NURSULTON OʻZBEKISTON ChEMPIONI BOʻLDI

Gʻalaba bizni kutmaydi – aslida biz gʻalaba tomon intilishimiz kerak. Yurakdan hayqirib chiqqan bu soʻzlar Nursultonning shioriga aylanganida u maktab oʻquvchisi edi. Oʻquvchilik davrlaridayoq sportning stol tennisiga qiziqishi ustun keldi. Murabbiyi, Oʻzbekiston va Qoraqalpogʻiston chempioni, sport ustasi Hamida Rajabova unga 5-sinfdaligidayoq stol tennisi uslublarini oʻrgata boshladi. Tez-tez Nukus shahri va Ellikqaʼla tumanlariga borib, musobaqalarda ishtirok etdi va tengdoshlaridan ancha ustunlikka erishdi.

Nursulton Amudaryo tumanidagi 16-sonli maktabda oʻqish bilan birga Bolalar va oʻsmirlar sport maktabi tennis toʻgaragining eng faol aʼzosiga aylandi.

“Buladigan bola – boshidan”, deganidek u umumtaʼlim maktabini tugatib, TATUning Nukus filialiga kompyuter-injiniring fakultetiga oʻqishga kirdi. Ayni paytda 2-bosqich talabasi. 

Yaqinda Toshkent shahrida boʻlib oʻtgan  “Besh tashabbus paraolimpiya” bosqichi oʻyinlarida sportning para stol tennisi boʻyicha 1-oʻrinni egalladi va musobaqa kubogi, diplom hamda muzlatgich bilan taqdirlandi.

Uning bu yutugʻidan eng avvalo ota-onasi, Boyovul mahallasi mahalladoshlari, ustozi Hamida Rajabova, oʻzi taʼlim olayotgan universitet rahbariyati va doʻstlari quvonishdi. Chunki Nursulton Sariboyev ushbu yutugʻi bilan Oʻzbekiston chempioni boʻlgan edi. Chempionlik unga osonlik bilan nasib qilmadi, qancha mehnat, betinim mashgʻulotlar, boʻsh vaqtini toʻgʻri tashkil etish orqali erishdi. Otasi Nurlan Sariboyev, onasi Shahnoza va yaqinlarining qoʻllab-quvvatlaganlari evaziga gʻalaba qozondi u. Universitet rahbariyati va pedagogika jamosi ham Nursultonni izlanuvchan talaba, deya eʼtirof etib, televizor bilan taqdirladilar.

Shuni mamnuniyat bilan qayd etish kerakki, Amudaryo tumanni BOʻSM rahbari Chorsham Tojimurodovning homiyligi va insoniylik yordami ham alohida eʼtiborga molik. Biz ham Nursultonning bundan keyingi oʻqish va ishlarida muvaffaqiyatlar, omadlar tilaymiz.

  Qizlargul Karimova.