Choykoʻl ovulida yoshlar bilan uchrashuv oʻtkazildi

Jamiyatning eng katta taʼsirchan kuchi sifatida bugun yurtimiz yoshlari davlatimizda olib borilayotgan keng islohotlar jarayonida faol ishtirok etishmoqda, Vatanimiz taraqqiyotini taʼminlash yoʻlida oʻz gʻoya va takliflari bilan maydonga chiqmoqda.

Shu boisdan aytish lozimki, yoshlarning intilishlari va hayotiy maqsadlari har qanday soha rivojida katta asos boʻlib xizmat qilishi, shubhasiz.

5-yanvar kuni Amudaryo tumanining Choykoʻl ovul fuqarolar yigʻini binosida boʻlib oʻtgan uchrashuvda yoshlar bandligini taʼminlash, boʻsh vaqtlarini mazmunli tashkil etish chora-tadbirlari hamda ayni masalalarning eng muhim jihatlariga atroflicha toʻxtalib oʻtildi.

Uchrashuvda tuman Xalq qabulxonasi boʻlimi mudiri Erkin Rajabov, tuman hokimi oʻrinbosari Mahmud Shermetov tegishli korxona-tashkilot masʼullari va 30 ga yaqin faol yoshlar ishtirok etishdi.

Uchrashuvda tuman hokimi oʻrinbosari Mahmud Shermetov yoshlar bandligi va bu orqali ularning daromad topishlarini taʼminlash borasida soʻnggi yillarda amalga oshirilayotgan katta ijobiy oʻzgarishlarga toʻxtalib oʻtdi. Shuningdek, joylardagi yoshlar muammolari va takliflarini oʻrganishda ishni avvalo, mahalladan boshlash va yoshlarning kasbiy qiziqishlari va kelajak rejalarini aniqlashda mahalla institutining ahamiyati katta ekanligini taʼkidladi. Bunda eng muhim masala sifatida mahalla xodimlari tegishli mutasaddi tashkilotlar bilan hamkorlikda yoshlar masalalariga “fuqarobay” yondashishlari lozimligini aytib oʻtdi.

Shundan soʻng, yoshlardan turli mazmundagi murojaatlar kelib tushdi. Mahallaning faol yoshlaridan biri Iqbol Otamuradov payvandlash ustasi sohasi boʻyicha kasbga oʻqish istagi borligini hamda maxsus sertifikatni qoʻlga kiritib, payvandlash ustaxonasi ochish niyatida ekanligini bildirib bu masalada tuman hokim oʻrinbosaridan maslahat soʻradi. Oliy taʼlim muassasasi bitiruvchisi Akbar Otamuradov esa bandlik masalasida murojaat qildi.

Shuningdek, sartaroshlik kasbini puxta egallab oʻz mahallasida sartaroshxona ochib tadbirkorlik faoliyatini yoʻlga qoʻygan Nurbek Odilov zamonaviy sartaroshlik asbob uchkunalarini xarid qilish uchun imtiyozli kredit olishda amaliy yordam soʻradi.

Undan tashqari, Guluruh Saʼdullayeva Oliy taʼlim muassasasi talabasi ekanligini hamda oilaviy sharoiti sabab kontrakt toʻlovini toʻlashga qiynalayotganligini aytib, amaliy yordam soʻragan boʻlsa, Fazilat Yangibayeva tikuvchilik kasbini puxta oʻzlashtirgani, endilikda tikuvchilik bilan shugʻullanish niyati borligini aytib, zamonaviy rusumdagi tikuv mashinasini olish uchun subsidiya ajratilishida amaliy yordam soʻradi.

Yoshlar tomonidan bildirilgan murojaatlarni tuman hokimi oʻrinbosari oʻz nazoratiga oldi va tez orada ijobiy hal qilinishiga kelishib olindi. Uchrashuvda yoshlarning boʻsh vaqtlarini mazmunli tashkil etish, ularning ijodiy qobiliyatlarini yuzaga chiqarish uchun zarur sharoitlar yaratib berish boʻyicha ham muhim fikrlar bildirib oʻtildi.

Albatta, yoshlar Vatanimizning ertangi umidlari, kelajagimiz davomchilaridir. Shu maʼnoda ularning orzu-intilishlari va hayotiy maqsadlarini amalga oshirish, mustahkam qanot boʻlish bugungi kundagi katta va hayotiy maqsadga aylanmogʻi lozim.

 Tuman hokimi oʻrinbosarining yoshlar bilan uchrashuvi ham ayni shu maqsadlarga qaratilgani bilan ahamiyatlidir.

Tuman hokimligining Axborot xizmati