Konstitutsiyaviy Qonun loyihasi targʻibotiga bagʻishlangan tadbir boʻlib oʻtdi

Mamlakatimizning ijtimoiy-siyosiy hayotidagi muhim voqea – umumxalq Referendumiga ham sanoqli kunlar qolmoqda. 30-aprel kuni “Oʻzbekiston Respublikasi Konstitutsiyasi toʻgʻrisida”gi Oʻzbekiston Respublikasi Konstitutsiyaviy Qonuni umumxalq referendumida ovozga qoʻyiladi. Mana shu muhim jarayonning ahamiyati va yangi tahrirdagi Konstitutsiya loyihasining mazmun-mohiyatini aholiga keng tarzda tushuntirish maqsadida targʻibot tadbirlari olib borilmoqda.

Yaqinda Oliy Majlis Qonunchilik palatasi deputati Zumrad Bekatova hamda respublika targʻibot guruhi azolari Amudaryo tumanining Amur Temur nomli ovul fuqarolar yigʻinida aholi bilan uchrashuv oʻtkazdilar. Uchrashuvda Konstitutsiyaviy Qonun loyihasini koʻp millatli xalqimizning takliflari asosida shakllantirilgani, umumxalq muhokamasida kelib tushgan takliflarning 60 foizdan ortigʻi bevosita yoshlar tomonidan bildirilgani alohida taʼkidlandi.

Amaldagi qonunchilikka koʻra, parlamentning oʻzi ham Konstitutsiyaga oʻzgartish kiritish vakolatiga ega ekanligini, lekin konstitutsiyaviy islohot fuqarolar fikri va qoʻllab-quvvatlashi asosida referendum orqali amalga oshirilsa, haqiqiy xalq Konstitutsiyasi boʻlishi eʼtirof etildi.

Barchaga maʼlumki, 2021-yil 6-noyabr kuni Oʻzbekiston Respublikasi Prezidentining oʻz lavozimiga kirishishiga bagʻishlangan tantanali marosimdagi nutqida senator va deputatlar, keng jamoatchilik, xalq bilan maslahat qilib, jahon konstitutsiyaviy tajribasini oʻrganib, puxta oʻylagan holda bugungi va kelgusi taraqqiyotimizni belgilab beradigan asosiy qonunimizni takomillashtirish masalasini koʻrib chiqish kerakligini taʼkidlagan edi.

Oradan bir yarim yilga yaqin vaqt oʻtdi. Mazkur muddat davomida Oliy Majlis palatalari kengashlarining qoʻshma qaroriga muvofiq, Oʻzbekiston Respublikasi Konstitutsiyasiga oʻzgartish va qoʻshimchalar kiritish yuzasidan takliflarni shakllantirish va tashkiliy chora-tadbirlarni amalga oshirish boʻyicha Konstitutsiyaviy komissiya tuzildi.

 Mutasaddilar tomonidan “Mening Konstitutsiyam” onlayn platformasi, call-markaz, pochta, jumladan, elektron pochta hamda telegram maxsus boti orqali taklif va mulohazalar yuborish uchun barcha imkoniyatlar yaratildi.

Yangi tahrirdagi Konstitutsiyaviy Qonun loyihasiga bagʻishlangan targʻibot tadbirida soʻzga chiqqan Oliy Majlis Qonunchilik palatasi deputati Zumrad Bekatova yangilanayotgan Konstitutsiyaning mazmun-mohiyatiga toʻxtalar ekan, keyingi yillarda mamlakatimizda aholining turmush sharoitlarini tubdan yaxshilash, ijtimoiy muammolarni adolatli hal etish, ayniqsa, insonni eʼzozlash, uning huquq va erkinliklarini taʼminlashga qaratilgan izchil islohotlar amalga oshirilayotganini taʼkidladi. Yangilanayotgan Konstitutsiyada ham jamiyatning barcha qatlamlari manfaatlari inobatga olingani, yaʼni eng avvalo inson manfaatini har narsadan ustun qoʻyishni maqsad qilingani aytib oʻtildi.

Jumladan, Bosh qomusimizda hech kim sudning qarorisiz va qonunga zid tarzda uy-joyidan mahrum etilishi mumkin emasligi, uy-joyidan mahrum etilgan mulkdorga uy-joyning qiymati hamda u koʻrgan zararning oʻrni qonunda nazarda tutilgan hollarda hamda bozor qiymatida qoplanishi kafolatlanmoqda.

Shu bilan birga, har kimning mehnati uchun hech qanday kamsitishlarsiz hamda mehnatga haq toʻlashning belgilangan eng kam miqdoridan kam boʻlmagan tarzda adolatli haq olish huquqi mustahkamlanmoqda.

Mazkur normaning Konstitutsiyada belgilanishi fuqarolarning ish haqlari miqdori shunchaki emas, aynan ularning munosib turmush kechirishini taʼminlashda, pirovard natijada aholi turmush darajasini yaxshilash va mamlakatimizda ijtimoiy adolatni ustuvor qadriyatga aylantirishda muhim ahamiyatga ega boʻladi.

 Tadbir ishtirokchilari Bosh Qonunimizda har bir shaxs oʻz himoyasi va manfaatini koʻrayotganligini aytib, uning mamlakatimiz izchil rivojlanishida tarixiy ahamiyat kasb etishini bildirdilar.

Tuman hokimligining Axborot xizmati.