“BUYuK IMKONIYaT – YoRQIN KELAJAK” TARMOQLI MARKETING TIZIMI FAOLIYaTIGA BAGʻIShLANGAN SEMINAR-TRENING TAShKIL ETILDI

“Buyuk imkoniyat – yorqin kelajak” tarmoqli marketing savdo tizimida faoliyat yuritish boʻyicha seminar-trening va tizimda yuqori natijalarga erishgan liderlarni taqdirlash marosimi boʻlib oʻtdi.

Shu yil 20-may kuni tuman Madaniyat va turizm boʻlimining kontsertlar zalida boʻlib oʻtgan mazkur tadbirni “Buyuk imkon – yorqin kelajak” loyihasining oltin jamoasi sardorlari Minavar Sobirova hamda Gavhar Matyoqubovalar tashkil qildilar. Tadbirga kelgan mehmonlar, marketing tarmogʻi liderlari “Ofarin” folklor-etnografik xalq jamoasining karnay-surnay navolari ostida tantanali ravishda kutib olindi.

Aholi, ayniqsa, yoshlarning kitobxonlik va moliyaviy savodxonlik madaniyatini oshirish, ularni qoʻllab-quvvatlash maqsadida faoliyat olib borayotgan “Buyuk imkoniyat – yorqin kelajak” tarmoqli marketing savdo tizimi hamkorlarining ushbu tadbirida marketing asoschilari Rustam Mirzamatov va Alijon Isroilovlar ham ishtirok etishdi.

Soʻzga chiqqanlar ushbu savdo tizimi 2022-yildan oʻz faoliyatini boshlagani, loyiha asoschilari Alijon Isroilov va Rustam Mirzamatovlar onlayn usulda oʻzini oʻzi band qilish, daromad topish, shu bilan birga kitobxonlikni rivojlantirish kompaniyasini tashkil qilishgani va qisqa davr mobaynida samarali natijalarga erishilayotgani xususida maʼlumot berib oʻtdilar. Shuningdek, loyihaga koʻra jamoaviy tarzda kitob savdosini marketing usulida yoʻlga qoʻyish orqali oʻzini oʻzi band qilish, daromad topish va yutuqlarga erishish mumkinligi tushuntirildi. Ushbu loyihadagi marketing savdosidagi faoliyat davridagi imtiyozlar, ishlash tartibi haqida maʼlumotlar berildi. Loyiha boʻyicha marketing tizimida faoliyat yuritib kelayotganlar safida pensionerlar, imkoniyati cheklanganlar hamda turli tashkilotlarda xizmat qilib kelayotganlar borligi, hamjihatlikda ish olib borishayotgani haqida aytib oʻtishdi.

Taʼkidlanganidek, “Buyuk imkon – yorqin kelajak” loyihasining asosiy maqsadi Vazirlar Mahkamasining 2003-yil 13-fevraldagi qarori bilan tasdiqlangan «Oʻzbekiston Respublikasida chakana savdo qoidalariga kiritilayotgan qoʻshimchalar»ga asoslangan tarmoqli marketing yoʻnalishida biznes, shu yoʻnalishda ommaviy onlayn taqdimotlar, biznes-treninglar oʻtkazishdan iborat. Shuningdek, Vazirlar Mahkamasining 2020-yil 14-dekabrdagi qarorida koʻrsatilganidek, 2020-2025-yillarda kitobxonlik madaniyatini rivojlantirish va qoʻllab quvvatlash Milliy Dasturi asosida yoshlarning, aholining kitobxonlik va moliyaviy savodxonlik madaniyatini oshirish, oʻquv-seminarlar tashkil qilish, investitsiya yoʻnalishidagi video qoʻllanma va oʻquv darsliklari bilan taʼminlash kabilarga ham eʼtibor qaratiladi. Undan tashqari, fuqarolarni ushbu loyihada birga ishlashga taklif etish orqali kambagʻallikni qisqartirish, ishsizlikni bartaraf qilish va tobora avj olib borayotgan boqimandalik kayfiyatini yoʻqotishga koʻmaklashish ham koʻzlangan maqsadlardan biri hisoblanadi.

Tadbir davomida shu kabi maʼlumotlar berilganidan soʻng, “Buyuk imkoniyat – yorqin kelajak” savdo tizimi faoliyati tasvirlangan videorolik namoyish qilindi. Shuningdek, tadbir ishtirokchilari va qiziquvchilarning savollariga batafsil javoblar berib oʻtildi.

“Buyuk imkoniyat – yorqin kelajak” loyihasida, marketing savdo tizimida yuksak natijalarga erishgan faol liderlarni taqdirlash marosimi ham boʻlib oʻtdi. Marketing tarmogʻini rivojlantirishga oʻz hissalarini qoʻshgan va belgilangan bosqichlardan oʻtib, yuqori natijalarga erishgan liderlar sahnaga taklif etildi va ularga sertifikatlar topshirildi.

Tadbirda tuman Madaniyat va turizm boʻlimining sanʼatkorlari, xalq jamoalari, taniqli estrada xonandalari, raqs dastalari ishtirokida tayyorlagan kontsert dasturi namoyish etildi. Qiziqarli oʻtgan tadbir barchaga manzur boʻldi.

O.Xudoyberganova.