NUKUS ShAHRIDAGI IXTISOSLAShTIRILGAN SANʼAT MAKTAB-INTERNATINING KOʻRGAZMALI TADBIRI OʻTKAZILDI
Amudaryo tumanidagi “Barkamol avlod” bolalar maktabida Qoraqalpogʻiston Respublikasi ixtisoslashtirilgan sanʼat maktab-internati tomonidan oʻquvchilarni oʻqishga jalb etishga qaratilgan koʻrgazmali tadbir oʻtkazildi.
12-may kuni boʻlib oʻtgan ushbu tadbirda mazkur maktab-internat oʻqituvchilari Bayram Nurimbetov, Bahodir Turkmenboyevlar, tumandagi “Barkamol avlod” bolalar maktabi direktori Xonimjon Rajabovalar ishtirok etishdi. Shuningdek, tumandagi umutaʼlim maktablarining maʼnaviy-maʼrifiy masalalar boʻyicha oʻrinbosarlari, oʻqituvchilar va oʻquvchilar ham tashrif buyurishdi.
Tadbir davomida maktab-internat oʻqituvchilari oʻquv maskanida kelasi oʻquv yilida tashkil etiladigan yoʻnalishlar toʻgʻrisida maʼlumotlar berishdi. Taʼlim dargohida koʻp asrlik tarixga ega xalqimizning milliy qadriyatlari, sanʼatini davom ettirish va yangilash, shuningdek, iqtidorlarini yuzaga chiqarishlariga imkoniyat va sharoitlar yaratilganini aytib oʻtishdi.
Taʼkidlanganidek, mazkur maktab-internatda taʼlim olib kelayotgan oʻquvchi-yoshlar Respublika va xalqaro miqyosda oʻtkazilib kelinayotgan turli tanlovlarda faol qatnashib kelmoqda va oʻz iqtidorlarini namoyish etib, faxrli oʻrinlarni qoʻlga kiritib kelishmoqda.
Oʻtgan yili iqtidorli yoshlar koʻrik-tanlovida maktab-internat oʻquvchisi Rayhon Navroʻzboyeva gʻolib boʻldi va oliy oʻquv yurtiga kirish imtiyozini beruvchi sertifikatga ega boʻldi. Ikki nafar oʻquvchi esa chet tili fanidan V2 darajali sertifikatni olishga muyassar boʻlishdi.
Joriy yilda oʻtkazilgan anʼanaviy xalqaro rassomlik va sanʼat festivalida maktab-internat oʻquvchilari 1-, 2-, 3-oʻrinlarni egallab, oltin, kumush, bronza medallar va 100 nafardan ziyod oʻquvchi diplom hamda sertifikatlarga ega boʻlishdi.
Maktab-internatda olis hududlar va tumanlardan keladigan bolalar uchun yotoqxona, 4 mahal ovqat berilishini, shuningdek oʻquv xonalarida ham zamonaviy axborot-texnologiyalarida mashgʻulotlar oʻtish uchun sharoitlar yaratilgani toʻgʻrisida maʼlumotlar berildi. Maktab-internatda rangtasvir, liboslar dizayneri, interer dizayneri, kulolchilik, gilam toʻquvchisi, kashtachilik, yogʻoch oʻymakorligi ustasi kabi yoʻnalishlarda oʻquv mashgʻulotlari tashkil etilgani va maktabni tugatgan 11-sinf oʻquvchilariga tugatgan yoʻnalishlari boʻyicha davlat namunasidagi oʻrta-maxsus maʼlumotli mutaxassislik diplomi berilishini ham aytib oʻtildi.
Tadbirda maktab-internat oʻqituvchilari Bayram Nurimbetov, Bahodir Turkmenboyevlar tasviriy sanʼat boʻyicha mahorat darsini oʻtishdi. Mashgʻulot davomida yangi pedagogik texnologiyalardan foydalanish samarasi, dars samaradorligini oshirish kabilar toʻgʻrisida maʼlumotlar berildi.
Shundan soʻng, oʻquvchilar oʻrtasida rasmlar tanlovi oʻtkazildi. Tanlovda “Barkamol avlod” bolalar maktabi va umumtaʼlim maktablari oʻquvchilari faol ishtirok etib, oʻz iqtidorlarini, ranglardan mohirona foydalana bilishlarini, ustozlaridan oʻrgangan mahoratlarini koʻrsatishdi.
Tanlov yakunida “Barkamol avlod” bolalar maktabining 1-sonli umumtaʼlim maktabida tashkil etilgan “Tasviriy sanʼat” toʻgaragi oʻquvchisi Maftuna Nurimbetova 1-oʻrinni qoʻlga kiritdi va Qoraqalpogʻiston Respublikasi ixtisoslashtirilgan sanʼat maktab-internatiga imtihonsiz qabul qilinish imkoniyatiga ega boʻldi. Tanlovning barcha gʻoliblariga tashkilotchilar tomonidan faxriy yorliq va sovgʻalar topshirildi.
Tadbir yakunida maktab-internat oʻqituvchilari tumandagi maktablar oʻqituvchi va oʻquvchilarini oʻquv dargohida yaratilgan sharoitlar va imkoniyatlar bilan yanada yaqinroq tanishish uchun shu oyda boʻlib oʻtadigan “Ochiq eshiklar kuni” tadbiriga taklif etishdi.
O.Xudoyberganova
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
