TUMANIMIZDA MAMLAKATIMIZ MUSTAQILLIGINING 32-YILLIGI KENG NIShONLANDI

Xalqimiz Oʻzbekiston Respublikasi davlat mustaqilligining 32-yillik sanasi – eng ulugʻ, eng aziz bayramimizni koʻtarinki kayfiyatda qarshi olmoqda.

Har bir yurtdoshimiz koʻnglida shu aziz Vatan fuqarosi ekanligidan yuksak faxr-iftixor tuygʻulari joʻsh urmoqda. Boisi, oʻtgan 32-yil mobaynida yurtdoshlarimizning fidokorona mehnati va yuksak orzulari yoʻlida qilgan fidoyiliklari evaziga yurtimiz oʻzgacha chiroy ochdi, milliy oʻzligimiz, qadimiy tariximiz, madaniyatimiz, qadriyat va urf-odatlarimiz qayta tiklandi.

Davlat va jamiyat hayotining tub asoslari oʻzgarib, barcha sohalarda amalga oshirilayotgan islohotlar inson qadr-qimmatini yuksaltirishga xizmat qilmoqda.

Barcha soha va tarmoqlarda tub islohotlar amalga oshirilib, demokratik yangilanish jarayonlari shiddat bilan kechayotir. Oʻtgan davr baxtiyor va erkin hayotni, buyuk kelajakni mustaqillik asosidagina qurish mumkinligini koʻrsatdi.

Yangilangan Konstitutsiyaning qabul qilinishi joriy yilgi mamlakatimiz siyosiy hayotidagi muhim voqealarning biri boʻldi.

Keyingi yillarda yurtimizda amalga oshirilayotgan oʻzgarishlar, yangilanishlarni har bir yurtdoshimiz oʻz hayotida yaqqol his qilayapdi. Har bir fuqaroning oʻz hayotidan mamnun boʻlib yashashiga erishilayotgani, ularning haq-huquqlari va erkinliklari himoya qilinayotgani ertangi kunga ishonchini yanada oshirmoqda.

Butun mamlakatimiz aholisi kabi amudaryoliklar ham bugungiday  farovon hayotga yetkazgan mustaqilligimizning 32-yilligini keng nishonladilar.

29-avgust kuni Doʻstlik mahallasida joylashgan sport maktabi oʻyingohida  «Yangi hayot uchun, Yangi Oʻzbekiston uchun!» shiori ostida oʻtkazilgan tantanali bayram tadbirida tuman hokimligi masʼullari, Qoraqalpogʻiston Respublikasi Joʻqorgʻi Kengesi va tuman Kengashi deputatlari, tumanimizdagi davlat va jamoat tashkilotlari rahbarlari, fuqarolar yigʻinlari raislari,  tadbirkorlar, nuroniylar, faol yoshlar hamda aholi vakillari ishtirok etdilar.

Tadbirda tuman hokimi vazifasini bajaruvchi Rashid Salayev nutq soʻzlab, barcha yurtdoshlarimizni mamlakatimiz mustaqilligining 32-yillik bayrami bilan qizgʻin muborakbod etdi.

Bayram tadbirida isteʼdodli sanʼatkorlar, havaskor yoshlar va badiiy jamoalar ishtirokida Vatan, mustaqillik, tinchlik va doʻstlikni tarannum qiluvchi kuy-qoʻshiqlar yangradi.

Rang-barang bezaklar, turfa gullar va sharlar bilan bezatilgan katta sahna, monitorda aks etgan obod goʻshalar, istiqlol shukuhi maydonga yanada fayz kiritib, tomoshabinlarga koʻtarinki ruh baxsh etdi.

Bayram  tabrigidan soʻng, Oʻzbekiston va Qoraqalpogʻiston Respublikalari Davlat madhiyalari yangrab, tuman Turizm va Madaniyat boʻlimi tomonidan «Yangi hayot uchun, Yangi Oʻzbekiston uchun!» shiori asosida tayyorlangan bayram tomoshasi boshlandi.

