1-sonli maktabda “Kelajagimsan, farzandim!” nomli noananaviy majlis oʻtkazildi

Oila – farzand tugʻilgach, ilk koʻzini ochib dunyoni koʻradigan, olam ranglarini his qiladigan makon. Shu makonda norasidalarning axloqi, qobiliyati, aql-idroki, yurish-turishi, oʻzgalar bilan oʻzaro munosabatlari shakllanadi. Oilada ota-ona, farzandlar va boshqa yaqinlar birligi, oʻzaro hamjihatligi, mehr-oqibati yangi tugʻilgan goʻdak uchun saboq boʻladi. Bola quruq nasihat, yoʻl-yoʻriqlarga qaraganda koʻproq oilasida koʻrganlaridan saboq olib ulgʻayadi. Shu maʼnoda olib qaraydigan boʻlsak, kattalarning yosh bolalar oldidagi burch va masʼuliyati naqadar yuksak ekanligini anglash qiyin emas.

Inson yashar ekan albatta, baxtli-saodatli, tinch-xotirjam yashab, oʻzidan munosib avlodlar qoldirishni istaydi. Shu maqsad yoʻlida yelib-yuguradi, farzandini barkamol qilib voyaga yetkazishga intiladi. Bunda mahalla, taʼlim muassasi va oila hamkorligi muhim oʻrin tutadi. Oilada sogʻlom fikrli, axloqli qilib tarbiyalangan bolaning dunyoqarashi maktabda taʼlim olishi jarayonida yanada kengayadi, shuuri oydinlashadi va keng jamoatchilikda, mahallada buni namoyon qila oladi.

Barkamol avlod har bir ota-onaninggina emas, ularga taʼlim berayotgan ustoz-muallimlarning ham orzusidir. Axir qaysi oʻqituvchi shogirdlarining ezgu ishlar tufayli, ustozingga rahmat” degan olqishni olib yurishni istamaydi, deysiz?

Shu yil 20-may kuni Mangʻit shahridagi 1-sonli maktabda 8-A sinfi oʻquvchilarining ota-onalari bilan oʻtkazilgan “Kelajagimsan, farzandim!” nomli noananaviy majlis ham shu maqsadga qaratildi.

Majlisda maktab direktori, oʻrinbosarlari, oʻqituvchilar, sinf rahbari va oʻquvchilarning ota-onalari ishtirok etdilar.

Tadbirda dastlab mazkur sinf rahbari, qoraqalpoq tili oʻqituvchisi Aptabida Abdimuratova oʻquvchilarning dars mashgʻulotlarini chuqur oʻzlashtirishlariga erishish bilan bir qatorda, ularni munosib xulq-atvorli, bir-biriga sadoqatli doʻst, mehrli-oqibatli qilib tarbiyalash borasida qilayotgan ishlariga keng toʻxtaldi. Bu borada taʼlim muassasasi bilan ota-onalar hamkorligi ham juda zarur ekanligini taʼkiladi. Shu xususda ota-onalarning ham fikrlari tinglandi.

Shundan soʻng turli viktorinalar, qiziqarli oʻyinlar tashkil etildi. “Ota-onamga maktub” mavzusida oʻquvchilar sinf rahbari topshirigʻiga koʻra ota-onalariga yozgan maktublari egalariga topshirildi. Maktublarni oʻqish jarayoni juda hayajonli boʻldi. Chinki oʻgʻil-qizlar ota-onasi bilan oilada oʻzaro muomalada aytishga jazm etolmagan yo iymangan tilaklarini, fikrlarini maktubda izhor etgan etdilar. Maktublar oʻqib boʻlingach, oʻquvchilar ota-onalariga sovgʻalar hadya etishdi.

Shuningdek, oʻquv yili davomida aʼlo oʻqishi va namunali xulqi bilan boshqalarga oʻrnak boʻlgan oʻquvchilarning ota-onalariga maktab maʼmuriyati tomonidan tashakkurnomalar topshirildi.

Tadbir oʻquvchilarda ham, ularning ota-onalarida ham ulkan taassurotlar qoldirdi.

“Kelajagimsan, farzandim!” Bu shunchaki balandparvoz emas, har bir ota-onaning dilida jarang sochuvchi soʻzdir. Farzand kamoli yoʻlidagi har bir ezgu ish esa eʼtirofga sazovor. Shu boisdan ham noanaʼnaviy tadbir uchun ota-onalar Aptabida Abdumuratovaga chuqur minnatdorchilik bildirdilar va kelgusida ham taʼlim muassasasi bilan yaqindan hamkorlik qilishga vaʼda berdilar.

Oygul RAJABOVA.