Tuman Kengashi deputatalari, kotibiyat mudirlari hamda fuqarolar yigʻinlari raislarining bilimlarini oshirishga bagʻishlangan oʻquv-seminar boʻlib oʻtdi

26-yanvar kuni Amudaryo tumani hokimligining majlislar zalida Xalq deputatlari tuman Kengashi deputatlari, ovul va mahalla fuqarolar yigʻinlari raislari, ommaviy axborot vositalari ishtirokida oʻquv seminari boʻlib oʻtdi.

Oʻquv seminarni tuman hokimining birinchi oʻrinbosari Rashid Salayev ochdi va olib bordi. Seminardan koʻzlangan maqsad, Oʻzbekiston Respublikasi Prezidentining 2022-yil 20-dekabr kungi Oliy Majlis va Oʻzbekiston xalqiga Murojaatining mazmun-mohiyatini tushuntirish shuningdek, deputatlarning qonuniy xuquqi va majburiyati, ommaviy axborot vositalari bilan ishlashish metodlari, fuqarolar yigʻinlari raislarining jismoniy va yuridik shaxslar murojaatlari bilan ishlashish jarayonida ahamiyat qaratilishi lozim boʻlgan jihatlar boʻyicha bilim va koʻnikmalarni yanada mustahkamlashdan iboratdir.

Seminarda Oʻzbekiston Respublikasi Prezidentining 2022-yil 20-dekabr kungi Oliy Majlis va Oʻzbekiston xalqiga Murojaatnomasining mazmun-mohiyati toʻgʻrisida Oʻzbekiston Respublikasi “Milliy tiklanish” demokratik partiyasi Qoraqalpogʻiston Respublikasi Kengashi ijroiy qoʻmitasi devonining deputatlar, deputatlik birlashmalari va boshlangʻich partiya tashkilotlari bilan ishlash boʻlim boshligʻi Majid Mirzambetov maʼruza qildi.

U oʻz nutqida muhtaram Prezidentimiz Murojaatnomada oltita yoʻnalishda amalga oshirish zarur boʻlgan eng muhim islohotlarni ilgari surganligini bularning barchasi Yangi Oʻzbekistonning taraqqiyot yoʻlida muhim ahamiyat kasb etishini taʼkidladi. Shuningdek, 2023-yildan maktab taʼlimini xalqaro taʼlim dasturlari asosida butunlay isloh qilish kelasi besh yilda ularning soni bir mingtaga yetkazilishi ishonchli kelajak, yosh avlodning porloq hayoti uchun tikilgan investitsiya ekanligini aytib oʻtdi.

Yigʻilishda deputatlarning qonuniy xuquqi va majburiyatlari yuzasidan Kengash ijroiy qoʻmitasi devoni mafkuraviy va maʼnaviy-maʼrifiy masalalar boʻyicha bosh mutaxassis Muxamedali Tursinbayev maʼruza qildi.

Qayd etib oʻtilganidek, deputat oʻz faoliyatida jamiyatda umumiy qabul qilingan odob-axloq printsiplariga qatʼiy rioya etishi, fuqarolarning, mansabdor shaxslarning huquqlari, shaʼni, qadr-qimmatini yoki ishchanlik obroʻsini hurmat qilishi, shuningdek deputat nomiga dogʻ tushiradigan va Oʻzbekiston Respublikasi Oliy Majlisi Qonunchilik palatasi nufuziga, umuman davlat manfaatlariga putur yetkazadigan xatti-harakatlardan oʻzini tiyishi lozim.

Undan tashqari, deputat oʻz vazifalarini vijdonan va halol bajarishi, oʻz malakasini yuqori darajada tutib turishi, oʻzining nazariy bilimlari va amaliy koʻnikmalarini takomillashtirib borishi kerak.

Seminarda deputatlarning ommaviy axborot vositalari bilan ishlashish metodlari yuzasidan Kengash raisining axborot siyosati masalalari boʻyicha maslahatchisi Mirzaxmet Tajimuratov maʼruza qildi.

Taʼkidlanganidek, deputat ommaviy axborot vositalarida, matbuot konferentsiyalarida, boshqa jamoat tadbirlaridagi chiqishlarida, omma oldidagi bayonotlarida davlat organlari va boshqa organlarning, tashkilotlarning, mansabdor shaxslarning va fuqarolarning faoliyatini sharhlaganda oʻz nutqida ularning shaʼni va qadr-qimmatiga putur yetkazadigan qoʻpol, haqoratomuz ibora va soʻzlarni qoʻllashga, asossiz ayblovlarga yoʻl qoʻyishga, bila turib yolgʻon va notoʻgʻri axborotdan foydalanishga, qonunga xilof xatti-harakatlarga daʼvat etishga haqli emas.

Seminar davomida fuqarolar yigʻinlarining aholi murojaatlari bilan ishlash tartibi haqida ham soʻz yuritildi. Mazkur masala yuzasidan tuman Adliya boʻlimi xodimi Jurʼat Avezov maʼruza qilib, “Jismoniy va yuridik shaxslarning murojaatlari toʻgʻrisida”gi Oʻzbekiston Respublikasining Qonuni ijrosini toʻliq taʼminlash lozim ekanligini qayd etib oʻtdi.

Seminarda tuman hokimligining tashkiliy-nazorat guruhi yetakchi mutaxassisi Azat Almuratov Fuqarolar yigʻinlarining ijro intizomi va hujjatlar bilan ishlash yoʻnalishida amalga oshirilishi lozim boʻlgan tartib va qoidalar bilan barchani yaqindan tanishtirib oʻtdi.

Oʻquv-seminar davomida deputatlar hamda mahalla raislarining siyosiy bilimlari yanada oshirildi. Ishtirokchilar seminar tashkilotchilariga oʻzlarini qiziqtirgan savollar bilan murojaat qilib, tegishlicha javoblar olishdi.

Tuman hokimligining Axborot xizmati.