OZODALIK – SALOMATLIK GAROVI

Fan va texnika, aniqrogʻi, sanoat rivojlangani sari atrof-muhitni muhofaza qilish masalasi insoniyat oldida turgan, yechilishi barchaga taalluqli muammoga aylandi. Suvlar ifloslanmoqda, tevaragimizda turli-tuman atrof-muhitni, havoni bulgʻaydigan chiqindilar koʻpayib bormoqda.

Oʻtgan asrda atoqli olimlardan biri: "Sanitariya madaniyatisiz umuman madaniyat yoʻq”, deya taʼkidlagan edi. Oʻz xonadonimizni, ish joyimiznigina emas, balki koʻchamizni, butun shahar hatto mamlakatimizni ozoda va obod saqlay olsak, qoʻlimiz baland boʻladi. Buning uchun barcha qaygʻurmogʻi, jamiyat, insoniyat oldidagi ulkan masʼuliyatini chuqur his qilmogʻi kerak.

Yoshligimizda ota-bobolarimiz bizlarga suvni, tuproqni ifloslantirish gunoh ekanligini uqtirishardi. Bu borada ayni kunda biz keksalar yoshlarga oʻgit-nasihatlarimizni berib yurishimiz darkor. Toza havo - tanga davo, deganlaridek, biz havoni har turli yoqimsiz hid va islar bilan bulgʻamasligimiz zarur.

Maʼlumki, har yili kuzda daraxtlar yaproqlari sargʻayib, yerga toʻshalib yotadi. Buni bir joyga toʻplab, yoqib yuborish odatiga hamon barham berilmayotir. Uni yoqib yuborish oʻrniga uyga yaqin joyda oʻra qazib, oʻsha yerga qoʻmib qoʻyilsa, bahorgacha boshqa chiqindilar bilan aralashtirilsa, albatta, yerga solish uchun tayyor mahalliy oʻgʻit boʻladi, atrof-muhitning ifloslanishiga barham beriladi.

Shahrimiz koʻchalarini aylanar ekanmiz, baʼzi xonadon egalari kir yuvilgan suvini asfaltlangan koʻcha yuziga sepib tashlaganiga guvoh boʻlamiz. Sovun suvi taʼsirida yoʻl bora-bora yemiriladi, havoga esa turli mikroblar, viruslar, yoqimsiz, qoʻlansa hidlar tarqaladi. Buningdek salbiy holatlarga barham bermoq lozim.

Istiqlol tufayli mahallalar va ovullar qiyofasi tubdan oʻzgardi. Aholi soni esa yil sayin oshib bormoqda. Tumanda obodonlashtirish, sanitariya-epidemiologiya, tabiatni muhofaza qilish boʻyicha idoralar bor. Ularda ancha xodim ishlaydi. Bizningcha, nomi tilga olingan idoralar xodimlari aholi oʻrtasida tozalik, ozodalik boʻyicha tushuntirish ishlari olib borishi, sanitariya madaniyatiga oid qonunlarga rioya etmaganlarni yuz-xotir qilmasdan qonuniy asosda jarimaga tortishlari darkor. Shuningdek, joylarda ekologiya, tozalik va ozodalikka oid shiorlar ham koʻzga tashlanarli joylarda osilib turmogʻi kerak. Bu shiorlarni har kuni oʻqiyvergan kishi ulardagi soʻzlar magʻzini anglab olishi tabiiy.

Albatta, ozodalik va tozalikka rioya etish, atrof-muhitni muhofaza qilish ishlari mavsumiy emas, balki uni yil boʻyi bajarish shart. Bu haqda "Taraqqiyot koʻzgusi” gazetasi sahifalarida va Amudaryo televideniyesi orqali doimiy ravishda reyd maqolalari hamda maxsus koʻrsatuvlar berib borish maqsadga muvofiqdir. Eng muhimi, atrof-muhit muhofazasi bilan bogʻliq muammolarni hal etishda barchamiz faol boʻlishimiz kerak.