MANGʻIT ShAHRIDA YaNGI “BRIGHTON SCHOOL” OʻQUV MARKAZI BINOSI FOYDALANIShGA TOPShIRILDI

Amudaryo tumanining Olmazor mahallasida tashkil etilgan ingliz va rus tillarini oʻrgatishga ixtisoslashgan “BRIGHTON SCHOOL” oʻquv markazining ochilish marosimi boʻlib oʻtdi.

2022-yil 31-dekabr kuni boʻlib oʻtgan ushbu marosimga tashrif buyurgan mehmonlar karnay-surnay sadolari ostida kutib olindi. Zamonaviy koʻrinishda barpo etilgan va bayramona bezatilgan markaz binosi oldida oʻtkazilgan tadbirda tuman hokimi Sultonboy Yoʻldashev, Xalq taʼlimi boʻlimi boshligʻining oʻrinbosari Ibragim Rajabov, “BRIGHTON SCHOOL” oʻquv markazi rahbari Nurbek Jumaniyozov, 40-sonli maktab direktori Sanobar Xoʻjamurodova, “AMU KIDS” oʻquv markazi rahbari Orzigul Ibragimovalar ishtirok etishdi. Undan tashqari, ochilish marosimida Olmazor mahalla fuqarolar yigʻini masʼullari, faollari va tadbirkorning oila aʼzolari ham qatnashishdi.

Tadbirda soʻzga chiqqan tuman hokimi Sultonboy Yoʻldashev mamlakatimizda xorijiy tillarni oʻqitishga, mutaxassislar tayyorlashga qaratilayotgan eʼtibor haqida soʻz yuritdi. Bugungi kunda koʻplab yoshlar muayyan mutaxassislik boʻyicha taʼlim olish bilan birga chet tillarini ham puxta oʻrganayotgani, buning natijasida dunyo kezayotganini aytib, yoshlarni yaratilayotgan bunday imkoniyatdan oqilona foydalanishga chorladi.

Shuningdek, tadbir davomida soʻzga chiqqan 40-sonli maktab direktori Sanobar Xoʻjamurodova va boshqalar markaz rahbari, malakali ingliz tili fani oʻqituvchisi Nurbek Jumaniyozovning sohadagi fidoyiligi, izlanuvchanligi, oʻquvchilarning xorijiy tillarni oʻrganishlariga salmoqli hissa qoʻshayotgani, yosh boʻlishiga qaramasdan koʻplab shogirdlar yetishtirgani, bugungi kunda undan taʼlim olgan yoshlarning turli nufuzli oliy oʻquv yurtlari talabalari boʻlishganini ham tilga olib oʻtdilar.

Nurbek Jumaniyozov oliy toifali oʻqituvchi. U SEFR boʻyicha B2 va C1 darajadagi sertifikatlar sohibi. Yaqinda Xalq taʼlimi vaziri jamgʻarmasidan ustama olish uchun oʻtkaziladigan sinov jarayonlarida muvaffaqiyatli ishtirok etib, 100 ballik natijani qoʻlga kiritdi va 100 foiz ustamaga ega boʻldi. Yosh oʻqituvchi hozirgi kunda 40-sonli maktabda ingliz tili fanidan dars berib kelmoqda. Oʻtgan oʻquv yilida u taʼlim bergan variativ sinf oʻquvchilarining 93 foizi oliy taʼlim muassasalariga oʻqishga qabul qilindi. Taʼlim sohasidagi fidoyiliklari uchun Joʻqorgʻi Kenges Prezidiumining qaroriga muvofiq “WATAN PIDAYISI” koʻkrak nishoni bilan taqdirlandi.

Tumanimiz yoshlarining xorijiy tillarni oʻrganishlari uchun imkoniyat yaratish maqsadida “BRIGHTON SCHOOL” masʼuliyati cheklangan jamiyatiga qarashli oʻquv markazini tashkil qilgan Nurbek Jumaniyozov ushbu markaz binosi qurilishi va jihozlanishiga kredit mablagʻlaridan 200 mln. soʻm, oʻz hisobidan 1 mlrd. soʻmga yaqin mablagʻ sarf etdi.

Zamonaviy koʻrinishdagi mazkur oʻquv markazi 1,5 mingdan ortiq abituriyentga ingliz va rus tillarini oʻqitishga moʻljallangan. Ushbu oʻquv markazi har kuni uch navbatda faoliyat olib boradi. Unda 10 dan ortiq malakali til mutaxassislari hamda fan oʻqituvchilari abituriyentlarga saboq beradi. Mazkur til oʻqitish markazida oʻquvchi-yoshlarni IELTS va SEFR xalqaro hamda milliy sertifikatlarga oʻqitish kurslari ham yoʻlga qoʻyiladi.

Markazning foydalanishga topshirilishi munosabati bilan oʻtkazilgan tadbirda lenta kesish marosimidan soʻng, mehmonlar binoda yaratilgan sharoitlar bilan tanishib chiqdilar. Ikki qavatli qilib qurilgan mazkur binoda oʻquv mashgʻulotlari uchun 6 ta sinfxona, 1 ta maʼruzalar xonasi, oʻqituvchilar, menejerlar, dam olish va kutish xonalari mavjud. Kutubxona, qabulxona va oshxonalarga ham xonalar ajratilgan. Markazda abituriyentlar uchun barcha qulayliklar yaratilgan. Zamonaviy jihozlar, kompyuter, proyektor, interaktiv doska, audio texnikalar bilan taʼminlangan.

Ushbu oʻquv markazi ishga tushirilishi natijasida 10 nafar ingliz va rus tili fani oʻqituvchilari, 5 nafar texnik xodimlari uchun yangidan ish oʻrni yaratiladi. Oʻquv markazida asosan zamonaviy pedagogik, innovatsion usullarda mashgʻulotlar tashkil etilib, yoshlarda ingliz tilida gapirish koʻnikmasi shakllantiriladi. Qisqa fursat mobaynida ingliz va rus tillarida oʻz ona tilidek soʻzlashishlariga, grammatikasini oʻzlashtirishlariga yordam beriladi. Undan tashqari, boshlangʻich sinf oʻquvchilari uchun ham ingliz tilini mukammal oʻrgatishga moʻljallangan mashgʻulotlarni yoʻlga qoʻyish rejalashtirilgan.

Endilikda tumanimizda yangi tashkil etilgan “BRIGHTON SCHOOL” oʻquv markazi yoshlarning xorijiy tillarni mukammal oʻrganishlari va nufuzli oliygohlar talabalari safidan joy olishlariga imkoniyat yaratib, kelajak egalarining komil insonlar boʻlib voyaga yetishlariga xizmat qiladi.

Ozoda Xudoyberganova.