SOGʻLOM TURMUSh TARZI TARGʻIB QILINDI

Tuman Tibbiyot birlashmasi huzuridagi Aholining sogʻlom turmush tarzini qoʻllab-quvvatlash va jismoniy faolligini oshirish boʻlimi shifokorlari tomonidan muntazam ravishda aholi oʻrtasida sogʻlomlashtirish tadbirlari oʻtkazilib kelinmoqda.

Joriy yilning 27-may – shanba – salomatlik kunida mazkur boʻlimning sport targʻibotchisi I.Nurimbetov va boʻlim shifokorlari tashabbusi bilan “31-may – Butunjahon chekishga qarshi kurashish kuni”ga bagʻishlab, Tibbiyot birlashma  sport maydonchasida ertalab faol yurish, gimnastrada koʻrgazmali mashgʻuloti, kun tartibiga amal qilish, jismoniy faollikning ahamiyati, chekishning inson organizmiga zararli taʼsiri toʻgʻrisida targʻibot tadbiri oʻtkazildi.
Tadbirda tuman markaziy shifoxonasi, koʻp tarmoqli markaziy poliklinika boʻlim mudirlari, mutaxassis shifokorlari va katta hamshiralar, oʻrta tibbiyot va kichik tibbiyot xodimlari hamda masʼul tibbiy xodimlardan iborat  158 nafar  kishi qatnashdi.

Tadbirda Aholi sogʻlom turmush tarzini qoʻllab-quvvatlash va jismoniy faolligini oshirish boʻlimi mudiri J.Yavkashev  ishtirokchilarga tadbirning mazmun-mohiyati haqida tushuncha berdi. Xususan, Butunjahon Sogʻliqni saqlash tashkilotining tashabbusi bilan 1980-yil 31-maydan boshlab ushbu sana “Chekishga qarshi kurashish kuni” sifatida nishonlanib kelinayotgani, insoniyatni sogʻligi uchun zararli boʻlgan odatlardan himoyalash, bu borada  aholi oʻrtasida targʻibot tadbirlari olib borilishi yaxshi samara berishini alohida taʼkidladi. Soʻnggi paytlarda  tamaki mahsulotlarini  chekish yosh tanlamayotgani, afsuslanarli tomoni, hatto bu odat yoshlar, ayol-qizlar  oʻrtasida  ham uchrayotgani  taʼkidlandi. Shuningdek, J.Yavqashev koʻpchiligimiz, ayniqsa yoshlarning nos va sigareta chekayotganiga koʻzimiz tushsa ham indamayotganimiz bu illatning urchishiga sabab boʻlayotgani haqida toʻxtaldi.

Shundan szng sport targʻibotchisi I.Nurimbetov boshchiligida koʻrgazmali ravishda gimnastrada va faol yurish mashqlari bajarildi. ASTTKK va JFO boʻlimi shifokori Matyoqub Ernazarov, ftiziatr shifokori Gulora Abdullayeva, oila shifokori O.Saidabdullayevalar chekishning zarari, zararli odatlarga berilmaslik, kun tartibining ahamiyati, jismoniy faollik mavzularida, muloqotlar oʻtkazdilar, shu bilan birgalikda 2023-yil 25-may kuni eʼlon qilingan “Alkogol va tamaki mahsulotlarining tarqatilishini hamda  isteʼmol qilinishini cheklash toʻgʻrisidagi”  Oʻzbekiston Respublikasi Qonunining mazmun-mohiyatidan kelib chiqib, targʻibot tadbirlarini kuchaytirish zarurligi taʼkidlandi.

Tadbir yakunida ishtirokchilarga zararli odatlarga berilmaslik, kashandalikning inson organizmiga jiddiy taʼsiri toʻgʻrisida targʻibot bukletlari tarqatildi.  

J.Yavqashev, Tibbiyot birlashma shifokori.