“YoNGʻIN XAVFSIZLIGINI TAʼMINLASh BOʻYIChA DOLZARB 30 KUN” DOIRASIDA MAXSUS-TAKTIK OʻQUV MAShQI OʻTKAZILDI

Amudaryo tuman hokimining 2023-yil 8-iyuldagi joriy yilning 10-iyul - 10-avgust kunlari oraligʻida tuman hududida “Yongʻin xavfsizligini taʼminlash boʻyicha dolzarb 30 kun” tadbirini oʻtkazish toʻgʻrisida”gi Farmoyishi ijrosini taʼminlash maqsadida, joriy yilning 17-iyul sanasida Amudaryo tumanining Doʻrman ovulida joylashgan “Qaldirgʻoch” bolalar dam olish oromgohida yongʻin xavfsizligini taʼminlash boʻyicha koʻrgazmali maxsus taktik-oʻquv mashqi oʻtkazildi.

Oʻquv mashqiga Amudaryo tumani Favqulodda vaziyatlar boʻlimi Favqulodda vaziyatlar davlat tuzilmasi va fuqaro muhofazasi boʻlinmasi boshligʻi, mayor Bekzod Tajibayev hamda boʻlinma inspektori leytenant Hasan Hayitboyevlar ishtirok etishdi va mashqlarni belgilangan reja asosida olib borishdi.

Ushbu oʻquv mashqini oʻtkazishdan asosiy maqsad oromgoh hududida yongʻin sodir boʻlganda obʼekt fuqaro muhofazasi tuzilmalarining amaliy harakatlarini va koʻnikmalarini oshirish, tabiiy va texnogen tusdagi favqulodda vaziyatlar yuzaga kelganda obʼekt rahbarlar tarkibi hamda fuqaro muhofazasi shaxsiy tarkibining toʻgʻri harakat qilish koʻnikmalarini takomillashtirishdan iboratdir. Shuningdek, tadbirdan boshqaruv organi va fuqaro muhofazasi shaxsiy tarkibining kechiktirib boʻlmaydigan yongʻin oʻchirish va qutqaruv ishlariga tayyorgarligini kuchaytirish, favqulodda vaziyatlar yuzaga kelganda fuqaro muhofazasi shaxsiy tarkibining oʻz majburiyatlarini aniq va toʻgʻri bajarishini amaliyotda sinash va oʻrganish kabi maqsadlar ham koʻzlangan. Maxsus taktik oʻquv mashqi oʻtkazish orqali dam olayotgan oʻquvchi-yoshlarga yongʻinning oldini olish va bartaraf etish boʻyicha tushunchalar berish va birlamchi yongʻin oʻchirish vositalari toʻgʻrisida maʼlumotlar taqdim etish orqali oʻquvchi-yoshlarning bu boradagi koʻnikmalarini rivojlantirish ham koʻzda tutilgan.

Oʻquv mashqining 1-bosqichida “Qaldirgʻoch” bolalar dam olish oromgohidagi maydonda yongʻinlar bilan bogʻliq boʻlgan favqulodda vaziyatlar roʻy berganda obʼekt fuqaro muhofazasi tuzilmasining tezkorlik bilan favqulodda vaziyatlarni bartaraf etish harakatlari amalda koʻrsatib berildi.

2-bosqichda esa “Qaldirgʻoch” bolalar dam olish oromgohida yongʻin sodir boʻlganda jabrlanganlarni xavfsiz hududga olib chiqish va birinchi tibbiy yordam koʻrsatish hamda yongʻinni bartaraf etish harakatlari amalda koʻrsatilib, tadbir ishtirokchilariga zarur tavsiyalar taqdim etildi.

Oʻquv-mashqining ikkala bosqichi ham koʻrgazmali vositalar orqali olib borilgani bois, oromgohda dam olayotgan oʻquvchi-yoshlar haqiqatdan ham yongʻin sodir boʻlgan qaltis vaziyatlarda asosan nimalarga eʼtibor qaratish zarurligini, shuningdek, oddiy fuqarolarning yongʻin-qutqaruv xizmati xodimlarining koʻrsatmalariga amal qilishi borasidagi koʻnikmalariga ega boʻldilar.

Oromgohda dam olayotgan bolalar ham yongʻin xavfsizligi qoidalariga rioya qilish boʻyicha dastlabki bilim va koʻnikmalarga ega boʻldilar. Amaliyot shuni koʻrsatadiki, odatda yongʻin sodir boʻlayotganda bolalar hech kim topa olmaydigan joyga yashirinishadi. Bola xavf haqida xabar bermoqchi boʻlib, qichqirishi mumkin, ammo bunday hollarda ovoz odatda chiqmay qolish mumkin. Shuning uchun bolalarga xavfsizlik qoidalarini kichkinaligidanoq oʻrgatish va yongʻin qanday xavfli ekanini tushuntirish lozim.

Tadbir yakunida oromgohda dam olayotgan oʻquvchi-yoshlar masʼullarga oʻzlarini qiziqtirgan savollar bilan murojaat qildilar va zarur javoblar oldilar.

I.Hosilov, Amudaryo tumani FVB boshligʻi, podpolkovnik.