QRIM-KONGO GEMORRAGIK ISITMA TARQALIShINING OLDINI OLISh BOʻYIChA KOʻRGAZMALI MAXSUS-TAKTIK OʻQUV MAShQI OʻTKAZILDI

“Aholi oʻrtasida Qrim-Kongo gemorragik isitma tarqalishining oldini olish tadbirlarida Favqulodda vaziyatlar davlat quyi tuzilmasi xizmatlarining hamkorlikdagi harakatlari” mavzusida Amudaryo tumanida koʻrgazmali maxsus-taktik oʻquv mashqi tashkil etildi.

24-mart kuni boʻlib oʻtgan oʻquv mashqlari tadbiri ikki qismda, yaʼni nazariy va amaliy turlarda oʻtkazildi. Maxsus-taktik oʻquv mashqida tuman Favqulodda vaziyatlar boʻlimining Favqulodda vaziyatlar davlat tizimi va fuqaro muhofazasi faoliyatini tashkil etish, xavfsizlik targʻiboti boʻlinmasi boshligʻi kapitan Bekzod Tajiboyev, inspektori leytenant Hasan Hayitboyev, Tibbiyot birlashmasidan yuqumli kasalliklar boʻlimi shifokori Farhod Qoʻshmanov, Sanitariya-epidemiologik osoyishtalik va jamoat salomatligi boʻlimi mudiri Gulshod Tojiboyevalar qatnashishdi.

Nazariy qismda Gulzor mahalla fuqarolar yigʻini binosining majlislar zalida seminar oʻtkazildi. Seminarni tuman hokimi oʻrinbosari Nodir Kamolov ochib berdi va olib bordi. Seminarda tuman Tibbiyot birlashmasi, Sanitariya-epidemiologik osoyishtalik va jamoat salomatligi, Veterinariya va chorvachilikni rivojlantirish boʻlimlarining mutasaddi xodimlari hamda mahalla fuqarolar yigʻinlari va boshqa tashkilotlar xodimlari ham ishtirok etishdi.

 Seminar davomida tuman Sanitariya-epidemiologik osoyishtalik va jamoat salomatligi boʻlimining Epidemilogiya boʻlimi mudiri Gulshod Tojiboyeva “Qrim-Kongo gemorragik isitma kasalligining etiologiyasi, epidemiologiyasi, klinikasi va profilaktikasi”, tuman Veterinariya va chorvachilikni rivojlantirish boʻlimi boshligʻi oʻrinbosari Tursunboy Abdullayev “Qrim-Kongo gemorragik isitma kasalligning epizootologiyasi, kasallik profilaktikasi va oʻchoqda olib boriladigan dezinfektsiya va dezinsektsiya ishlari toʻgʻrisida”, tuman Tibbiyot birlashmasining yuqumli kasalliklar boʻlimi shifokori Farhod Qoʻshmanov “Qrim-Kongo gemorragik isitma kasalligining diagnostikasi, klinikasi va davolash usullari haqida” mavzularida maʼruza qildilar.

Shundan soʻng, oʻquv mashqining amaliy qismi 4 bosqichda oʻtkazildi. Birinchi bosqichda tuman Tibbiyot birlashmasiga “Qrim-Kongo gemorragik isitma kasalligiga gumon qilingan bemorni aniqlash, epid anamnez yigʻish, bemorni alohidalash, tezkor xabarnoma berish, tashxis qoʻyish va gumonli bemorni yuqumli kasalliklar shifoxonasi izolyator xonasiga yotqizish tartibi amaliy harakatlar bilan koʻrsatib berildi.

Ikkinchi bosqichda tumanda Sanitariya-epidemiologik osoyishtalik va jamoat salomatligi boʻlimi, Tibbiyot birlashmasi xodimlarining epidemiologik va epizootologik surishtiruv ishlarini oʻtkazish va aholi orasida targʻibot-tashviqot tadbirlari hamda tushuntirish ishlarini olib borish tartibi bajarildi. Uchinchi bosqichda tuman Tibbiyot birlashmasining yuqumli kasalliklar boʻlimiga borgan holda Qrim-Kongo gemorragik isitma kasalligiga gumon qilingan bemorni alohidalash, davolash, parvarishlash harakatlarini olib borish tartibi koʻrsatildi.

Toʻrtinchi bosqichda tuman Veterinariya boʻlimi tomonidan kasallik tarqalgan oʻchoqda profilaktik chora-tadbirlar oʻtkazildi. Dezinfektsiya, dezinsektsiya qilish tartibi koʻrsatib berilib, uni bartaraf etish harakatlari amalda bajarildi.

Oʻtkazilgan maxsus-taktik oʻquv mashqiga jami 112 nafar kishi va 10 ta maxsus texnika jalb etildi.

Koʻrgazmali maxsus-taktik oʻquv mashqi yakunida Favqulodda vaziyatlarning oldini olish va ularni bartaraf etish davlat tizimi Amudaryo tumani boʻgʻiniga kiruvchi xizmatlari favqulodda vaziyatlar yuzaga kelganda ularni bartaraf etishga tayyor deb baholandi.

B.Tajiboyev, tuman FVB boʻlinma boshligʻi.