MADANIYaT VA SANʼAT XODIMLARI KUNI KENG NIShONLANDI

Butun dunyoda roʻy berayotgan globallashuv jarayoni aholidan sogʻlom dunyoqarashga, yuksak insoniy xislatlarga ega boʻlishni va chor-atrofida roʻy berayotgan voqea-hodisalarga oqilona munosabatda boʻlishni taqozo etmoqda.

Yurtdoshlarimizning, ayniqsa yoshlarning bunday yetuklikka erishishida madaniyat va sanʼat xodimlarining xizmati katta. Bu yoʻnalishdagi islohotlarning amalga oshirilishini jadallashtirishda sohaga qaratilayotgan eʼtibor va gʻamxoʻrlik muhim asos boʻlib xizmat qilayotir.

Yurtimizda 15-aprel – Oʻzbekiston Respublikasi Madaniyat va sanʼat xodimlari kuni sifatida nishonlanishi ham shu maqsadga xizmat qiladi.

Sana munosabati bilan yurtimizda madaniyat va sanʼat sohasini, oʻzbek milliy madaniyati va sanʼatini rivojlantirish, nufuzini yuksaltirish, yosh isteʼdod egalarining qobiliyati va salohiyatini roʻyobga chiqarishda fidoyilik qilayotgan soha xodimlari mehnati ulugʻlanadi, ularga hurmat-eʼtibor koʻrsatiladi.

15-aprel kuni Amudaryo tumani Madaniyat va turizm boʻlimida ham madaniyat va sanʼat xodimlari kuni keng nishonlandi. Shu munosabat bilan tashkillashtirilgan tadbirga soha xodimlari, uzoq yillar samarali mehnat qilib, hozirgi kunda keksalik gashtini surayotgan faxriylar, tumanimizdagi 9-sonli va 21-sonli Bolalar musiqa va sanʼat maktablari oʻqituvchilari, oʻquvchilari, sanʼat shinavandalari ishtirok etishdi.

Boʻlim maʼmuriy binosi tomoshalar zalida boʻlib oʻtgan bayram tantanasida tuman hokimi Sultonboy Yoʻldoshev ishtirok etib, madaniyat va sanʼat xodimlarini kasb bayrami bilan qizgʻin tabrikladi va kelgusida el-xalqimizga milliy sanʼatimizni keng targʻib etishda, namoyish etishda ulkan muvaffaqiyatlar tiladi.

Tumanimizda sanʼatning barcha turlari boʻyicha ham yorqin isteʼdodga ega, iqtidorli yoshlar koʻp. Ularning isteʼdodini yuzaga chiqarishda, yuksaltirishda beminnat ustozlik qilayotgan taniqli soha xodimlari, talantli yoshlardan 17 nafarini tuman hokimi Sultonboy Yoʻldoshev qimmatbaho sovgʻalar va tashakkurnomalar bilan taqdirladi, shuningdek faxriylarga ham sovgʻalar berdi.

Tantanali tadbir kuy-qoʻshiqlar, jozibali raqslar bilan davom etdi. Ayniqsa yosh isteʼdod egalari Guliraʼno Oʻrinboyeva, Gulnoza Gulmanovalarning ijro etgan raqslar barchani oʻyin davrasiga chorladi.

Tadbir tugagach, soha xodimlari uchun iftixorlik tashkil etildi. Toʻkin dasturxon atrofida madaniyat va sanʼat xodimlari dildan suhbatlashib, iftorlik qildilar, yurtimizda gunohlardan poklanish va magʻfirat oyi hisoblanmish Ramazon oyiga yetkazganiga, mehnatlari yuksak eʼtirof etilayotganiga shukronalar aytdilar.

Bayram munosabati bilan tashkillashtirilgan buningdek tadbir madaniyat va sanʼat xodimlariga yana kuch-gʻayrat, unumli ishlashga ragʻbat uygʻotdi.

Aytish joizki, keyingi yillarda madaniyat va sanʼatni rivojlantirish, uning hayotimizdagi oʻrni va ahamiyatini oshirish, shu asosda yosh avlodni milliy va umuminsoniy qadriyatlar, yurtimizga mehr va sadoqat ruhida tarbiyalashga eʼtibor kuchaymoqda.

Bu albatta, kelgusida xalqimizga madaniy xizmat koʻrsatish sifati oshishiga, boʻsh vaqtlarida koʻngilli dam olib, maʼnaviyati yuksalishiga zamin boʻladi.

O.RAJABOVA.