DORBOZ TOʻRABOY EShChANOVNING 80 YoShLIK YuBILEYI NIShONLANDI

Sanʼat fidoyilikni talab qiladi. Oʻz ustida tinmay ishlagan, mashaqqatlardan choʻchimay izlangan, tinimsiz mashqlar davomida mahoratini yuksaltirgan va eliga xolis xizmat qilgan sanʼatkorlar haqiqiy fidoyilar, deya olamiz.

Amudaryo tumanida dorbozlik sanʼatiga asos solgan, iqtidorli dorbozlarni tarbiyalab voyaga yetkazgan, sakson yoshida ham dor ustida turli tomoshalar namoyish etib, xalqimizning eʼtirofiga sazovor boʻlayotgan Toʻraboy dorboz Eshchonov ana shunday insonlar toifasidan desak, adashmagan boʻlamiz.

Toʻraboy Eshchanov shu yil 18-aprelda tabarruk sakson yoshini qarshi oldi. Amudaryo tumani Madaniyat va turizm boʻlimi tashabbusi bilan boʻlim tomoshalar zalida sakson yoshida ham sanʼatdan qoʻlini uzmay, dor ustida tomoshalar koʻrsatib kelayotgan taniqli dorboz boboning qutlugʻ yoshi munosabati bilan yubiley kechasi tashkil etildi.

Toʻraboy Eshchonov 1943-yilda Mangʻit shahriga tutash Oʻrta qalʼa ovulining Yusufxoʻja aholi punktida dunyoga kelgan. 1-sonli maktabda 10-sinfni tugatib, Oʻzbekiston Davlat Jismoniy tarbiya institutida oʻqigan va oliygohni tugatib, dastlab 4-sonli maktabda jismoniy tarbiya fani oʻqituvchisi boʻlib mehnat faoliyatini boshlagan.

Harbiy xizmat burchini oʻtash chogʻida u tsirk sanʼati ishqibozi boʻlgan dogʻistonlik yigit bilan doʻstlashishi, undagi bu sohaga boʻlgan qiziqish yanada kuchayishiga sabab boʻlgan. Jismoniy tarbiya bilan muntazam shugʻullanib, turli tryuklar ijro qilib yurgani unga bu borada juda qoʻl kelgan.

Armiyadan qaytgach, Toʻraboy Eshchanov Chimboy tumanidagi tsirk jamoasiga qoʻshilib, dorbozlik oʻyinlarini koʻrsatib, oʻz iqtidorini rivojlantirib kelgan. Keyinchalik Toʻraboy dorboz nomi bilan tanilib, tumanimizda oʻzi “Jayxun dorbozlari” tsirk jamoasini tashkil etdi. Ushbu guruh Toʻraboy dorboz koʻmagida tsirk sanʼatiga qiziquvchi, tosh koʻtaruvchi polvon, illyuzionist, masxaraboz, surnaychi kabi iqtidorli yoshlarni birlashtirib, katta sahnalarda oʻz sanʼatini namoyish etdi va xalqimizning haqli eʼtiroflariga sazovor boʻldi.

Guruh aʼzolarining oʻz ustlarida ishlab, tomoshalarini boyitib borganlari tufayli Oʻzbekiston miqyosida havaskor tsirk jamoalari oʻrtasida oʻtkazilgan turli festivallarda, koʻrik-tanlovlarda chiqishlari yuqori baholangan.

“Tabarruk yoshingiz muborak” deb nomlangan yubiley kechasida tuman hokimligi masʼullari, ustoz dorbozning shogirdlari, doʻstlari, yaqinlari masʼullari, madaniyat va turizm sohasi xodimlari, sanʼat shinavandalari va keng jamoatchilik vakillari ishtirok etdilar.

Tadbirni tuman hokimligi kotibiyati mudiri Mansur Oʻrozboyev ochdi va yubilyarni qizgʻin qutlab, unga tuman hokimligi tomonidan “Faxriy yorliq” va sovgʻalar topshirdi.

Taniqli sanʼatkorni qutlagani kelgan Qoraqalpogʻiston Respublikasi Madaniyat va turizm vazirligi xodimi Shuhrat Yoʻldoshevning samimiy tilaklari barchani toʻlqinlantirdi. Shuningdek, madaniyat va sanʼat xodimlari, Toʻraboy Eshchanovning maslakdosh shogirdlari, doʻstlari, yaqinlari tabriklaridan soʻng tumanimiz sanʼatkorlari ijrosida kontsert namoyish etildi.

Otaxon dorboz Toʻraboy Eshchanov oʻziga koʻrsatilayotgan buningdek ehtirom uchun tuman hokimligiga, tuman Madaniyat va turizm boʻlimi maʼmuriyatiga, barcha sanʼat shinavandalariga chuqur minnatdorchilik bildirdi.

Yurtimizda inson qadri ulugʻ, mehr-oqibat mustahkam ekanligi yaqqol namoyon boʻlgan tadbir barchada ulkan taassurotlar qoldirdi.

Oygul RAJABOVA.