YaNGILANGAN KONSTITUTsIYaNI OʻRGANAMIZ

Konstitutsiyamizning 1-moddasida “Oʻzbekiston — boshqaruvning respublika shakliga ega boʻlgan suveren, demokratik, huquqiy, ijtimoiy va dunyoviy davlat. Davlatning “Oʻzbekiston Respublikasi” va “Oʻzbekiston” degan nomlari bir maʼnoni anglatadi”, deb taʼkidlangan. Keling, ushbu moddani mazmunan koʻrib chiqamiz.

Suveren davlat nima? Suveren davlat  Oʻzbekiston mustaqilligining umumiy va ajralmas belgisi boʻlib, ichki va tashqi siyosatda toʻliq mustaqil ekanligini anglatadi. Demokratik davlat esa insonparvarlik qonunlariga asoslangan, millati, tili, dini, eʼtiqodi, ijtimoiy holati va siyosiy qarashlaridan qatʼiy nazar, inson huquq va erkinliklarini taʼminlab beradigan davlat.

Huquqiy davlat – davlat oʻz faoliyatini, jamiyat va fuqarolarning yashash tarzini faqat Konstitutsiya va qonunlar asosidagina amalga oshirilishini taʼminlaydi. Natijada, davlat organlari va mansabdor shaxslar qonun ustuvorligi asosida xalq manfaatlari uchun ishlaydi, unga xizmat qiladi.

Ijtimoiy davlat har bir inson uchun farovon turmush darajasi, xususan sifatli taʼlim, kafolatli tibbiy xizmat, munosib mehnat sharoiti va adolatli ish haqi, pensiya va nafaqalar, ijtimoiy yordam va xizmatlar tizimi yaratilgan, uy-joyli boʻlish sharoiti mavjud boʻlgan, ijtimoiy tafovutlar yumshatilgan, muvozanatlashgan, hech bir fuqaro oʻz muammolari bilan yolgʻiz qolmaydigan adolatli davlatdir. Dunyoviy davlat – diniy tashkilotlar va birlashmalar davlatdan hamda davlat hokimiyati dindan ajratilgan, davlat boshqaruvi diniy qoidalar bilan emas, balki Konstitutsiya va qonun hujjatlari bilan tartibga solinadigan, qarorlar qabul qilishda diniy asoslarga tayanilmaydigan davlat hisoblanadi.

Oʻzbekistonni dunyoviy davlat sifatida belgilash – dunyoviy taraqqiyot, turli din va mazhablar oʻrtasida bagʻrikenglik va totuvlikni mustahkamlashga, diniy birlashmalarning mustaqil faoliyat yuritishiga, din va eʼtiqod erkinligini taʼminlashga xizmat qiladi.

Yangilangan Konstitutsiyamizning boshqa barcha normalarida ham yuqoridagi sanab oʻtganimiz — barcha printsiplarni roʻyobga chiqarishga qaratilgan mexanizmlar va kafolatlar mustahkamlangan.

N.Jumaniyozova, tuman Adliya boʻlimining inson huquqlarini himoya qilish va huquqni qoʻllash amaliyotini oʻrganish boʻlinmasi bosh maslahatchisi.