XALQARO XOTIN-QIZLAR KUNIGA BAGʻIShLAB “AYoLLAR SPORT HAFTALIGI” OʻTKAZILDI

Mamlakatimizda xotin-qizlarning ijtimoiy faolligini oshirish, ularning oʻzlari qiziqqan yoʻnalishlar boʻyicha iqtidorlarini namoyon etishlari uchun zarur shart-sharoitlar yaratish, ayniqsa sport-sogʻlomlashtirish ishlarini manzilli rivojlantirish, ayol-qizlar oʻrtasida turli sport musobaqalarini tashkil etishga alohida eʼtibor qaratilmoqda. Oʻzbekiston Respublikasi Prezidentining 2022-yil 7-martdagi “Oila va xotin-qizlarni tizimli qoʻllab-quvvatlashga doir ishlarni yanada jadallashtirish toʻgʻrisida”gi 87-sonli Farmoni mazmun-mohiyati ham aynan ana shu maqsadlarga qaratilgani bilan muhim ahamiyat kasb etmoqda.

Bu borada Amudaryo tumani Oila va xotin-qizlarni qoʻllab-quvvatlash boʻlimi, Yoshlar agentligi tuman boʻlimi va bolalar-oʻsmirlar sport maktabi sport murabbiylari tashabbusi bilan amalga oshirilayotgan ishlar eʼtiborga munosib. Ayniqsa, mahallalarda, oʻquv muassasalarida ayol-qizlarning boʻsh vaqtlarini mazmunli oʻtkazishga qaratilgan sport musobaqalari tobora ommaviylashib bormoqda.

Yuqoridagi Prezident Farmoni ijrosini taʼminlash maqsadida joriy yilning 1-7-mart sanalari oraligʻida 8-mart – Xalqaro xotin-qizlar kuni bayrami munosabati bilan Amudaryo tuman Oila va xotin-qizlar boʻlimi, Yoshlar agentligi tuman boʻlimi hamda BOʻSM hamkorligida boʻlib oʻtgan “Ayol-qizlar sport haftaligi” ham murosasiz kurashlarga boy va qiziqarli oʻtdi.

Sportning 7 ta turi, xususan, shaxmat-shashka, stol tennisi, voleybol, yengil atletika va stritbol, milliy kurash va gimnastrada hamda minifutbol boʻyicha oʻtkazilgan musobaqalar har bir ishtirokchiga zavq-shavq bagʻishladi.

Sport haftaligining ilk musobaqalari 1-mart kuni stol tennisi boʻyicha boshlanib, unda 10 ta mahallada boʻlib oʻtgan stol tennisi musobaqalarida gʻoliblikni qoʻlga kiritgan sportchi qizlar ishtirok etishdi.

Biri-biridan qiziqarli bahslarga boy tarzda oʻtgan bellashuvlarda Mangʻit shahrining Boʻston mahallasida istiqomat qiluvchi stol tennisi sporti ishqibozi Mohiraxon Imomqulova barcha raketkachilardan oʻzining yaqqol ustunligini namoyon etib, faxrli 1-oʻrinni egalladi. Ikkinchi oʻrin Oʻrta qalʼa ovul fuqarolar yigʻinida yashovchi yosh sportchi Fotima Shomurodovaga nasib etdi. Oʻrtaqalʼalik yana bir sportchi Zuhra Shomurodova hamda Mangʻit shahrining Boyovul mahallasidan Mavluda Rajabovalar uchinchi oʻrinni egalladilar.

“Ayol-qizlar sport haftaligi” doirasidagi tadbirlar 2-mart sanasida sportning shaxmat-shashka turlari boʻyicha davom etdi. Shuningdek, 3-mart kuni voleybol sporti musobaqalari, 4-mart sanasida sportning yengil atletika va stritbol, 6-mart kuni milliy kurash va gimnastrada, haftalikning oxiri kuni, 7-mart sanasida esa minifutbol boʻyicha musobaqalar oʻtkazildi.

