respublikasi Joʻqorgʻi Kengesi Raisi Amanbay Orinbayev tomonidan Prezidentimizning sovgʻasi – 2 xonali uy sovgʻa qilinishi ham bu borada amalga oshirilayotgan ishlarning amaliy isboti boʻldi.

Bundan tashqari, oilaning doimiy daromad manbaini yaratish maqsadida ikki nafar farzandning onasi Malika Ahmedova tumanidagi 43-sonli maktabgacha taʼlim tashkilotiga ishga joylashtirildi.

Yigʻilish yakunida Qoraqalpogʻiston Respublikasi Joʻqorgʻi Kengesi Raisi tomonidan joriy yil yakunigacha tumani ijtimoiy-iqtisodiy rivojlantirish va aholi turmush farovonligini yanada yaxshilash maqsadlari uchun jami 20 milliard 855,3 million soʻm mablagʻ ajratilishi taʼkidlandi.

Qoraqalpogʻiston Respublikasi Joʻqorgʻi Kengesining Axborot xizmati.

Tuman hokimligining Axborot xizmati.