38-sonli maktabda “Onajonlar bayrami” deb nomlangan madaniy tadbir oʻtkazildi

Chaqaloqlarning tili “Ona” soʻzi bilan chiqishi hech kimga sir emas. Bu avval homilani jismida, soʻng qoʻlida koʻtarib, oyoqqa qoʻygunicha ne bir zahmatlarga ham  chidab, hech ogʻrinmay farzand tarbiyalaydigan buyuk zot – onalarning fidoyiligi uchunmikan? Ona nainki bolasi oʻzini tutib, yurib ketgunicha, balki, to umrining oxirigacha oilam, bolam deb yashaydi, farzandlari mehri, kamolidan kuch olib yashaydi.

Ana shunday sabri cheksiz, mehri ummon ayollarni eʼzozlash, hurmatini joyiga qoʻyish yurtimizda boqiy qadriyatlardan hisoblanadi.

Umumiy oʻrta taʼlim maskanlarida yosh avlodga ilm bilan birga yuksak tarbiya berish, ayol-qizlarga, ona yurtga muhabbat, doʻst-birodarlik tuygʻularini shakllantirishga ham alohida eʼtibor qaratiladi.

Amudaryo tumanidagi kimyo-biologiya fanlarini chuqur oʻqitishga ixtisoslashtirilgan 38-sonli maktabning 1-“v” sinfi oʻquvchilari ishtirokida 8-mart – Xalqaro xotin-qizlar bayrami munosabati bilan “Onajonlar bayrami” deb nomlangan madaniy tadbir oʻtkazildi.

Tadbir uchun maktab faollar zali bayramona bezatildi va ayol-qizlarni, onalarni sharaflovchi ulugʻ mutafakkirlarimizning ibratli soʻzlari yozilgan plakatlar osildi. Oʻquvchilar chizgan rasmlar ham qoʻyildi.

Tadbirni maktab direktori Bahrom Boltaboyev ochdi va barcha oʻqituvchini, oʻquvchi ayol-qizlarni 8-mart – Xalqaro xotin-qizlar kuni bilan qizgʻin qutladi. Jamiyatimizda, oilalarda ayol-qizlarning tutgan oʻrniga yuksak baho berdi va bayram munosabati bilan tashkillashtirilgan madaniy-musiqiy kechani tomosha qilishga chaqirdi.

Tadbirga tashrif buyurgan oʻqituvchilar, oʻquvchilar, ularning ota-onalari  sahnaga 1-“v” sinf oʻquvchilarining “Onajonimsiz” qoʻshigʻiga raqsi boshlanishini qarsaklar bilan olqishladilar. Ona, ayol, ona Vatan, farzandlik burchi ulugʻlangan sheʼrlarni ijro etayotgan jajji  oʻgʻil-qizlar maktabga qadam qoʻyganidan beri qay darajada savodxon boʻlganligini ham sahnada namoyish etdilar.

Mazkur sinf rahbari Muhabbat Allaberganova koʻmagida sheʼr yodlash va ifodali oʻqish koʻnikmalarini egallagan bolajonlarning oʻqigan sheʼrlari “Buvijon”, “Koʻylagim”, “Yulduzchalar” qoʻshiqlari, raqslar ham barchaga manzur boʻldi. Shunisi eʼtiborliki, hozirgi kunda mamlakatimiz taʼlim tizimida oʻquvchilarga xorijiy tillarni oʻrgatish ilk sinfdan boshlanishi oʻquvchilarning mazkur tillarni erta oʻzlashtirishlariga zamin boʻlayotir.

Tadbirda jajji oʻquvchilar rus tilida sheʼrlar aytib, qoʻshiqlarga raqsga tushganlarida bu yaqqol oʻz ifodasini topganday boʻldi.

Tadbir oxirida butun sinf oʻquvchilari “Onajon, yonimda boʻlsangiz bas” nomli qoʻshiqni joʻrovoz boʻlib ijro etish barobarida har biri oʻz onalariga gul sovgʻa qilishgani barchani toʻlqinlantirdi. Oʻquvchilar onalari quvonchdan koʻzlari porlab, sinf rahbari Muhabbat Allaberganovaga  rahmatlar aytdilar.

Aslida onaning farzandlarni avaylab parvarishlab voyaga yetkazgunicha chekadigan mashaqqatlarining, mehrining qiyosi yoʻq. Ular doimo eʼzozda, ehtiromda yashashga loyiqdir. “Onajonlar bayrami” tadbiri shu maqsadga xizmat qildi desak, adashmagan boʻlamiz.

Oygul RAJABOVA.