IChKI IShLAR VAZIRI KUBOGI UChUN VOLEYBOL MUSOBAQALARI OʻTKAZILDI

Hozir ayni yoz fasli. Umumtaʼlim maktablari oʻquvchilarining yozgi taʼtil kunlari davom etmoqda. Oʻquvchi-yoshlarning yozgi taʼtilni maroqli oʻtkazishlarini taʼminlashga qaratilgan madaniy-maʼrifiy tadbirlar, turli sport musobaqalari “Uch avlod uchrashuvi” mavzusidagi davra suhbatlari tashkil etilayotgani farzandlarimiz uchun yanada zavqli lahzalarni hadya etmoqda.

Ana shunday tadbirlardan biri joriy yilning 8-iyul sanasida Amudaryo ixtisoslashtirilgan maktabida ham oʻtkazildi. Tumanning barcha hududlaridagi ovul va mahallalarida istiqomat qiluvchi 17 yoshgacha boʻlgan oʻgʻil va qiz bolalar oʻrtasida oʻtkazilgan voleybol sporti boʻyicha musobaqalar nafaqat ishtirokchi jamoalar, balki tomoshabinlarda ham qiziqarli taassurotlar qoldirdi.

Respublika Ichki ishlar vaziri kubogi uchun boʻlib oʻtgan 4 bosqichli sport musobaqasining birinchi – tuman bosqichida Amudaryo tumanining barcha hududlaridagi umumtaʼlim maktablari oʻquvchilaridan iborat terma jamoalar oʻzaro kuch sinashdilar.

Avvalo shuni alohida qayd etish kerakki, musobaqada ishtirok etish istagini bildirgan jamoalar aʼzolari musobaqa shartlari va mazkur musobaqani oʻtkazish boʻyicha tasdiqlangan Nizom bilan oldindan tanishishlari uchun sharoit yaratildi. Unga koʻra, ovul va mahallalarda voleybol sportiga qiziquvchi oʻquvchi-yoshlar oʻrtasida oʻrtoqlik uchrashuvlari oʻtkazilib, musobaqaga puxta hozirlik koʻrildi. Shu asosda har bir ovul va mahalla sharafini, Amudaryo tumani sharafini himoya qilishga qodir yoshlardan iborat jamoalar shakllantirildi.

Doʻstona va qizgʻin bahslar bilan oʻtgan musobaqalarning tuman bosqichi yakuniga koʻra, oʻgʻil bolalar oʻrtasidagi bellashuvlarda Toshyop ovul fuqarolar yigʻini terma jamoasi faxrli 1-oʻrinni egalladilar.

Qiz bolalar oʻrtasida oʻtkazilgan musobaqalar ham nihoyatda qiziqarli bahslarga boy boʻldi. Har bir jamoaning oʻziga xos oʻyin uslublari nufuzli hakamlar hayʼati tomonidan baholab borildi va musobaqa yakunida 28-sonli umumtaʼlim maktabi voleybolchi qizlar jamoasi 1-oʻringa loyiq koʻrildi.

Gʻolib jamoalar musobaqa tashkilotchilari tomonidan ragʻbatlantirilib, Ichki ishlar Vaziri kubogi musobaqasining Qoraqalpogʻiston Respublikasi bosqichiga yoʻllanmalar berildi.

Ayni kunda ikkala gʻolib jamoa aʼzolari ham musobaqaning navbatdagi bosqichiga qizgʻin tayyorgarlik koʻrishmoqda.

Robiya YOʻLDOShEVA.