Amudaryo tumani hokimi Sultonboy Yoʻldashevning 1-iyun – Xalqaro bolalarni himoya qilish kuni munosabati bilan bayram tabrigi

Aziz va qadrli bolajonlar!

Avvalambor Sizlarni, sizning timsolingizda butun mamlakatimiz bolalarini 1-iyun – Xalqaro bolalarni himoya qilish kuni munosabati bilan chin qalbimdan tabriklayman!

Ushbu sana butun dunyoda har yili keng nishonlanishi bejiz emas. Sababi, bolalar – bizning nurli kelajagimiz, ezgu ishlarimiz va hayotimizning davomchilari, ertangi kunimiz va istiqbolimiz egalaridir.

Xalqimiz azal azaldan bolajon millat sifatida eʼtirof etib kelinadi. Yangi Oʻzbekistonimizda bolalarga eʼtibor davlat siyosati darajasiga koʻtarilgani ham mana shu insoniy fazilatning hayotiy ifodasidir.

Bolalarni asrab-avaylash, har tomonlama barkamol qilib voyaga yetkazish nafaqat oila va jamiyatning, balki davlatimizning ham asosiy burchiga aylangan. Zero, Prezidentimiz aytganlaridek, “Biz uchun jamiyatda begona bola yoʻq va boʻlmasligi kerak. Hammasi oʻzimizning, Oʻzbekistoni-mizning bolalari. Vaqtida mehr koʻrsatsak, ishga, ilmga, kasbu hunarga, ezgu fazilatlarga oʻrgatsak, ularning yoʻlini ochib bersak, ertaga foydasi oʻzimizga, jamiyatimizga tegadi”.

Bugun Yangi Oʻzbekistonimizning baxtli bolajonlari mana shunday mehr-muhabbat, gʻamxoʻrliklar ogʻushida oʻsib-ulgʻaymoqda, kamolga yetmoqda.

Aziz ota-onalar, qadrli bolajonlar!

Maʼlumki, ushbu sanani nishonlashdan maqsad – davlatlar va hukumatlar, keng jamoatchilik diqqatini bolalar huquqlarini himoya qilishga qaratishdir. Zero, bugungi kunda dunyo boʻylab bolalarning sogʻlom boʻlib ulgʻayishi va sifatli taʼlim olishiga kambagʻallik, ochlik, turli iqtisodiy va siyosiy inqirozlar taʼsir oʻtkazmoqda. Toʻyib ovqatlanmaydigan, majburiy mehnatga jalb qilinayotgan millionlab bolalar bor.

Mamlakatimizda esa bolajonlarimiz uchun barcha sharoitlar yaratilgan. Jumladan, onalarning salomatligini muhofaza qilish, sogʻlom farzand dunyoga kelishi uchun sharoit yaratish, yangi tugʻilgan chaqaloqlarni turli kasallik va infektsiyalarga qarshi bepul emlash amaliyotga joriy qilingan. Zamonaviy uslublarda qurilgan va jihozlangan maktabgacha taʼlim tashkilotlari va maktablar, sport-sogʻlomlashtirish muassasalari esa bolajonlarimizning chuqur bilim olib, isteʼdodlarini yuzaga chiqarishga xizmat qilmoqda. Keyingi yillarda maktabgacha taʼlim tashkilotlarida bolalarni sogʻlom ovqatlantirishga eʼtibor qaratilib, maktablarda bepul ovqatlantirish tizimi yoʻlga qoʻyildi.

Yurtimizda bola huquqlarini himoya qilishga oid milliy qonunchilik bazasi yaratilgan. Yangilangan Konstitutsiyamizda alohida bob “Oila, bolalar va yoshlar” deb nomlangani ham bolalarga qaratilayotgan eʼtiborning namunasidir.

Qadrli ota-onalar!

Fursatdan foydalanib, mustaqil Vatanimizning nurli kelajagini barpo qiluvchi barkamol avlodni tarbiyalashga qoʻshayotgan hissangiz uchun barchangizga chuqur minnatdorchilik bildiraman! Ishonamizki, oila, mahalla, jamiyat va davlatning bargalikdagi gʻamxoʻrligi natijasida bolajonlarimiz jismonan va maʼnan barkamol insonlar boʻlib voyaga yetishadi.

Aziz bolajonlar!

Bugungi bayram kayfiyati sabab Sizlarning begʻubor kulgularingiz, gulgun chehralaringizdagi quvonch, koʻzlaringizda charaqlab turgan baxtiyorlik nurlari, biz kattalar koʻnglida ham koʻtarinkilik paydo qilmoqda. Sizlar ozod va obod Vatanimizning tayanchi, buyuk kelajagimizning bunyodkorisiz! Kelgusida zamon talablariga javob beradigan maktabgacha taʼlim tashkilotlari va maktablarda, oliy oʻquv yurtlarida taʼlim olib, ilm-fan va kasb-hunar sirlarini puxta egallab, ota-onangiz, jamiyatimiz va davlatimizga sadoqat bilan xizmat qiladigan yigit-qizlar boʻlib yetishishingizga ishonamiz!

Fursatdan foydalanib, yana bir bora oilalarimiz quvonchi, millatimiz davomchilari, buyuk kelajagimiz vorislari boʻlgan aziz farzandlarimizni Xalqaro bolalarni himoya qilish kuni bilan chin qalbdan samimiy muborakbod etaman! 

Bayramingiz muborak boʻlsin, aziz bolajonlar!