18-sonli maktabda “English party” deb nomlangan tadbir oʻtkazildi

Keyingi yillarda jamiyatning turli sohalaridagi taraqqiyot natijasida chet tillarini biladigan mutaxassislarga boʻlgan talab ortib, chet tililarning oʻrni tobora mustahkamlanib bormoqda. Jahonga yuz tutgan ilgʻor davlatlar mehnat bozorining asosiy talabi − chet tilida bemalol muloqot qila oladigan, kompyuter texnologiyalaridan xabardor, innovatsion gʻoyalarga boy va oʻz uslubiga ega boʻlgan kadrlardir. Shu sababli ham bugungi kunda mamlakatimizda chet tillarini oʻrganish va oʻrgatishga boʻlgan eʼtibor har qachongidan ham kuchliroqdir.

Qolaversa, xalqimizda qadimdan “Til bilgan – el bilar” degan naql bor. Oʻz ona tilidan tashqari boshqa xalqlar tilini oʻrgangan insonning dunyoqarashi, fikrlash doirasi keng boʻlibgina qolmay, oʻsha xalqning urf-odati, madaniyati bilan tanishish imkoniyatiga ham ega boʻladi.

Oʻzbekiston Respublikasi Prezidentining “Oʻzbekiston Respublikasida xorijiy tillarni oʻrganishni ommalashtirish faoliyatini sifat jihatidan yangi bosqichga olib chiqish chora-tadbirlari toʻgʻrisida” qarori ham aynan shu maqsadlarga qaratilgan boʻlib, mazkur hujjat xorijiy tillarni oʻrganish va oʻrgatish darajasining yanada oshishida muhim vosita boʻlib xizmat qilmoqda.

Umumtaʼlim maktablarida noyabr oyi xorijiy tillar oyligi deb eʼlon qilingani esa oʻquvchilarning chet tillarini oʻrganish koʻnikmalarini yanada oshirishda muhim vosita boʻlib xizmat qilmoqda.

26-noyabr kuni Amudaryo tumani Xalq taʼlimi boʻlimiga qarashli 18-sonli umumtaʼlim maktabida xorijiy tillar fan oyligi doirasida “English party” deb nomlangan tadbir oʻtkazildi.

Tadbirda maktabning ilmiy va maʼnaviy-maʼrifiy ishlar boʻyicha direktor oʻrinbosarlari, fan oʻqituvchilari, oʻquvchilar ishtirok etishdi.

Tadbirni maktabning maʼnaviy va maʼrifiy ishlar boʻyicha direktor oʻrinbosari Nurulla Xoʻjametov ochib berdi hamda oʻquvchilarga xorijiy tillarni oʻrganishning afzalliklari, til bilgan inson qanday muvaffaqiyatlarga erishishi mumkinligiga hayotiy misollar orqali toʻxtalib oʻtdi.

Tadbirda maktab oʻquvchilari oʻzlarining tayyorlagan goʻzal raqslari, sahna koʻrinishlarini ishtirokchilar eʼtiboriga havola qilishdi.

Maktabning 7-sinf oʻquvchilari tomonidan “Sholgʻom” ertagi ingliz tilida namoyish etilgani barcha oʻquvchilarda katta taassurot qoldirdi. 10-sinf oʻquvchilari esa ingliz tilida oʻquvchilarning talaffuzida roʻy berib turadigan muammolarni hajviy tarzda namoyish qilib, barchaning kayfiyatini koʻtarishdi.

Tadbir yakunida maktabning 1-toifali ingliz tili fani oʻqituvchilari Dilafroʻz Toʻrayeva va Sanʼat Jumamuradovlar oʻquvchilarga oʻzlarinig eng ezgu tilaklarini bildirib, tadbirga yakun yasadilar.

Maktablarda chet tilini oʻrganishdan asosiy maqsad – maktab oʻquvchilari oʻrtasida tilga boʻlgan qiziqishni orttirish va chet tilida muloqotni maktab davrida shakllantirishdan iborat.

Umumtaʼlim maktablarda chet tili fani oyligi doirasida oʻtkazilayotgan bu kabi tadbirlar esa oʻquvchilarning bilim doirasi yanada oshishiga, nutqining rivojlanishiga, ularning oʻz isteʼdod va qobiliyatlarini yuzaga chiqarishlarida muhim vosita boʻlib xizmat qilmoqda.

Quvonarlisi, oylik doirasida boʻlib oʻtayotgan har bir tadbirda oʻquvchilar faol ishtirok etishmoqda. Mazkur tadbir ham oʻquvchilarning xorijiy tillarni oʻrganishga qiziqishlarini yanada oshirgani bilan ahamiyatli boʻldi.

Fotima Eshimbetova.