HOKIM YoRDAMChISINING FAOLIYaTI SAMARALI BOʻLAYaPTI

Oʻzbekiston Respublikasi Prezidentining “Mahallada tadbirkorlikni rivojlantirish, aholi bandligini taʼminlash va kambagʻallikni qisqartirish boʻyicha davlat siyosatining ustuvor yoʻnalishlari toʻgʻrisida”gi Farmoniga muvofiq ovul, mahallalarda tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha faoliyat yuritayotgan hokim yordamchilari aholiga amalga oshirilayotgan davlat siyosati va islohotlarning mazmun-mohiyatini keng tushuntirib, ular hayotidagi muammolarni joyida hal qilishmoqda.

Ular sektor rahbarlari bilan birgalikda har bir mahallaning ijtimoiy-iqtisodiy rivojlantirish yoʻnalishlarini belgilab, xonadonbay roʻyxat asosida har bir mahalla kesimida haqiqiy ijtimoiy ahvolni aniqlashib, zarurat tugʻilgan oilalarni qoʻllab-quvvatlamoqda, tadbirkorlikka qiziquvchi aholiga faoliyatini tashkil etishiga koʻmaklashmoqda. Shuningdek, mahallalarda aholining kundalik ehtiyojlari uchun zarur boʻlgan xizmatlar turlarini rivojlantirayotgani bois, hokim yordamchilariga xalqning ishonchi, hurmati ortmoqda.

Tumanimizning Qangli ovulida faoliyat yuritayotgan hokim yordamchisi Karomaddin Eshmonov ham oʻz mehnatlari, intilishlari bilan ovul hayotida ijobiy oʻzgarishlar, yangilanish larga sababchi boʻlayotir.

Ovulda 621 ta xonadon mavjud. Ulardagi 932 ta oilada 3476 nafar aholi istiqomat qiladi. Yil boshida ovul fuqaro yigʻini masʼullari ishtirokida barcha xonadonlar toʻliq xatlovdan oʻtkazilib, shunga muvofiq hududda amalga oshirilishi lozim boʻlgan ishlar belgilab olindi va ijrosi taʼminlanmoqda.

Yilning oʻtgan yarim yilida oilaviy tadbirkorlikni rivojlantirish dasturi asosida xatlov davomida aniqlangan tadbirkorlik bilan shugʻullanish istagi bor 67 nafar fuqaroga imtiyozli kredit olishga tavsiyanomalar berildi va ajratilgan 982,7 million soʻm kredit evaziga faoliyatini boshladilar. Ishsiz, ammo mehnat qilishga yaroqli 37 nafar aholiga “E-Auksion” elektron savdo platformasi orqali 27,6 gektar yer uzoq muddatga ijaraga dehqonchilik bilan shugʻullanishi uchun ajratildi.

Aholi bandligini taʼminlash, ularning doimiy, ishonchli daromadga ega boʻlishiga, turmushi farovonlashuviga asos boʻladi. Karomaddin Eshmanov shuning uchun ham ishsiz, ishlash istagidagi aholi, ayniqsa yoshlarning bandligini taʼminlashga, yaxshi daromad topib, oʻz hayotlaridan mamnun boʻlib yashashlariga erishishiga intilmoqda. Uning bu boradagi saʼy-harakatlari natijada ovulning 123 nafarining bandligi taʼminlandi. Ularning 67 nafari doimiy ishga joylashdi, 1 nafari haq toʻlanadigan jamoat ishiga jalb etildi, 55 nafar fuqarolarning oʻzini oʻzi band qilishi orqali bandligi taʼminlandi, yangidan 2 ta yuridik, 8 ta dehqon xoʻjaliklari subʼektlari tashkil etildi.

Karomaddin Eshmonov ovul fuqarolar yigʻini raisi, yoshlar yetakchisi, xotin-qizlar faoli bilan hamkorlikda hududda tadbirkorlikni rivojlantirishning ichki imkoniyatlarini izlab topishga, tomorqa yerlardan samarali foydalanishga erishishga, oilalarda daromad manbalarini yaratishga intilmoqda.

Qangliliklar asli mehnatkash, dehqonchilik va chorvachilik bilan shugʻullanmaydigan odam yoʻq hisobi ovulda. Endilikda kichik ishlab chiqarish, xizmat koʻrsatish va boshqa turdagi faoliyatlarni yoʻlga qoʻyish orqali ovul aholisi turmushi sifatini oshirish hokim yordamchisining asosiy maqsadi. Bu borada koʻpgina natijalarga erishayapti ham.

Intilganga tole yor, deydi xalqimiz. Ha, chindan-da ezgu niyatlar, aniq maqsadlar sari intilish – besamar ketmaydi. Ishlashdan, el gʻamida intilishdan charchamaydigan Karomaddin Eshmanovning kelgusi faoliyatiga ham muvaffaqiyatlar tilab qolamiz.

Oygul RAJABOVA.