ISTIQLOL BAYRAMI ARAFASIDA TUMANIMIZ HUDUDI OBODONLAShTIRILIB, BAYRAMONA BEZATILMOQDA
Obodlik, saranjom-sarishtalik bilan elimiz yanada fayzli, koʻrkam boʻladi. Amudaryo tumanida ham xalqimizning asriy anʼanalaridan hisoblangan bayram va shodiyonalar oldidan hashar va obodonlashtirish ishlarini oʻtkazish anʼanaga aylangan.
Tumanimizda Obodonlashtirish boshqarmasi tomonidan obodonlashtirish va koʻkalamzorlashtirish ishlari tizimli tartibda yoʻlga qoʻyilgan. Boshqarmaning jonkuyar xodimlari Mustaqilligimizning 32 yilligi yaqinlashayotgan ayni kunlarda eng ulugʻ, eng aziz bayramimizni munosib kutib olish maqsadida tayyorgarlik ishlarini qizgʻin olib borishmoqda.
Oʻtgan davr mobaynida Boshqarma xodimlari tomonidan shahar markaziy koʻchalari, Qipchoq, Barkamol avlod, Qilichboy, Gurlan koʻchalaridagi katta yoʻl boʻylariga archa koʻchatlari, gullar hamda manzarali daraxtlar oʻtqazilib, parvarish qilib kelinmoqda. Bu kabi koʻkalamzorlashtirish ishlari davom ettirilib, belgilangan hududlarda bogʻ barpo etish ishlari olib borilmoqda. Bundan tashqari, jamoat ishlari uchun biriktirilgan ishchilar Yangiobod, Farovon, Gulzor, Boyovul mahallalari hududining markaziy koʻchalarida va boshqa hududlardagi koʻchalarda, shuningdek, qabristonlarda ham obodonlashtirish ishlarini amalga oshirishmoqda.
Hududlarda amalga oshirilayotgan obodonlashtirish va koʻkalamzorlashtirish ishlariga boshqarmadan 100 nafar ishchi-xodimlar, shuningdek, ish samaradorligini oshirish maqsadida 15 ta texnikalar biriktirilgan. Ular manzarali daraxtlar va gul koʻchatlarini parvarish qilish, boshqarma balansida boʻlgan piyodalar yoʻlakchalarining tozaligini taʼminlash, Mangʻit shahri hududidagi ichki irrigatsiya tarmoqlarini tozalash, tuman hududidagi tungi koʻcha yoritish chiroqlarining doimiy ishlashini taʼminlash kabi ishlarni bajarishmoqda.
Shu bilan birga, ovul va mahallalar hududlaridagi ichki koʻcha yoʻllarini taʼmirlash ishlari tashkil etilib, aholi tomorqalariga oqar suv yetkazib berish maqsadida ariq qazish ishlari amalga oshirilmoqda. Qolaversa, hududlardagi ijtimoiy himoyaga muhtoj, kam taʼminlangan oilalarning turar joylarini ham taʼmirlash ishlari tashkil etilmoqda.
Shu kunlarda tuman Obodonlashtirish boshqarmasining 30 nafar ishchi-xodimlari va 20 nafar jamoat ishlariga biriktirilgan ishchilar istiqlol bayramini munosib kutib olish va nishonlash maqsadida bayram boʻlib oʻtadigan Doʻstlik mahallasidagi Markaziy oʻyingoh hududidagi manzarali butalar va gulzorlarni, daraxtlarni tartibga keltirishmoqda, ariq va zovurlarni chim va begona oʻtlardan tozalashmoqda.
Undan tashqari, tuman aholisi kechki sayrga chiqqan paytida bayram shukuhini his qilishlari uchun markaziy koʻchalar rang-barang chiroqlar bilan bayramona bezatilib, bayroqchalar oʻrnatildi. Oqshom paytlarida yoʻl chetlaridagi Oʻzbekiston va Qoraqalpogʻiston bayroqlari, turfa xildagi gullar koʻrinishida yogʻdu sochayotgan chiroqlar atrof-muhitga yanada koʻrkamlik baxsh etib, yurtdoshlarimizga bayramona kayfiyat ulashmoqda.
Bugun mamlakatimizning qay goʻshasiga, qay manziliga bormang, Vatanni yanada obod etish istagida yashayotgan yurtdoshlarimizning ezgu ishlariga guvoh boʻlishingiz mumkin. Mustaqil diyorimizning bugungi jamoli, koʻrki kishini hayratga soladigan darajada oʻzgarib, goʻzallashib va obodonlashib bormoqda.
O.Xudoyberganova.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
