YoShLAR - SOGʻLOM TURMUSh TARZI TARAFDORI

Sharofiddin BOLTABOYeV,

dzyu-do kurashi boʻyicha Oʻzbekiston chempioni, Oʻzbekiston terma jamoasi aʼzosi:

- Men oʻzimcha mustaqil ravishda sport bilan shugʻullana boshlaganimda besh yoshda edim. Esimda: Oʻzbekiston teleradiokanalining sport telekanali orqali beriladigan koʻrsatuvlarning barchasini qoldirmasdan tomosha qilardim. Ayniqsa, dzyu-do kurashi musobaqalari jon-u dilim edi. Tuman ichki ishlar boʻlimida xizmat qiluvchi dadam Poʻlat Rahimov mening qiziqishlarimni qoʻllab-quvvatlagan birinchi maʼnaviy ustozim boʻldi. 2-sonli BOʻSM da ilk mashgʻulotlarni sportdagi ustozim Alisher aka Rahimov rahbarligida boshladim. Alisher aka menga dzyu-do kurashining sir-asrorlarini erinmay oʻrgatdilar. Koʻplab musobaqalarda gʻolib boʻlishim uchun men bilan bab-baravar mehnat qildilar.

Prezidentimiz I.A.Karimov rahbarligida mamlakatimizda bolalar sportigajiddiy eʼtibor qaratilayotganida juda katta maʼno bor. Chunki, sport - insonni nafaqat jismonan, balki ham maʼnan, ham aqlan chiniqtiradi. Buni men oʻz tajribamdan bilaman. Boʻy-bastim, suyak muskullarimning rivojlanishi sport bilan shugʻullanmaydigan tengdoshlarimnikidan tamoman farq qilishini oʻzim his etaman. Hatto sport insonga oʻz orzu-maqsadlari sari dadil intilishni, oʻziga nisbatan talabchan, qatʼiyatli boʻlishni oʻrgatadi. Agar eʼtibor bergan boʻlsangiz, sportchilarda ajoyib bir xislat bor. Bu–oldinga, faqat oldinga intilish, vatanparvarlik tuygʻusi.

Men koʻplab xalqaro musobaqalarda ishtirok etib, oʻzimning sport bilan hamnafas hayotimdan faxrlanganman. Bu–milliy gʻurur tuygʻusi. Gʻolib sportchining sharafiga Oʻzbekiston bayrogʻi koʻtarilib, davlat madhiyasi yangragan lahzalarda shunday ulugʻ yurt–Oʻzbekiston farzandi ekanimdan quvonib ketaman.

Sport–mening hayotim mazmuni, kafolatli mustahkam sogʻligim garovi, menga el ichra hurmat, obroʻ, eʼtibor keltirgan sharafli mashgʻulot. Men barcha tengdoshlarimning sport bilan oshno boʻlishlarini juda-juda istayman.

Hamida RAJABOVA, 1-sonli Bolalar va oʻsmirlar sport maktabining stol tennisi boʻyicha murabbiyi:

- Tumanimizdagi 1-sonli bolalar va oʻsmirlar sport maktabida sportning stol tennisi turi boʻyicha shugʻullanuvchi bolalar koʻpchilikni tashkil etadi. Koʻpchilik: "stol tennisi juda oddiy sport turi-ku”, deb oʻylashadi.

Men shunday fikrlovchilarga: "avvalo bu sport bilan bir shugʻullanib koʻring, xulosa qilishga shoshilmang,”–degim keladi. Chunki, stol tennisi eng avvalo goʻzallik, aniq va sezgir, epchil harakatlar sporti. Bu sport turi insonning irodasini charxlaydi, sezish qobiliyatini yaxshilaydi, teran fikrlashga oʻrgatadi.

Muhtaram Prezidentimiz sportning ushbu turiga mustaqillikning ilk yillaridanoq alohida eʼtibor qaratganlari ham bejiz emas. Chunki dunyoga mashhur tennischilarning barchasi katta tennis sari ilk qadamni stol tennisi musoboqalaridan boshlashgan.

Insonda sezgirlik, xushyorlik, epchillik sifatlari bir-biriga uygʻun tarzda shakllanishda stol tennisining ahamiyati juda katta. Bundan tashqari, qon aylanish tizimida nuqsoni bor kishilar, koʻrish qobiliyati pasaygan insonlar tennis sporti bilan shugʻullansalar, albatta, kasalliklardan forigʻ boʻladilar. Aniq maqsad sari intilish hissini uygʻotishda tennis sportiga teng keladigani yoʻq. Hatto zamonaviy tibbiyot mutaxassislari ham irodasi sust bemorlarga tennis yoki shaxmat oʻynashni tavsiya qilishadi.

Mening shogirdlarim juda koʻp. Ulardan Faxriddin Rajabov, Mohira Imomqulova, Shavkat Matyoqubovlarni bugungi kunda tumanimizdan tashqarida ham yaxshi bilishadi. Ular bir necha marta Qoraqalpogʻiston Respublikasi miqyosida oʻtkazilgan oʻsmirlar oʻrtasidagi musobaqalarning sovrindorlari boʻlishgan. Ana shu bolalarning sport maktabimizga ilk qadam qoʻygan kundagi holati koʻz oldimdan ketmaydi: tortinchoq, uyatchan bolalar edilar. Bugun ular bilan bir suhbat qurib koʻring, aslo zerikmaysiz. Ularning fikrlari teran, irodasi kuchli, oʻzlarining oldiga qoʻygan aniq maqsadlari bor. Eng muhimi, har jihatdan sogʻlom, qaddi-qomatlari koʻrkam.

Demak, sport – bolani ham chiniqtiradi, aqlan va jismonan shakllantiradi. Bolaning bunday rivojlanishi–mustahkam sogʻlikdan dalolat. Bunday bola maktabda fanlarni yaxshi oʻzlashtiradi, ezgu orzular ogʻushida yashaydi. Bola dilida orzu uygʻonsa, oʻziga nisbatan ishonch hissitugʻiladi. Oʻziga ishonch tuygʻusi bilan u oʻz kelajagini yaratishga qodir inson sifatida shakllanadi.

Stol tennisi, umuman olganda sportning barcha turlari insonning har tomonlama kamolotga yetishuvida muhim omil – sogʻlom turmush tarzining eng maqbul mezonidir.

Sogʻlom turmush tarzi – bu faol mehnat, kuchli jismoniy va ruhiy holat, oʻta xavfli va zararli taʼsir koʻrsatuvchi omillarni yenga oladigan, yetuklikka intiluvchan shaxsning shakllanish jarayoni boʻlib, uning asosiy yoʻnalishlari quyidagilardan iborat:

- toʻgʻri va ratsional ovqatlanish;

- harakatli turmush va badantarbiya;

- kun va ish tartibini biologik qonuniyatlar asosida tashkil qilish;

- jinsiy tarbiya, sogʻlom oila;

- ruhiy osoyishtalikni taʼminlash;

- zararli odatlardan voz kechish;

- shaxsiy va jamoat gigiyenasiga rioya qilish;

- baxtsiz hodisa va jarohatlardan ehtiyotkorlik;

- sogʻlom turmush tarzi haqida bilim va malakaga ega boʻlish.

Aziz yoshlar! Keling, Siz ham sogʻlom turmush tarzini tanlang!