SANʼATDA OʻZ SOZIGA EGA

Mamlakatimizda aholi, ayniqsa, olis hududlarda istiqomat qiladigan fuqarolarga madaniy dam olish xizmatlari koʻrsatish darajasini oshirish, barcha hududlarda teatr, tsirk va boshqa turdagi ommaviy-madaniy va kontsert-tomosha tadbirlarini tizimli ravishda yoʻlga qoʻyish, madaniyat va sanʼat sohasida isteʼdodli yosh ijodkorlarni izlab topish va qoʻllab-quvvatlash borasidagi amalga oshirilayotgan saʼy-harakatlar oʻzining ijobiy natijalarini berayotir.

Samandar Abdullayev Qangli ovulidagi Madaniyat markazida estrada xonandaligi toʻgaragi aʼzosi, qoʻshimcha rassomlik, baxshichilik toʻgaraklariga ham qatnashadi. 2004-yilda tugʻilgan bu isteʼdodli yigit ikkinchi  guruh nogironi boʻlishiga qaramay, oʻz ustida tinmay ishlaydi, koʻp sheʼrlar oʻqiydi va oʻziga maʼqul boʻlganini tanlab, mustaqil kuy bastalab, oʻzi ijro etadi. Koʻnglidagi qoʻshiqqa sigʻdira olmagan  his-tuygʻularini, olam ranglarini boʻyoqlarda aks ettirishga intiladi.

 U oʻtgan yili nogironligi boʻlgan yoshlar oʻrtasida oʻtkazilgan “Vatan – mening nigohimda” nomli rasmlar tanlovining Qoraqalpogʻiston Respublikasi bosqichi gʻolibi boʻldi. Samandar asosan portret janrida ijod qiladi. Shuningdek, tabiat manzaralarini chizishga ham qiziqadi.

Samandar Abdullayev Botir Zokirov nomidagi zamonaviy estrada qoʻshiqchilari tanlovi, “Yagonasan, muqaddas Vatan!” qoʻshiqlar tanlovi tuman bosqichida ham muvaffaqiyatli qatnashdi va ijrosi tinglovchilarga maʼqul boʻldi.

U oʻtgan yili umumiy oʻrta taʼlim maktabini tugatdi, biroq oliygoh talabasi boʻlish nasib etmadi. Uning maqsadi sanʼat yoʻnalishida oliy taʼlim olib, yoshlarga oʻrgatishdir.

Uning qiziqishlarini dadasi Yoqubboy Abdullayev, akalari ham hurmat qilishadi. Boisi, dadasining oʻzi sanʼat shinavandasi, doira, rubob chalishdan zavq oladi, farzandlarini ham sanʼatsevar qilib tarbiyalashga intiladi. Butun oila jam boʻlib oʻtirgan vaqtlarida rubob, doira “tilga” kirib, shoʻx qoʻshiqlar yangraydi, oʻzlari bundan cheksiz zavq olishadi. Samandar uchun esa bu kabi mashgʻulotlar shunchaki qiziqish emas, tanlagan ixtisosligi yoʻlidagi ibratli maktabdir.

Iqtidorli, isteʼdodli yoshlar – yurtimiz  faxri. Samandarga esa ijodiy barkamollik tilab qolamiz.

Sevara ISMOILOVA.