1-SONLI MAKTABDA XORIJIY TILLAR FAN OYLIGI YaKUNIGA BAGʻIShLANGAN TADBIR OʻTKAZILDI

Noyabr oyining oxirgi haftasida umumtaʼlim maktablarida oʻtkazilgan xorijiy tillar fan oyligi doirasidagi tadbirlar umumlashtirilib, ushbu tadbirlarning oʻquvchi-yoshlar bilim va iqtidorlarini rivojlantirishdagi ahamiyati xorijiy tillar uslubbirlashmasi aʼzolari tomonidan alohida eʼtirof etildi.

Bu borada Amudaryo tumani xalq taʼlimi boʻlimiga qarashli 1-sonli umumtaʼlim maktabining xorijiy tillar uslubbirlashmasi aʼzolari ham sezilarli yutuqlarga erishdilar. Xususan, fan oyligi davomida maktabning faol oʻqituvchilari Muhabbat Xudoyberganova, Zevar Atajanova, Fariza Rajabova, Muhammadjon Madaminovlar oʻzaro hamkorlik asosida ish yuritishib, noyabr oyining har bir haftasida mavzulashtirilgan ochiq darslar, sinflararo va har bir sinfda guruhlararo qiziqarli savol-javob kechalari, zakovat oʻyinlari, topishmoqlar, tez aytishlar, sheʼriy bahslashuvlar tashkil etishib, oʻquvchilarning xorijiy tillarni oʻrganishga boʻlgan ishtiyoq va iqtidorlarini ragʻbatlantirib bordilar.

Bu tadbirlarda oʻquvchilar bir-birlari bilan ingliz tilida muloqotlar olib bordilar, inglizcha sheʼrlar aytib, ashula va raqslar ijro etdilar. Ingliz adabiyoti namoyondalarining asarlari qahramonlari haqida hikoya qilishib, jonajon Oʻzbekistonimiz haqidagi gʻurur va iftixor tuygʻularini ingliz tilida ifodalab berdilar.

Fan oyligining soʻnggi haftasi yanada qiziqarli taassurotlarga boy boʻldi. Oʻquvchilar yangi oʻquv yilining 1-choragida ingliz tilidan olgan bilim va koʻnikmalarini sahna koʻrinishlari, ingliz tilida oʻzlari yozgan insho va bayonlar orqali namoyish etdilar.

Shuningdek, fan oyligi davomida 18-noyabr – Oʻzbekiston Respublikasi bayrogʻi qabul qilingan kun munosabati bilan alohida tadbir oʻtkazilib, oʻquvchilar Oʻzbekiston bayrogʻi qabul qilinish tarixi va bayroq ranglarining ramziy maʼnolari haqida ingliz tilida oʻz fikrlarini bayon qilishib, sana munosabati bilan sheʼrlar aytdilar va mustaqillikni madh etuvchi ashulalarni ingliz tilida ijro etdilar.

Fan oyligining yakuniy tadbirida 7-sinf oʻquvchilari oʻrtasida “Happy english” mavzusida bellashuv oʻtkazildi. Unda oʻquvchilar 2022-2023 oʻquv yilida joriy etilgan yangi ingliz tili darsligi orqali oʻquv yilining 1-choragida olgan bilimlari, yangi namunadagi darslikning afzallik tomonlari haqida fikr yuritishib, oʻzlarining xorijiy tillarni oʻrganish jarayonida erishayotgan yutuqlari xususida inglizcha muloqot tashkil etishdi. Shu orqali oʻquvchi oʻquvchining bilimini sinovdan oʻtkazib, biri-biridan oʻrganish va biri-biriga oʻrgatish, yaʼni oʻrgan va oʻrgan tamoyilini amalda namoyish etdilar.

Fan oyligining umumlashtirilgan yakuniy tadbiri oʻquvchilarning birinchi choraklik davrida egallagan bilim va salohiyatlarini shaffoflik asosida baholash imkonini berdi va bu xorijiy tillar oʻqituvchilari uchun bir-birlarining tajribalarini oʻrganish hamda amaliyotda qoʻllash imkonini yaratdi.

Xorijiy tillar fan oyligining yakuniga bagʻishlangan tadbir yakunida oylik doirasidagi tadbirlarda faol ishtirok etgan oʻquvchilar maktab maʼmuriyati tomonidan faxriy yoriqlar va esdalik sovgʻalari bilan taqdirlandilar.

Robiya Yoʻldosheva.