Istiqlol shukuhi aks etgan  ulkan teatrlashtirilgan bayram dasturida xalqimizning istiqlolgacha va istiqlolning dastlabki yillarida bosib oʻtgan mashaqqatli va sharafli  yoʻli, bugungiday ozod va obod turmush tarzi bunyodkorlarining mehnatlari aks ettirildi,  emin erkin, betashvish ulgʻayayotgan, kelajagimiz egalari boʻlgan jajji bolajonlarning quvnoq qoʻshiq-raqslari  barchaning eʼtiborini jalb etdi.

Sahna orqasidagi monitorda yurtimizda, shu jumladan ,tumanimizda roʻy berayotgan oʻzgarish va yangilanishlar videoroliklar orqali namoyish etilib borildi.

Aytish kerakki, oʻtgan yillar mobaynida tuman hududidagi chekka ovul- mahallalarda ham keng koʻlamli qurilish, obodonlashtirish ishlari bajarildi. Koʻp qavatli uy-joylar, ijtimoiy, xizmat koʻrsatish va servis obʼektlari qurildi.   Tumanda qishloq xoʻjaligi, taʼlim, sogʻlikni saqlash sohalarini rivojlantirish, «Ayollar daftari», «Yoshlar daftari», «Temir daftar»ga kiritilgan fuqarolar bilan ishlash, aholi bandligini taʼminlashda eʼtiborga molik ishlar olib borilib, bu boradagi ezgu ishlar uzluksiz davom ettirilmoqda.

Bir soʻz bilan aytganda, amudaryoliklar mustaqillikning oʻttiz ikki yillik tantanali bayramini barcha sohalardagi oʻziga xos yutuqlar bilan qarshi olishmoqda. Xususan, joriy yilda bir guruh nuroniylar «Mehnat faxriysi» koʻkrak nishoni, intiluvchan tadbirkor Tamara Yusupova «Faol tadbirkor», iqtidorli oʻquvchi Barno Samardarova «Zulfiya» nomidagi Davlat mukofoti, turli xil sohalarda fidoyi mehnat qilayotgan xodimlar «Shuhrat» medali, «Doʻstlik» ordeni bilan mukofotlandi.

Maʼlumki, yurtimizda istiqlol yillarida millat, yurt kelajagi boʻlgan yoshlarga alohida eʼtibor qaratilib, keng imkoniyatlar yaratildi. Bu imkoniyatlardan samarali foydalanayotgan yoshlar bugun turli yoʻnalishlarda yuqori natijalarga erishib mamlakatimiz nomini butun dunyoga tanitmoqda.     

Yurtboshimizning Respublikamiz aholisi hayotini tubdan yaxshilashga qaratilgan saʼy-harakatlari tufayli kichik biznes, xususiy tadbirkorlik jadal rivojlanmoqda. Ularga berilayotgan soliq imtiyozlari, ehtiyojmand oilalarning qoʻllab-quvvatlanishi, yoshlarning oliy taʼlimga oʻqishga kirishlari uchun ajratilgan kvotalar, kasb-hunar egallashiga qilinayotgan eʼtibor, boshlangʻich sinf oʻquvchilarini bepul ovqatlantirish tizimi yoʻlga qoʻyilgani, oʻquvchilarga darsliklarning bepul berilayotgani alohida gʻamxoʻrlik namunasidir. Bular oʻz navbatida tumanimizda ham barcha sohalarda oʻzgarishlar, yuksalishlar yasalishiga zamin boʻlmoqda.

Tomosha davomida tumandagi maktabgacha taʼlim tashkilotlari tarbiyalanuvchilari ijrosidagi quvnoq kuy-qoʻshiqlar, zamonaviy raqslar tomoshabinlardagi bayramona kayfiyatni yanada yuksaltirdi.

Ayniqsa, turli millat vakillarining «Oʻzbekiston – umumiy uyimiz» turkumidagi ijrolari barchaga manzur boʻldi.

Bayram tomoshasi davomida amudaryolik taniqli estrada xonandalari Vatan, tinchlik, farovonlik haqidagi qoʻshiqlarini kuylab, bayram qatnashchilariga zavq ulashishdi.

Mustaqillik bayrami tantanalari tumanimizning ovul va mahallarida, mehnat jamoalarida davom etmoqda.

Tuman hokimligining Axborot xizmati