50-yildan keyingi diydor va yoshlik xotiralari

Vaqt shiddati va tirikchilik tashvishlari inson hayotida koʻp narsalarni oʻzgartiradi. Ammo yoshlik xotiralari, ayniqsa maktab davri bilan bogʻliq xotiralar qalbda abadiy muhrlanib qoladi. U insonni oʻtmishga yetaklab, oʻsha begʻubor davrlarni yana bir bor his etish imkonini beradi.

19-iyul sanasi Amudaryo tumanining Bobur nomli ovulidagi 6-sonli, sobiq Maksim Gorkiy nomli maktabning 1975-yilgi bitiruvchilari uchun ham xuddi shunday unutilmas kun boʻldi. Ular oradan yarim asr – 50-yil oʻtib, yana oʻzlari tahsil olgan jonajon maktabi binosida jam boʻlishdi. Bu uchrashuv nafaqat oʻtgan kunlarni yodga olish, balki doʻstlik rishtalarini mustahkamlash, ustozlarga boʻlgan chuqur hurmatni va sinfdoshlarga nisbatan cheksiz sogʻinch tuygʻularini namoyon etishda muhim vosita boʻldi. Diydorlashuv onlari har bir ishtirokchining qalbida chuqur iz qoldirdi va ularga yoshlikning eng goʻzal damlarini qaytadan his etish imkonini berdi.

Sinfdoshlar uchrashuvi maktab hovlisidan boshlandi. Tengdoshlar bir paytlar oʻzlari bilim olgan sinf xonalariga kirib, oʻquvchilik yillariga qaytgandek boʻlishdi. Har bir burchak, har bir devor ularga oʻsha davrlarni eslatib, yuraklarida iliq tuygʻular uygʻotdi. Maktab partalari, sinf doskasi, devorlardagi rasmlar – barchasi ularni olis oʻtmish tomon chorladi. Shu sabab boʻlsa kerak, sinfdoshlarning koʻzlarida quvonch yoshlari, yuzlarda tabassum va qalblarda cheksiz shukronalik tuygʻulari aks etdi.

Sinfdoshlar oʻzlariga taʼlim-tarbiya bergan, hayot yoʻlida toʻgʻri yoʻnalish koʻrsatgan maktabning sobiq direktori, marhum Sobir Gʻoipov, oʻqituvchilari Jumaboy Shomurotov, Qidirboy Janisbayev, Sagʻinboy Jumaboyev, Sobir Saparniyozov, Shomurod Qoʻchqorov, Bika Ismoilova, Oʻrozbika Davlatboyevalarni iliq xotiralar bilan yodga olishdi. Ularning nomlarini tilga olar ekanlar, har bir sinfdoshning koʻz oʻngida aziz ustozlarining muborak siymosi gavdalandi. Bu xotiralar ularning qalbida abadiy yashaydi va ustozlarning mehnati hech qachon unutilmaydi.

Uchrashuvga nuroniy yoshida keksalik gashtini surayotgan ustozlari Qodir Qutliboyev, Qoʻchqor Rahimov, Gulora Rahimovalar ham taklif etildi. Sinfdoshlar ularning duolarini olib, maktab davridagi oʻquvchilik yillarini birgalikda esladilar. Ustozlarning har bir soʻzi, har bir nasihati sinfdoshlar uchun maʼnaviy ozuqa boʻldi, ularning hikoyalari, hazil-mutoyibalari qalblarni yoritdi. Bunday diydorlashuvlar oʻtmish va bugungi kun oʻrtasida koʻprik vazifasini oʻtab, avlodlar oʻrtasidagi uzviylikni taʼminlaydi.

Afsuski, 1975-yilda maktabni tamomlagan 74 nafar oʻquvchidan bugungi kunda 21 nafari oramizda yoʻq. Ularning xotirasi ham sinfdoshlar qalbida mangu yashaydi. Uchrashuv davomida Qurʼon tilovat qilinib, oʻtganlarning porloq xotiralari yod etildi.

Tadbirning davomi Jumurtov ovulidagi choyxonalardan birida davom etdi. U yerda sinfdoshlar yanada erkin muhitda suhbatlashib, bir-birlarining hayotlaridagi yangiliklar bilan oʻrtoqlashdilar. Oʻyin-kulgu va raqslar uzoq davom etib, sinfdoshlar diydor onlarining esda qolarli oʻtishiga yordam berdi. Hayot, doʻstlik va birdamlik haqida yangragan kuy-qoʻshiqlar, shoʻx raqslar uchrashuvga yanada fayz bagʻishladi.

50-yildan keyingi diydor onlari bolalik, oʻsmirlik va yoshlik yillarini birlikga oʻtkazgan, bugun har biri nuroniy otaxon va onaxon boʻlib, farzandlari, nevara-chevaralari qurshovida yashayotgan sinfdoshlarga cheksiz ruhiy va maʼnaviy quvvat bagʻishladi.

Sinfdoshlar uchrashuvni tashkil qilgan doʻstlari Oʻrolboy Rahimov, Tajimurod Oʻtaboyev, Sotimboy Samandarov, Sharifa Sadaddinova va Jumaboy Tajiboyevlarga chuqur minnatdorchilik bildirdilar.

Chindan ham, maktab – bu shunchaki bilim maskani emas, balki insonning shaxs sifatida shakllanishida muhim rol oʻynaydigan, unga hayotda oʻz oʻrnini topishga yordam beradigan, bir umrlik doʻstlar orttirishga zamin yaratadigan muqaddas dargohdir. Bu uchrashuv ham maktabning inson hayotidagi oʻrni qanchalik beqiyos ekanligini yana bir bor isbotladi.