MAST HOLATDA TRANSPORT BOShQARIB, TOʻRT KIShINING OʻLIMIGA SABABChI BOʻLGAN FUQAROGA JAZO TAYINLANDI

Amaldagi qonunchigimizga asosan yoʻllarda avtotransportlarni sezgirlik va eʼtiborni susaytiradigan dori- darmonlar taʼsirida, yoʻl harakati xavfsizligiga tahdid soladigan darajadagi charchoqlik va betoblik holatida, mastlik holatida boshqarishi taʼqiqlanadi.Bu qoida yoʻllarda harakatlanish vaqtida yoʻl harakati ishtirokchilarining xavfsizligini taʼminlaydi.  Buni bila turib, spirtli ichimlik ichib  rulga oʻtiradiganlar ham uchrab turadi.

Afsuski yoʻl harakati xavfsizligi xodimlari ning barcha yoʻllarni ham biryoʻla nazorat qilishining imkoni yoʻq. Bundan foydalanib baʼzi haydovchilar mastlik holatida ham “kim bilib oʻtiribdi” deb avtotransport boshqaradilar. Natijada ...

Oʻsha kuni Oʻrozboy (ism oʻzgartirildi) oʻziga tegishli aravachali mototsiklida odamlarning yuklarini tashib, oilasi  gʻamida yurgan edi. Tushlikda topgan daromadidan quvonib ozgina  aroq ichib, oʻzicha charchogʻini yozmoqchi boʻldi. “Ozgina”ga  koʻngli toʻlmay yana ichdi, yana... Achinarlisi shu holida katta qatnov yoʻlga chiqib, tirikchilik tashvishini davom ettirmoqchi boʻldi. U yuqori tezlikda ketayotirib, negadir birdan orqaga qayrildi va orqasidan kelayotgan mashina u bilan toʻqnashmaslik uchun yoʻlning qarama qarshi tomonidan harakatlanib kelayotgan yuk mashinasiga borib urildi.Natijada  yengil mashinada boʻlgan toʻrt nafar fuqarolar olgan tan jarohatlari oqibatida vafot etdi, toʻrt nafar fuqaro turli darajada tan jarohati olib, azob tortdi.

Sodir etilgan yoʻl transport hodisasi yuzasidan  Oʻrozboyning qarshisiga  jinoyat ishi ochilib, jinoyat ishlari boʻyicha tuman sudida atroflicha muhokama etildi va qilmishiga yarasha jazo tayinlandi. Shu oʻrinda bir mulohaza:  mast haydovchi oʻz aybi bilan bevaqt hayotdan koʻz yumgan toʻrt fuqaro oldidagi, ularning yaqinlari oldidagi aybini qanday yuvadi? Axir hayot insonga bir martagina beriladiku!

Sultanmurat DAVLETMURATOV, Qoraqalpogʻiston sudining sudʼyasi.