“Adolat” SDPdan Prezidentlikka nomzodning ishonchli vakili amudaryolik saylovchilar bilan uchrashdi

Maʼlumki, joriy yilning 9-iyul kuni yurtimizda muhim siyosiy jarayon − Oʻzbekiston Respublikasi Prezidenti saylovi boʻlib oʻtadi. Ushbu jarayonga befarq boʻlmagan yurtdoshlarimiz nomzodlarning saylovoldi dasturlari bilan yaqindan tanishib, oʻzlari munosib deb bilgan nomzodga ovoz berishni niyat qilishgan.

Bu borada siyosiy partiyalardan koʻrsatilgan Prezidentlikka nomzodlarning Oʻzbekistonni har tomonlama rivojlantirishga moʻljallangan dastur va maqsadlarini saylovchilarga keng tarzda tushuntirish va targʻib qilish maqsadida hududlar boʻylab nomzodlar va ularning ishonchli vakillari bilan uchrashuvlar tashkil etilmoqda.

Shunday uchrashuvlardan biri Amudaryo tumanida “Adolat” sotsial-demokratik partiyasidan Prezidentlikka nomzod Robaxon Maxmudovaning ishonchli vakili Nurliboy Qayipbergenov ishtirokida boʻlib oʻtdi.

Uchrashuvda Prezidentlikka nomzod Robaxon Maxmudovaning hayoti va mehnat faoliyati toʻgʻrisida batafsil maʼlumot berildi. Saylovchilar Prezidentlikka nomzodning xalqimiz xohish-irodasini ifoda etuvchi saylovoldi dasturi bilan tanishtirildi.

Shuningdek, mamlakatimizda boʻlib oʻtadigan muhim siyosiy jarayonning kelajakda davlatimiz rivoji, aholi farovonligini taʼminlashdagi ahamiyati keng targʻib qilindi.

Nomzodning saylovoldi dasturida xalq davlat hokimiyatining birdan bir manbai ekanligi haqidagi konstitutsiyaviy tamoyil davlat siyosatining ustuvor yoʻnalishi sifatida taʼkidlanib, xalq hokimiyatining yorqin timsoli boʻlmish vakillik demokratiyasi institutining roli va ahamiyatini yanada oshirish, mamlakat iqtisodiyotining barqaror rivojlanishini taʼminlash, jamiyatning innovatsion, intellektual salohiyatini roʻyobga chiqarish va inson kapitalini rivojlantirish kabi masalalarda izchil takliflarning ilgari surilayotgani saylovchilarda katta qiziqish uygʻotdi.

Shuningdek, nomzodning saylovoldi dasturidagi fuqarolarga koʻrsatilayotgan tibbiy xizmat sifatini yanada yaxshilash, tibbiyot xodimlari va oʻqituvchi-pedagoglarning maqomini mustahkamlash, ularning mehnatini ragʻbatlantirish, zamonaviy texnologiya va davolash usullarini keng joriy qilish, “Aqlli tibbiyot” tizimini shakllantirish, yaxshilash boʻyicha tashabbuslar yangidan yangi gʻoya va aniq chora-tadbirlarga boyligi bilan ahamiyatli boʻldi.

Uchrashuvda nomzodning saylovoldi dasturi qoʻllab-quvvatlanib, unda xalqchil gʻoya bosh maqsad qilib qoʻyilganligi fikr bildiruvchilar tomonidan alohida taʼkidlandi.

Nomzodning ishonchli vakili oldimizda turgan muhim tarixiy tadbirda Robaxon Maxmudovaga ovoz berishga, saylov kuni barchani faol ishtirok etishga chaqirdi.

“Adolat” SDP tuman Kengashi raisi, Oʻktam Yoʻldashev