Shuni alohida taʼkidlash kerakki, 8-mart – Xalqaro xotin-qizlar kuniga bagʻishlab, mazkur bayram arafasida boʻlib oʻtgan “Ayollar sporti haftaligi” xotin-qizlarning ijtimoiy faolligini oshirish, ularni sport sogʻlomlashtirish inshootlariga keng qamrab olish, aziz va muhtarama opa-singillarimiz, goʻzal qizlarga bayramona, joʻshqin kayfiyat baxsh etish maqsadida tashkillashtirilgan haftalik doirasidagi barcha tadbirlar gʻoyatda uyushqoqlik va jipslik asosida, doʻstona kayfiyatda oʻtdi.

Sport haftaligi yakunida gʻolib sportchilar munosib taqdirlandi. Xususan, shaxmat yoʻnalishida Doʻstlik mahallasidan 1-oʻrinni egallagan Durdona Rahimova, 28-sonli maktabgacha taʼlim tashkiloti xodimasi, 2-oʻrin sohibasi Nilufar Tohirova, 3-oʻrinni egallagan Durunki mahallasidan Dilnoza Toʻrayeva, shashka turi boʻyicha 1-oʻrin sohibasi, 5-sonli maktabgacha taʼlim tashkilotidan Umida Bozorboyeva, 2-oʻrinni egallagan 28-sonli maktabgacha taʼlim tashkilotidan Nasiba Abdullayeva, 3-oʻringa munosib koʻrilgan 19-sonli maktabgacha taʼlim tashkilotidan Gulnoza Bekishovalar musobaqaning hamkor tashkilotlari tomonidan munosib taqdirlandilar.

Shuningdek, voleybol musobaqalari ham hayajonli daqiqalarga boy boʻldi. Unda Oq oltin ovuli voleybolchi qizlar jamoasi 1-oʻrinni egallashdi. Toshyoplik voleybolchi qizlarga 2-oʻrin, Jumurovulliklarga esa 3-oʻrin nasib etdi.

Haftalik doirasida, 4-mart kuni 25 nafar oʻsmir qizlar ishtirok etgan sportning yengil atletika turi boʻyicha qizgʻin bahslar davom etdi. Unga koʻra, 1-2-oʻrinlar kuyukkoʻpirlik Muxlisa Toʻliboyeva va Roza Madatovalarga nasib etdi. Doʻstlik mahallasi yengil atleti Nazira Rahimboyeva esa faxrli 3-oʻrinni egalladi.

Shu kuni katta yoshdagi ayol-qizlar oʻrtasidagi yengil atletika sport turi boʻyicha musobaqalarda ham 25 nafar sportchi qatnashib, 1-oʻrinni Navoiy mahallasidan Umida Bozorboyeva, 2-oʻrinni Fotima Shomurodova va 3-oʻrinni Oʻrta qalʼa ovulidan kelgan sportchi Zuhra Shomurodovalar egalladilar.

Sportning stritbol turi boʻyicha musobaqalarda esa 19-sonli maktab jamoasi 1-oʻrinni, 2-3-oʻrinlarni sport maktabi jamoalari egallashdi.

Sportning gimnastrada turida 6 ta jamoa ishtirok etib, musobaqa yakunida 1-oʻrin 1- maktabgacha taʼlim tashkiloti jamoasiga, 2-oʻrin 42-sonli va 3-oʻrin 13- maktabgacha taʼlim tashkilotlari jamoalariga nasib etdi.

7-mart kuni qizgʻin bahslarga boy oʻtgan mini-futbol musobaqalarida jami 9 ta jamoa qatnashdi. Unda sport maktabi jamoasi 1-oʻrinni, 35-sonli maktab jamoasi 2-oʻrinni, 41-sonli maktab jamoasi esa 3-oʻrinni egalladilar.

16 yoshli oʻsmir qizlar ishtirokidagi sportning milliy kurash turi boʻyicha 52 kg. vazn toifasida Durdona Bayramguliyeva 1-oʻrinni, Guloyim Safarboyeva 2-oʻrinni, Dilfuza Xidirboyeva va Mohira Gurbanguliyevalar 3-oʻrinni egallashdi.

Shuningdek, 63 kg. vazn toifasida 1-oʻrin Iroda Ibragimovaga, 2-oʻrin Dilnura Rahimboyevaga nasib etdi, Zebo Davletova va Umida Abdullayevalar 3-oʻrin sohibalari boʻlishdi.

“Ayollar sport haftaligi” yakunida gʻolib jamoalar va sportchilar hamkor tashkilotlar tomonidan munosib taqdirlandilar.

Robiya YOʻLDOShEVA