QANGLI OVULIDA GRANT LOYIHASI DOIRASIDA “KOʻChMA KUTUBXONA” TADBIRI TAShKIL ETILDI

Kitobni bilimlar sarchashmasi deymiz. Darhaqiqat, bu chashmadan bilimga boʻlgan har qancha ehtiyoj, chanqoqlikni qondirish mumkin. Insonning eng yaqin maslahatchisi, doʻsti va bilimlar manbai boʻlgan kitob biz uchun juda qadrli. Maʼnaviyat va dunyoqarashni yuksaltiruvchi manbaa boʻlgan kitoblarni oʻqigan inson boshqalardan oʻzining yuksak tafakkuri, dunyoqarashi va fikrlashi bilan ajralib turadi. Shu bois yurtimizda kitobxonlar safini kengaytirish, yoshlarni kitob mutolaasiga undash va kitobxonlik madaniyatini yanada yuksaltirishga alohida eʼtibor qaratilmoqda. Bu borada turli tadbirlar, tanlovlarni oʻtkazish keng yoʻlga qoʻyilgan.

24-may kuni Qangi ovulidagi 29-sonli maktabda oʻquvchi-yoshlarning boʻsh vaqtlarini mazmunli tashkil etish, ularni kitobxonlikka jalb etish maqsadida “Koʻchma kutubxona” tadbiri tashkil etildi. Amudaryo televideniyesi tahririyatining “Yuksak maʼnaviyatli va axloqli yoshlar – kelajak poydevori” nomli grant loyihasi doirasida oʻtkazilgan ushbu tadbirda televideniye xodimlari, maktab oʻqituvchi va oʻquvchilari ishtirok etishdi.

Tadbirni maktab direktori Bahrom Saparov ochib berdi va maktabda oʻquvchilarni kitobxonlikka jalb etish, kitob oʻqishga qiziqtirish borasida amalg oshirilayotgan chora-tadbirlar, erishilayotgan natijalar xususida soʻzladi. Maktab kutubxonasida yaratilgan sharoitlar, darsliklardan tashqari keltirilayotgan va oʻquvchilarga foydalanishga berilayotgan turli adabiyotlar xususida ham aytib oʻtdi. Shundan soʻng, Amudaryo televideniyesi xodimlari soʻzga chiqib, yoshlarning maʼnaviy-ruhiy va intellektual salohiyatini oshirish maqsadidagi “Yuksak maʼnaviyatli va axloqli yoshlar – kelajak poydevori” nomli grant loyihasi doirasida hududlarda oʻtkazilayotgan tadbirlar haqida maʼlumot berdi.

Tadbir davomida oʻquvchi-yoshlarga “Taraqqiyot koʻzgusi” tahririyati qoshida tashkil etilgan “Jayhun ilhomlari” nodavlat notijorat tashkiloti yosh ijodkorlarni qoʻllab-quvvatlash borasida olib borilayotgan ishlar, tashkilotning 4 ming dona kitob fondiga ega kutubxonasi faoliyatiga ham keng toʻxtalib oʻtildi. Kutubxonadagi mavjud adabiyotlar, ularning turlari, barcha yoshdagi kitobxonlarga mosligi, yangi keltirilgan kitoblar, kutubxonaning chekka hududlardagi filiallari xususida ham maʼlumotlar berildi. Shuningdek, tadbirda kitobning inson qalbida Vatanga muhabbat, yurtga sadoqat, odamlarda mehr-oqibat tuygʻularini kamol toptirishdagi oʻrni, kitob oʻqigan kishining maʼnaviyati yuksalib, dunyoqarashi kengayib borishi alohida taʼkidlandi.

Maktabning ona tili va adabiyot fani oʻqituvchilari ham oʻquvchi-yoshlar oʻrtasida kitobxonlikni targʻib qilish, ularning badiiy adabiyotga qiziqishini oshirish maqsadida “Adabiyotga eʼtibor – kelajakka, maʼnaviyatga eʼtibor”, “Kutubxona maʼnaviyat maskani”, “Eng faol kitobxon” kabi tadbirlar muntazam ravishda oʻtkazib kelinayotgani, bu kitobxon yoshlar safi ortishida muhim ahamiyat kasb etayotganini eʼtirof etishdi. Oʻquvchi-yoshlar tadbirga olib kelingan kutubxona kitoblari, taniqli adiblarning asarlari bilan tanishib chiqishdi va sevgan adiblarning boshqa asarlari, kerakli boʻlgan turli adabiyotlar xususidagi oʻzlarini qiziqtirgan savollarini berishdi.

Koʻchma kutubxona tadbirida turli adabiyotlar bilan tanishgan oʻquvchi-yoshlar boshqa kitoblardan ham bahramand boʻlish istagini bildirishdi va “Jayhun ilhomlari” nodavlat notijorat tashkilotining kutubxonasiga aʼzolikka qabul qilishni soʻrashdi. Tadbir tashkilotchilari kutubxonaga yozgi taʼtil davomida ota-onalari bilan birgalikda tashrif buyurishga taklif qilib, u yerda kitob mutolaa qilish uchun yaratilgan sharoitlarni ham aytib oʻtishdi.

Kitob – inson uchun muvaffaqiyat va saodat eshiklarini ochuvchi kalitdir. Saodatga erishish istagida turli kitoblarni mutolaa qilish, ulardan ilm izlash eng toʻgʻri yoʻl hisoblanadi. Grant loyihasi doirasida oʻtkazilgan “Koʻchma kutubxona” tadbiri yoshlarning kitob mutolaasiga boʻlgan qiziqishini yanada oshirdi.

O.Xudoyberganova.