BOBUR OVULLIK ONAXONLAR TALQINIDAGI “MILLIY QADRIYaTLARIMIZ – YoShLAR NIGOHIDA” TEATRLAShTIRILGAN TADBIR BARChAGA MANZUR BOʻLDI

Oʻsib kelayotgan yosh avlodni milliy-maʼnaviy qadriyatlarga hurmat ruhida tarbiyalash, toʻylar, oilaviy marosimlarni ortiqcha sarf-xarajatlarsiz, tartibli va mazmunli oʻtkazishda koʻpni koʻrgan, katta hayotiy tajribalarga ega onaxonlar bilan bamaslahat ish tutish yoshlar qalbida xalqimizning boy milliy-madaniy merosiga hurmat va ehtirom tuygʻularini uygʻotishi tabiiy. Chunki xalqimizga xos boʻlgan ezgu fazilatlardan biri – bu intellektual mulkni sadoqat bilan asrab-avaylash, kelgusi avlodlarga bus-butun, goʻzal tarzda yetkazishdir.

Bu borada Amudaryo tumanining Bobur nomli ovul fuqarolar yigʻini xotin-qizlar faoli Sabohatxon Rajabova tomonidan amalga oshirilayotgan ishlar eʼtiborga munosib.

Joriy yilning 1-avgust sanasida boʻlib oʻtgan “Milliy qadriyatlarimiz – yoshlar nigohida” deb nomlangan teatrlashtirilgan tadbirda nafaqat ovul yoshlari, balki tadbir mehmonlari ham olam-olam zavq oldilar. Koʻcha boshchi ayollar, ovulda istiqomat qiluvchi nuroniy onaxonlar, oilaviy qadriyatlarni mustahkamlash boʻyicha komissiya aʼzolari, yoshlar ishtirok etgan mazkur tadbirda ovul onaxonlari tomonidan asrlar davomida oilalar mustahkamligi, sogʻlom va barkamol farzandlar tarbiyalab, voyaga yetkazish borasida muhim ahamiyatga ega boʻlgan biri-biridan goʻzal urf-odat va anʼanalar, oilaviy marosimlar, yangi kelinning zimmasidagi burch va majburiyatlari sahnaviy koʻrinishlar asosida talqin etilgani barchaga manzur boʻldi.

Xususan, yangi kelining sarpolarini tayyorlash sahnasi bilan boshlangan tadbirda onaxonlar Gulora Davlatboyeva, Gulsara Allaqulova, Irodaxon Ortiqovalar biri-biridan bejirim koʻrpa-yostiqlar, koʻrpacha-yu quroq toʻshaklar tikish, quroq koʻrpachalarda naqsh etilgan ota-onalar orzularini mahorat bilan namoyish qildilar.

Kelin-qizning dugonalari, ota-onasi bilan xayrlashish marosimi yanada zavqli boʻldi. Bu sahnada kelin rolini Shahnozaxon Eshimova hayotiy tarzda, nihoyatda ishonarli qilib ijro etib berdi. Bu sahna koʻrinishida kelin yangalari Nasibaxon Tangriberganova, Marziya Xolmurodova, kelinning dugonalari Muhayyo Allamberganova hamda Shohistaxon Otajonovalar kelin qizni yasantirib, qoshlariga oʻsma, koʻzlariga surmalar qoʻyishdi. Sunbul sochlarini oʻrib, davraga olib chiqqanlarida tabiiy goʻzallikdan barchaning koʻngli toʻldi, qalblarda havas uygʻondi. Hatto ishtirokchilar tomonidan “qizlarimizni shunday kiyintirib, yasantirish kerak”, degan fikrlar bildirildi.

Shundan soʻng, yana bir onaxon Malika opa Shukurullayeva qiroat bilan yor-yorlar aytdi. Yor-yorlar, el-yurtning oq fotihasi bilan uzatilgan kelinni toʻyxonada anʼanalarimizga koʻra, burundiq enasi tushirib oldi. Burunduq ena rolini qoyilmaqom qilib ijro etgan Umidaxon Masharipovani qutlugʻlab Qizlargul Allamberganova “hammani ham shunday toʻyga yetkazsin”, degan maʼnoda kelinning boshidan sochqilar sochdi.

Kelinni yangi qarindoshlari bilan tanishtirish sahnasi yanada qiziqarli taassurotlarga boy boʻldi. Doira chalib, joʻshqin kelin salomlar orqali yangi qarindoshlar bilan tanishtiruv marosimini oʻtkazgan Sanamjon Qutlimurodovadan barcha minnatdor boʻlishdi.

Tadbir davomida qaynona rolini mahorat bilan ijro etgan Gulsara Qutlimurodova hazil-huzullarga boy hikmatli pand-nasihatlar bilan kelinini quchoq ochib kutib oldi va oʻgʻli va xonadon osoyishta va sarishtaligini unga ishonib topshirdi.

Shundan soʻng, yangi kelinga ish buyurar marosimi ham oʻtkazilib, momolar tomonidan kelinning qadami shu xonadonga yogʻday yoqsin, degan maʼnoda qoʻllari un va yogʻga botirilib, uy yumushlari topshirildi. Yangi kelin tomonidan tadbir mehmonlari, Qoraqalpogʻiston Respublikasi ayollarni reabilitatsiya qilish va moslashtirish namunali tumanlararo Amudaryo tuman markazi direktori Gavhar Chimboychiyeva hamda Farovon mahallasi boʻyicha hokim yordamchisi Muqaddas Beknazarovalar uchun choy berish marosimi oʻtkazildi. Mehmonlar kelinning xush muomamalasi va taʼzimidan mamnun boʻldilar.

Ushbu marosimdan soʻng Safargul ona Doshanova yoshlarga “tushovkesdi” marosimini amalda koʻrsatib berdi. “Tushovkesdi” marosimida bir yashar qizaloq Sevinchoy Ismoilovaning oyoqlaridagi ip kesilib, jajji qizaloq yurib ketdi. Bu – bolajonlarning ravon, erkin qadam tashlashlari yoʻlidagi toʻsiqni olib tashlash, barkamollik sari intilishlarini qoʻllab-quvvatlash maʼnosini anglatgani, yoshlar qalbida milliy-madaniy urf-odat, anʼana va maʼnaviy qadriyatlarga mehr-muhabbat tuygʻularini yanada mustahkamlagani bilan muhim ahamiyat kasb etdi.

Tadbir davomida beshik quchgan ona sahnasi va koʻngillarga ajib halovat baxsh etuvchi allalar yangrab, barchaga xushnudlik bagʻishladi.

Robiya YOʻLDOShEVA.