SUVNI KAM TALAB ETADIGAN EKINLAR EKIShGA EʼTIBOR KUChAYMOQDA
Mamlakatimiz iqtisodiyoti tarmoqlarining rivoji koʻp jihatdan qishloq xoʻjaligiga bogʻliq. Oʻtgan davr mobaynida qishloq xoʻjaligida bozor munosabatlarini joriy etish, ishlab chiqarishni rivojlantirish boʻyicha bosqichma-bosqich islohotlar amalga oshirildi.
Xususan, mamlakatimizda koʻp tarmoqli fermer xoʻjaliklarini tashkil etish va uni rivojlantirishga qaratilgan qator qonun va qarorlarning qabul qilinishi hududlarda qishloq xoʻjaligi sohasiga eʼtiborning kuchayishiga olib kelmoqda. Jumladan, mavjud fermer xoʻjaliklarining barchasi koʻp tarmoqli shaklida faoliyat yurita boshlagani bu faoliyat turini yuqori darajada rivojlantirish zarurligini belgilaydi
Respublikada koʻp tarmoqli fermer xoʻjaliklarini tashkil etish bilan birga uning faoliyati samaradorligini taʼminlash ham muhim masalalardan biri hisoblanadi. Samaradorlik doimo dolzarb hisoblanib, ishlab chiqarish faoliyatining iqtisodiy yuksalishini taʼminlaydi. Ayniqsa, bozor iqtisodiyoti sharoitida kam resurs sarflagan holda moʻl hosil va daromad olishga qiziqish yanada ortib bormoqda.
Amudaryo tumanida ham yerdan moʻl hosil yetishtirib, dehqonchilik madaniyatini oshirishga astoydil intilayotgan, sohada yuksak natijalarga erishib, oʻz faoliyati bilan barchaga namuna boʻlayotgan fermer xoʻjaliklari koʻplab topiladi. Toshyop ovulida faoliyat koʻrsatayotgan “Bekman Allaberganov” koʻp tarmoqli fermer xoʻjaligi shularning biri desak, adashmagan boʻlamiz.
Yer bilan tillasha oladigan, qishloq xoʻjaligi sohasida ulkan tajribaga ega Ilhom Palvanovning saʼy-harakatlari bilan “Bekman Allamberganov” fermer xoʻjaligi nafaqat ovulda, balki, tumanda dehqonchilikdan ulkan daromad olayotgan xoʻjaliklardan biriga aylandi.
2003-yildan buyon faoliyat koʻrsatayotgan koʻp tarmoqli xoʻjalikda mahsulot yetishtirish rejalari har yili barcha yoʻnalishlar boʻyicha ortigʻi bilan ado etib kelinmoqda.
Mazkur xoʻjalikda hozirgi kunda 62 gektar ekin maydoni mavjud. Soʻnggi yillarda paxta, bugʻdoy ekilgan maydonlarning hosildorligi sezilarli darajada oshdi.
Shuni alohida taʼkidlash kerakki, keyingi yillarda mamlakatimizda dehqonchilik qilinadigan maydonlarda suv tanqisligi muammosi tobora yaqqol namoyon boʻlayotir. Shularni eʼtiborga olgan holda ekin maydonlarini suv tejovchi texnologiyalar yordamida sugʻorish hamda suvni kam talab etiladigan ekinlarni ekishga alohida eʼtibor qaratilmoqda.
“Bekman Allaberganov” fermer xoʻjaligida ham bu borada yetarli saʼy-harakatlar olib borilmoqda. Suvni tejash maqsadida ekin maydonlari lazerli uskunalar bilan tekislanib, dalalarning maʼlum qismi suv tejovchi texnologiyalar yordamida sugʻorilmoqda. Bugʻdoy hosili yigʻib olingan yerlarning bir gektarida esa suvni kam talab qiladigan mosh mahsuloti yetishtirilmoqda.
Shuningdek, fermer xoʻjaligi dalalaridan birida intensiv bogʻ, uzumzor tashkil etilgan. Hozirgi kunda ushbu maydonlardagi mosh ekini hosil toʻplamoqda. Intensiv bogʻda esa olmalarning turli navlari hosili koʻpligidan shoxlari egilib turibdi. Yangidan tashkil etilgan bir gektarlik uzumzor ham hosilga kira boshlagan. Tajribalardan maʼlumki, uzumzorlar ham suvni kam talab qiladi va moʻl daromad beradi. Suv tanqisligi sharoitida bu dehqonlarga juda qoʻl keladi.
Fermer xoʻjaligi rahbari bundan keyin ham suvdan unumli foydalanishga katta eʼtibor qaratib, suv tejovchi texnologiyalar joriy qilingan maydonlarni muntazam ravishda kengaytirib borishni niyat qilgan.
Tuman hokimligining Axborot xizmati
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
