67-sonli maktabda “Balli qizlar!” koʻrik-tanlovi oʻtkazildi

Qiz bola nafaqat oilaning, balki elning ham koʻrki. Oilada qiz farzand dunyoga kelsa, shu boisdan ham odobli, aqlli, iymonli, tadbirli qilib voyaga yetkazishga harakat qilinadi. Xalqimizda qiz bolani eʼzozlash, uni kelgusi hayotga munosib tayyorlash uchun pazanda, orasta qilib tarbiyalashga alohida eʼtibor beriladi. Zero, qiz bor xonadon fayzi boʻlakcha boʻladi.

Asrlar osha yashab kelayotgan buningdek milliy urf-odatlarimiz, anʼana va qadriyatlarimizni yosh avlod qalbiga singdirishda, ularga hurmat ruhida tarbiyalashda umumiy oʻrta taʼlim muassasalarining ham munosib oʻrni bor.

6-mart kuni Amudaryo tumanidagi 67-sonli maktabda 8-mart – Xalqaro xotin-qizlar kuni munosabati bilan oʻtkazilgan “Balli, qizlar!” deb nomlangan tanlovda ham yuqori sinflar oʻquvchi-qizlarining bilimdonligi, pazandaligi, chaqqonligi sinovdan oʻtkazildi. Ishtirokchi qizlar bellashuvini maktabning tajribali muallimalari ziyraklik bilan kuzatib, odilona baholab bordilar.

Bellashuvda Nilufar Jumamurodova Marhabo Yoʻldosheva, Maftuna Hayitboyeva, Mashhura Murodboyevalar milliy liboslarda sahnaga chiqib, oʻzlari haqidagi maʼlumotlarni taqdim etdilar. Goh sheʼriy misralar, goh taʼsirli soʻzlar orqali oilasi, oʻzi, qiziqishlari va kelajakdagi orzulari haqidagi maʼlumotlarni qiziqarli va ixcham tarzda bayon etgan qizlar ikkinchi shartda pazandaligi boʻyicha sinovdan oʻtkazildi. Bunda ularga yurtimiz zaminida yetishtirilgan turli sabzavotlar, koʻkatlardan bahoriy salat tayyorlash topshirildi. Qizlar biri-biridan xushtaʼm, mazali salatlar tayyorlashga intildilar. Ular uchinchi shartda bilimdonlik sinovidan oʻtdilar, savollarga tezkor javob berish ham ularga qiyinchilik tugʻdirmadi.

Navbatdagi bosqichda ishtirokchi qizlarning tafakkuri sinaldi, deyish mumkin. Ulardan boshlovchi boshini aytgan maqolning davomini aytishlari soʻraldi. Tomoshabinlar zukko qizlarning xalq ogʻzaki ijodining ajralmas qismi boʻlgan maqollarni aytishlarini qarsaklar bilan olqishlab turdilar. Bahru bayt aytishuvida esa ishtirokchilarning sheʼriyatga qanchalar qiziqishlari ayon boʻldi.

Oʻquvchi-qizlarning qiziqishlari boʻyicha erkin mavzuga navbat berilganda davrada sheʼr, qoʻshiq, raqslar ijro etildi.

Ishtirokchi qizlarning iqtidori 4 ta nominatsiya boʻyicha baholandi va ragʻbatlantirildi.

Oʻquvchi-qizlarni ushbu bellashuvga maktabning tajribali oʻqituvchisi Zulayho Bobojonova tayyorladi.

Shuni eʼtirof etish kerakki, taʼlim muassasalarida bunday bellashuvlarning oʻtkazib turilishi oʻquvchilarni oʻz ustida ishlashiga, izlanishiga ragʻbatlantiradi, dunyoqarashini kengaytiradi. Shu maʼnoda olib qarasak, mazkur tadbir ham juda ahamiyatli boʻldi, deyish mumkin.

Oygul RAJABOVA.