MAKTAB TARGʻIBOTChISINING YuTUQLARI

Mamlakatimizda yoshlar maʼnaviyatini yuksaltirish, ularning iqtidorlarini yuzaga chiqarish hamda oʻqib-izlanishlari uchun zarur shart-sharoitlar yaratish maqsadida keng qamrovli ishlar amalga oshirilmoqda. Bu borada Oʻzbekiston Respublikasi Oliy Majlisi huzuridagi Nodavlat notijorat tashkilotlari va fuqarolik jamiyatining boshqa institutlarini qoʻllab-quvvatlash jamoat fondi tomonidan moliyalashtirilayotgan turli mavzulardagi grant-loyihalari doirasidagi maʼnaviy-maʼrifiy tadbirlar muhim ahamiyat kasb etmoqda.

Mazkur fond tomonidan eʼlon qilingan “Yoshlarning maʼnaviy-ruhiy va intellektual salohiyatini oshirish” mavzusidagi tanlovda Amudaryo televideniyesi “Jaholatga qarshi - maʼrifat” yoʻnalishi boʻyicha “Yuksak maʼnaviyatli va axloqli yoshlar – kelajak poydevori” loyihasi bilan ishtirok etib, tanlov gʻolibi boʻlgan edi. Ayni paytda televideniye ijodiy jamoasi tomonidan hududlardagi maʼnaviy-maʼrifiy ishlar yaxshi yoʻlga qoʻyilgan maktablar va ushbu maktablarning maʼnaviy-maʼrifiy masalalar boʻyicha targʻibotchilari tomonidan amalga oshirilayotgan ishlar keng yoritib borilmoqda.

1-sonli umumtaʼlim maktabida 741 nafar oʻquvchi taʼlim-tarbiya olishadi. 76 nafar oʻqituvchilarning barchasi oʻz sohasining bilimdonlari hisoblanadi.

Maktabning ijodiy-madaniy masalalar boʻyicha targʻibotchisi Zulfiya Olloyorova esa maktabda oʻtkaziladigan barcha maʼnaviy-maʼrifiy tadbirlarning tashkilotchisi. Maktab direktori Dilrabo Sherboyeva har haftaning boshida faol oʻqituvchilar hamda Zulfiya Olloyorova ishtirokida maktab oʻquvchilarining qiziqish va intilishlari, maktabda tashkil etilgan toʻgaraklar faoliyati, shuningdek, ijodga moyil, sportchi, sanʼatsevar yoshlar bilan ishlashish boʻyicha amalga oshirilayotgan ishlar va galdagi rejalar yuzasidan fikrlashib oladi.

Ayniqsa, oʻquvchi-yoshlarning oʻzlari qiziqqan fanlar boʻyicha iqtidorlarini rivojlantirishga alohida eʼtibor qaratiladi. Shu bois, 2022-2023 oʻquv yilida fanlar olimpiadasining tuman bosqichida 9-sinf oʻquvchisi Shodiyona Qurbonboyeva, 11-sinf oʻquvchisi Sevinchoy Oʻrinboyevalar qoraqalpoq tili fanidan 1-oʻrinni egalladilar va fanlar olipiadasining Respublika bosqichiga yoʻllanma oldilar. Maktabning yana bir aʼlochi oʻquvchisi Hilola Bozorboyeva kimyo fanidan faxrli 1-oʻrin sohibasi boʻldi va fanlar olimpiadasining Qoraqalpogʻiston Respublikasi bosqichiga yoʻllanmani qoʻlga kiritdi.

Shuningdek, maktab oʻquvchilari orasida besh muhim tashabbus doirasida oʻtkazilayotgan turli yoʻnalishlardagi sport musobaqalarining Qoraqalpogʻiston Respublikasi chempionatlari va Oʻzbekiston miqyosidagi musobaqalar gʻoliblari ham talaygina.

Ijodiy-madaniy masalalar boʻyicha targʻibotchi Zulfiya Olloyorova ijodkor yoshlar bilan ishlashishda oʻziga xos tajribaga ega targʻibotchilardan. Uning mazkur lavozimda faoliyat yuritayotganiga endi ikki yil boʻldi. Lekin oʻtgan qisqa vaqt ichida maktab oʻquvchilarining qiziqish va intilishlarini ragʻbatlantirish, ularni ezgu orzular sari ruhlantirish maqsadida taniqli shoir va yozuvchilar bilan uchrashuvlar, davra suhbatlari tashkil etib, ijodkor yoshlarning sheʼr va hikoyalari turli toʻplamlarda, gazeta va jurnallarida chop etilishiga erishdi.

Xususan, 2022-yilda “Taraqqiyot koʻzgusi” gazetasi nashriyoti tomonidan chop etilgan “Ummondan terilgan marjonlar” deb nomlangan toʻplamdan 1-sonli maktab ijodkor oʻquvchilarining ham sheʼrlari joy olgan. Bundan tashqari, “Taraqqiyot koʻzgusi”, “Mening oilam”, “Qarligʻash”, “Jetkenjek”, “Gʻuncha”, “Gulxan” kabi gazeta va jurnallarda maktab hayotidan lavhalar, ijodkor oʻquvchilarning ijod namunalari yoritilib borilmoqda.

