ENG YaXShI MURABBIYLAR VA SPORTChILAR TAQDIRLANDI

Bolalar maktabdan tashqari sport taʼlimi tizimini yanada takomillashtirish, sport zahirasi va yuksak mahoratli sportchilar tayyorlash, murabbiylar mehnatini ularning tarbiyalanuvchilari erishgan yutuqlariga qarab ragʻbatlantirish tizimi yoʻlga qoʻyilganligi mamlakatimizning barcha hududlarida, jumladan, tumanimizda ham mahoratli sportchilar yetishib chiqishiga omil boʻlmoqda. Boisi, mavjud barcha sport taʼlimi muassasalari moddiy-texnik bazasi mustahkamlanib, sport boʻyicha tayyorgarlikning zamonaviy metodikalari va texnologiyalarini egallagan qobiliyatli murabbiylar bilan taʼminlanmoqda. Natijada ushbu muassasalarda bolalar va oʻsmirlarni, yoshlarni jismoniy tarbiya va sport bilan shugʻullanishga jalb etish, ular oʻrtasida turli sport musobaqalari oʻtkazish orqali qobiliyatlarini aniqlash va rivojlantirishga koʻmaklashish, oʻquv-mashq jarayonini takomillashtira borish natijasida mamlakat va xalqaro sport maydonida oʻz yurti sport sharafini munosib himoya qila oladigan yoshlar kamol topmoqda.

Mangʻit shahrida faoliyat yuritayotgan tuman Bolalar sport maktabida ham yakunlangan 2022-yilda koʻpgina yutuqlar qoʻlga kiritildi. Maktab tarbiyalanuvchilari Oʻzbekiston Respublikasi chempionati va kuboklarida jami 51 ta, shundan 10 ta oltin, 31 ta kumush, 10 ta bronza medallarini qoʻlga kiritishdi. Shuningdek Osiyo chempionatida 1 ta oltin, 1 ta bronza medalini yengib oldilar.

Yakunlangan yilning 30-dekabrida tuman Bolalar sport maktabida oʻquv-mashq jarayonini namunali tashkil qilib, tarbiyalanuvchilarni oʻzlari shugʻullanayotgan sport turida yuqori natijalarni qoʻlga kiritishlariga erishgan bir guruh mahoratli murabbiylar, shuningdek, oʻz iqtidorini namoyish etib, yil mobaynida musobaqalarda muvaffaqiyatlarga erishgan sportchilar taqdirlandi.

Tadbirni Bolalar sport maktabi direktori Chorsham Tojimurodov ochdi va barchani Yangi yil bilan qutlab, yakunlanayotgan yil maktab tarbiyalanuvchilari, murabbiylar uchun yutuqlarga boy yil boʻlganini, bu natijalarga osonlikcha erishilmaganini qayd etdi.

Shundan soʻng eng mahoratli murabbiy, sportchilar taqdirlandi.

Bolalar sport maktabining “Eng yaxshi treneri” nominatsiyasi boʻyicha maktabning futbol treneri Rufat Bobojonov, “Eng yaxshi intiluvchan trener” nominatsiyasi boʻyicha maktab stol tennisi murabbiyi Fozilbek Eshchonovlar taqdirlandilar.

Shuningdek, “Besh tashabbus olimpiadasi” respublika sport musobaqalarining ikkinchi mavsumini yuqori saviyada tashkil etishdagi koʻmagi va tashabbuskorligi uchun maktab rahbar xodimlari va barcha murabbiylariga Oʻzbekiston Respublikasi sportni rivojlantirish vazirligining tashakkurnomalari topshirildi.

Sportchilarning taqdirlanishi barcha tarbiyalanuvchilarda juda ulkan qiziqish uygʻotdi. Yil yakuni boʻyicha Bolalar sport maktabining “Eng yaxshi sportchi” nominatsiyasi boʻyicha yakunlangan yilda Andijon viloyatida oʻtkazilgan sambo boʻyicha Oʻzbekiston chempionatida oltin medalni yengib olgan Zokirjon Boltaboyev, Nukus shahrida ogʻir atletika boʻyicha oʻtkzilgan Oʻzbekiston chempionatida oʻz vazn toifasida chempion boʻlgan Nilufar Jumaboyeva, Oʻzbekiston chempioni Qunduzoy Qoʻshnazarovalar taqdirlandi.

Tadbirda 2023-yilda sport maktabda oʻquv-mashgʻulotlarni namunali oʻtkazish tufayli tarbiyalanuvchilar mahoratini yanada yuksaltirish, yutuqlarni yanada koʻpaytirish yuzasidan tavsiyalar berildi.

Oygul RAJABOVA.