BU YILGI HOSIL UChUN ASOSIY EKIN MAYDONLARI TAQSIMLANDI

Amudaryo tumanida sugʻoriladigan yerlarda qishloq xoʻjaligi ekinlari fermer xoʻjaliklari ixtisoslashuvi va takliflarini, ichki va tashqi bozor talablarini, hududlarning tabiiy iqlim sharoitini, suv bilan taʼminlanganlik darajasini, yer maydonlarining meliorativ holati va tuproq unumdorligi koʻrsatkichlarini hamda moddiy-texnika, mehnat va boshqa resurslar bilan taʼminlanganlik darajasini tahlil qilish orqali oqilona joylashtiriladi.

Tumanda 2023-yil hosili uchun ham asosiy yer maydonlariga gʻalla, paxta, sabzavot, kartoshka, poliz mahsulotlari, mosh, soya, kunjut, kun-gaboqar, ozuqa ekinlari ekilmoqda.

Shundan: gʻalla 7000,9, paxta 15608,4, sabzavot 904, kartoshka 300,7, poliz 559,3,  mosh 731,6, soya 270,6, kun-jut 981,6, kungaboqar 290,8, ozuqa ekinlari 2674,1 gektar yerga ekilmoqda. 

Shuningdek, yangi bedazor tashkil etish uchun 417,8,  yangi uzumzor va tutzor tashkil etish uchun 155,6  va boshqa ekin turlari uchun 23,6 gektar yer maydonlari ajratilgan.

Aholining qishloq xoʻjaligi mahsulotlarini yetishtirib, oilaviy daromadlarini oshirishi uchun 669 gektar yer maydonlari ajratildi. Shundan bugungi kungacha 451 lot, 317,7 gektar yer maydonlari ularga toʻliq ajratib berildi. Qolgan yer maydonlari esa auktsionga qoʻyildi.

Shu oʻrinda aytish kerakki, bu yerlarga "Bir mahalla – bir mahsulot" tamoyili asosida qishloq xoʻjaligi ekinlarini ekish ishlari amalga oshirilmoqda.

Undan tashqari, 2023-yil hosili uchun yerdan unumli foydalanish, muayyan muddat davomida almashlab ekish maqsadida ekinlardan boʻshagan yerlarning 522,1 gektariga sabzavot, 243,5 gektariga kuzgi kartoshka, 155 gektariga poliz mahsulotlari, 746,9 gektariga mosh, 209 gektariga kunjut, 82 gektariga kungaboqar, 139,2 gektariga sholi, va 1435,1 gektariga boshqa ozuqa ekinlari ekiladi.

Shu oʻrinda aytish kerakki, mamlakatimiz qishloq xoʻjaligi boʻyicha ulkan salohiyatga ega. Bozorlarimiz toʻkin, xalqimiz rizqi moʻl-koʻl boʻlishidan tortib, eksportdan qoʻshimcha daromad topishgacha boʻlgan juda koʻp masalalar shu yoʻnalish rivojiga bogʻliq.

Tumanimizning jonkuyar fermerlari, bobodehqonlari esa qishloq xoʻjaligida ilmiy asoslangan ishlab chiqarishni yoʻlga qoʻyish orqali oziq-ovqat xavfsizligini taʼminlab, eksport salohiyatini oshirish orqali aholi jon boshiga toʻgʻri keladigan mahsulotlar hajmini bir necha barobarga koʻpaytirish yoʻlida bor kuch va mehnatini safarbar qiladi.

Bahodir Qurboniyozov,

tuman Qishloq xoʻjaligi boʻlimi boshligʻi.