Ayniqsa, taniqli shoira Zulfiya Moʻminova, Qoraqalpogʻiston Respublikasida xizmat koʻrsatgan madaniyat xodimi Xonimjon Rajabovalar ishtirokidagi “Dildan suhbat” tadbiri oʻquvchilarda unutilmas taassurot qoldirdi. “Taraqqiyot koʻzgusi” gazetasi tahririyati qoshidagi “Jayxun ilhomlari” nodavlat notijorat tashkiloti raisi, Oʻzbekiston jurnalistlari ijodiy uyushmasi aʼzosi Oʻrozali Reyimov bilan hamkorlikda “Ummondan terilgan marjonlar” toʻplamining taqdimotiga bagʻishlangan tadbir va “Isteʼdodim - iqbolim” deb nomlangan tanlov oʻquvchilarning ijodiy qobiliyatini rivojlantirishda muhim omil boʻldi. Chunki kitob taqdimoti va ijodkor yoshlar isteʼdodini kamol toptirishga qaratilgan “Isteʼdodim - iqbolim” tanlovi orqali koʻplab havaskor shoir va shoiralar kashf etildi, gʻoliblarning ragʻbatlantirilgani esa ular qalbiga koʻtarinki kayfiyat baxsh etdi.

Maktabda bu kabi tadbirlarning mavzusi ham qamrovi ham keng. Besh muhim tashabbus doirasida amalga oshirilayotgan ishlar esa oʻquvchi-yoshlarning nafaqat boʻsh vaqtlarini mazmunli oʻtkazish, balki qobiliyat va iqtidorlarini namoyon etishlari uchun muhim ahamiyat kasb etmoqda.

Maʼnaviy-maʼrifiy masalalar boʻyicha targʻibot ishlarini namunali tashkil etgani uchun 2021-yilda Zulfiya Olloyorova Qoraqalpogʻiston Respublikasi maʼnaviyat va maʼrifat markazining maxsus sertifikati sohibasi boʻldi. Bundan tashqari, u “Ziyolilar minbari” kanali tomonidan oʻtkazilgan “Ustoz maqomi togʻlardan ulugʻ” Respublika koʻrik-tanlovida 1-Darajadi diplom bilan taqdirlandi.

Shuningdek, Zulfiya Olloyorova “Mahoratli pedagog” jurnali tomonidan tashkillashtirilgan “Sohibqiron buyuk bobomiz” tanlovining “Eng yaxshi videorolik” yoʻnalishi gʻolibi, Yosh isteʼdodlarni kamolga yetkazish, vatanga muhabbat, milliy istiqlol gʻoyalariga sadoqat ruhida tarbiyalash borasidagi samarali faoliyati hamda Respublika yosh ijodkorlari anʼanaviy zomin seminarining hududiy bosqichini yuksak saviyada oʻtkazishdagi xizmatlari uchun “Ehtirom” yorligʻi sohibasi boʻldi. Bundan tashqari, Zulfiya Olloyorova Oʻzbekiston Respublikasi Xalq taʼlimi Vazirligi tomonidan oʻtkazilgan “Ustozlarning qadri – oʻquvchilar qalbida boʻladi” tanlovida mutlaq gʻolib deb topilib, Oliy darajali Diplom bilan taqdirlandi. Qoʻqon Davlat Pedagogika instituti tomonidan ingliz tilida chop etiladigan “Journal of new century innovations” jurnalida chop etilgan “Ommaviy madaniyat” bizga nima bermoqda?” maqolasi bilan ishtirok etib maxsus sertifiqatga ega boʻldi.

Ayni kunlarda maktabda Zulfiya Olloyorova oʻquvchi-yoshlarning boʻsh vaqtlarini mazmunli oʻtkazish maqsadida Zahiriddin Muhammad Bobur va Alisher Navoiy hayoti hamda ijodiy faoliyatlariga bagʻishlab oʻtkazilgan “Dillarda Vatan madhi” tanlovi gʻoliblari bilan birgalikda yaqinlashib kelayotgan bahor bayramlariga qizgʻin hozirlik koʻrmoqda. Oʻquvchilar Navoiy, Bobur gʻazallarini, Zulfiya sheʼrlarini yodlab, ularning mazmun-mohiyatini puxta oʻrganishmoqda. Zero, adabiyotga, sheʼriyatga – maʼnaviyatga oshnalik inson qalbini poklaydi va yuksaltiradi. 1-sonli maktabning ijodiy-madaniy masalalar boʻyicha targʻibotchisi, shoira Zulfiya Olloyorova maktab oʻquvchilarining qalblarida ana shunday sohir tuygʻular uygʻotish yoʻlida faoliyat yuritishdan aslo charchamaydi. Chunki har bir yutuqda, ezgu ishda uning ham munosib hissasi bor.

Robiya YOʻLDOShEVA.