YaNGI OʻZBEKISTON VA YaNGI QORAQALPOGʻISTONNI BIRGALIKDA QURIShDA YaNGILANAYoTGAN KONSTITUTsIYa MUHIM AHAMIYaT KASB ETADI

Maʼlumki, “Oʻzbekiston Respublikasining Konstitutsiyasiga oʻzgartish va qoʻshimchalar kiritish toʻgʻrisida”gi eʼlon qilingan qonun loyihasi umumxalq muhokamasidan oʻtkaziladi. Fuqarolar tomonidan bildirilgan fikr va mulohazalar asosida Qonunchilik palatasi tomonidan takomiliga yetkaziladi. Keyin esa mazkur loyiha Oʻzbekiston Respublikasi referendumiga qoʻyilib, fuqarolarimiz erkin ovoz berish orqali oʻzlarining bu masala boʻyicha xohish-irodasini ifoda etadi. Shundan keyingina Oʻzbekiston Respublikasining Konstitutsiyasiga kiritilayotgan oʻzgartish va qoʻshimchalar qonuniy tusga kiradi.

Konstitutsiyaviy islohotlar Vatanimizning bugungi va kelajak hayoti uchun gʻoyat muhim masala boʻlgani sababli, muhokamalarda koʻpmillatli xalqimiz tomonidan koʻplab taklif va tavsiyalar berildi. Shu qatori Qoraqalpogʻiston Respublikasi aholisi koʻtargan barcha takliflar ushbu Konstitutsiya loyihasida har tomonlama inobatga olindi. Hududning oʻziga xos etnik, madaniy xususiyatlari, milliy urf-odat va qadriyatlari, alohida huquqiy maqomini eʼtiborga olib yangilanayotgan Konstitutsiyada Qoraqalpogʻistonning davlat tuzilishi va siyosiy tizimi bilan bogʻliq birorta modda oʻzgarmadi.

Shu bilan birga, Konstitutsiyaning butun matni yangilanayotganligini inobatga olib, faqat moddalarning tartib raqami oʻzgargan xolos. Oldingi 70-75-moddalar loyihada tegishinchi 85-90-moddalar sifatida keltirilmoqda. Chunki, Konstitutsiyaning moddalari 27 taga koʻpaymoqda, hozirda 155 tani tashkil qilmoqda.

Yangilanayotgan Asosiy Qomusimiz loyihasida Orolboʻyi masalasi Konstitutsiya darajasiga olib chiqilgani nafaqat shu hududda yashovchi fuqarolar, balki butun Oʻzbekiston aholisi uchun muhim ahamiyatga ega. Yangilanayotgan Konstitutsiyaga koʻra endilikda Orolboʻyi mintaqasining ekologik tizimini muhofaza qilish hamda tiklash, mintaqani ijtimoiy va iqtisodiy jihatdan rivojlantirish yuzasidan choralar koʻrish davlat ahamiyatidagi yanada muhim masala sifatida mustahkamlanadi.

Qisqacha aytiladigan boʻlsa, Yangi Oʻzbekiston va Yangi Qoraqalpogʻistonni birgalikda qurishda, shu yurt hududi har jihatdan rivoj topishida, aholisi farvon  hayot kechirishida ushbu Yangilanayotgan Konstitutsiya muhim ahamiyat kasb etadi.

Q.Atamuradov, Fuqarolik ishlari boʻyicha Amudaryo sudi raisi