ChOYKOʻLLIK KITOBXON YoShLAR UChUN “KITOBLAR KARVONI” TADBIRI OʻTKAZILDI

Yaxshi kitob – bamisoli javohirot sandigʻi. Undan bahramand boʻlgan sari insonning qalbi yangilanadi, ezgu ishlar qilmoqqa shaylanadi. Yuragidagi gʻubor tarqab, tugunlar yoziladi. Shuning uchun ham kitobxon inson bilan kitob oʻqimagan inson oʻrtasida yer bilan osmoncha farq bor. Kitobxon inson oʻz dunyoqarashining kengligi, fikrining teranligi bilan boshqalardan ajralib turadi. Prezidentimiz yoshlar maʼnaviyatini yuksaltiruvchi beqiyos qudratli kuch – kitob ekanligini tez-tez takrorlab turishlari bejiz emas. Chunki kitob mutolaasi yoshlar maʼnaviyatini yuksaltiribgina qolmay, ularning hayotda toʻgʻri yoʻl tanlashlarida muhim ahamiyatga ega.

“Mening oilam” gazetasi tahririyati ijodiy jamoasi tomonidan bu borada keng qamrovli tadbirlar amalga oshirilmoqda. Tahririyatning “Besh muhim tashabbus – yoshlarga qanot” mavzusidagi grant loyihasi doirasida barcha toifadagi yoshlar oʻrtasida kitobxonlikni keng targʻib qilish maqsadida joylarda tashkil etilayotgan uchrashuvlar, davra suhbatlari, koʻrik-tanlovlar, samimiy muloqot tadbirlariga nogironligi boʻlgan oʻquvchi-yoshlar ham qamrab olinayotgani oʻzining ijobiy samarasini bermoqda.

Ana shunday tadbirlardan biri joriy yilning 12-may sanasida Choykoʻl ovuli hududidagi 22-sonli umumtaʼlim maktabida boʻlib oʻtdi. Prezidentimiz tomonidan ilgari surilgan besh muhim tashabbusning toʻrtinchisi aynan yoshlar kitobxonligini rivojlantirishga qaratilgani choykoʻllik yoshlar hayotida ham oʻz aksini topmoqda. Bugungi kunda ovul hududidagi 3 ta umumtaʼlim maktablarida taʼlim-tarbiya olayotgan oʻquvchi-yoshlarning kitob mutolaasi uchun vaqt ajratishlariga yetarli shart-sharoit mavjud. Chunki hududdagi umumtaʼlim maktablari, shuningdek, Choykoʻl madaniyat markazida kutubxonalar faoliyati yoʻlga qoʻyilgan. 22-sonli maktab kutubxonasi esa doimo yosh kitobxonlar bilan gavjum boʻladi. Mazkur kutubxonada faoliyat olib boruvchi Shahnoza Yendirboyeva har bir kitobxon bilan, ayniqsa, nogironligi bor boʻlgan oʻquvchi-yoshlar bilan turli mavzularda suhbatlar olib boradi, kitobxon oʻquvchilarni qiziqtirgan savollarga javob beradi. Salkam 500 nafar aʼzosi boʻlgan maktab kutubxonasi bugungi kunda haqiqiy maʼnaviyat maskaniga aylangan.

“Besh muhim tashabbus – yoshlarga qanot” mavzusidagi grant loyihasi doirasidagi “Kitoblar karvoni” tadbirida “Jayxun ilhomlari” NNT raisi, Oʻzbekiston Jurnalistlari ijodiy Uyushmasi aʼzosi Oʻrozali Reyimov NNT huzuridagi kutubxonaga olib kelingan yangi adabiyotlar koʻrgazmasini tashkil etdi. Tadbirda 22-sonli maktab direktori Azimjon Bekberganov, “Mening oilam” gazetasi maxsus muxbiri, “Besh muhim tashabbus – yoshlarga qanot” loyihasi koordinatori Robiya Yoʻldoshevalar ishtirok etishib, nogironligi boʻlgan yoshlarni qoʻllab-quvvatlash, ularning isteʼdodlarini yuzaga chiqarish borasida tahririyat ijodiy jamoasi tomonidan amalga oshirilayotgan maʼnaviy-maʼrifiy tadbirlarning mazmun-mohiyati va ulardan kutilayotgan natijalar xususida soʻz yuritdilar.

Bugungi kunda 600 dan ortiq kitob jamgʻarmasiga ega boʻlgan “Jayxun ilhomlari” NNT kutubxonasining koʻchma “Kitoblar karvoni” tadbiri choykoʻllik yoshlar uchun yanada qiziqarli adabiyotlar bilan tanishish imkonini yaratdi. Yosh kitobxonlar “Kitoblar karvoni” koʻrgazmasi orqali taqdim etilgan asarlarni qiziqish bilan varaqlab, albatta “Jayxun ilhomlari” NNT kutubxonasiga aʼzo boʻlish istagini beldirdilar. Nogironligi boʻlgan kitobxon yoshlarning oʻzlari yoqtirgan asarlarni mutolaa qilishlariga sharoit yaratish maqsadida hududdagi maktablarning ijodiy-madaniy masalalar boʻyicha targʻibotchilari alohida roʻyxat tuzish orqali bunday toifadagi kitobxon yoshlarni qoʻllab-quvvatlash va albatta ular xohlagan badiiy adabiyotlarni beminnat yetkazib berishni yoʻlga qoʻyishlarini bildirdilar.

Kitob – moʻʼjizalar olami. Kitobxon ana shu moʻʼjizalar olamiga kirgan sari zakovatli, har qanday vaziyatda fikrini erkin ifoda etaoladigan shaxs sifatida kamol topadi. Choykoʻllik yoshlar uchun tashkil etilgan “Kitoblar karvoni” tadbiri aynan ana shunday zakovatli insonlarni kamol toptirishga qaratilgani bilan muhim ahamiyat kasb etdi.

Tadbir davomida kitobxon yoshlar oʻzlari sevib oʻqigan badiiy asarlar qahramonlari hayotidan olgan taassurotlari haqida toʻlqinlanib soʻzladilar. Sheʼrlar aytishib, oʻzlarini qiziqtirgan savollarni berdilar. Kitobxon yoshlar bilan “Mening oilam” gazetasi tahririyati ijodkorlari, shuningdek, “Jayxun ilhomlari” NNT raisi, Oʻzbekiston Jurnalistlari ijodiy Uyushmasi aʼzosi, shoir Oʻrozali Reyimovlar samimiy muloqotda boʻldilar va kitobxon yoshlarning barcha savollariga javoblar berdilar.

Ravshan BAHROMOV, Mahmudjon ShOMURODOV.