XOTIN-QIZLAR VA BOLALARGA NISBATAN ZOʻRAVONLIKNING OLDINI OLISh BOʻYIChA TARGʻIBOT TADBIRI BOʻLIB OʻTDI

Xotin-qizlarning manfaatlarini taʼminlash, jamiyat hayotidagi oʻrnini mustahkamlash davlatimiz ijtimoiy siyosatining muhim yoʻnalishlaridan biri hisoblanadi. Ularni har tomonlama qoʻllab-quvvatlash, jamiyatda oʻz oʻrnini topishi, siyosiy, iqtisodiy, ijtimoiy sohalarning faol ishtirokchisiga aylanishlari uchun bugungi kunda qator islohotlar amalga oshirilmoqda. Ularning taʼlim va kasbiy koʻnikmalar olishi hamda bandligini taʼminlashga har tomonlama koʻmaklashish, tadbirkorlik tashabbuslarini yanada qoʻllab-quvvatlash boʻyicha tizimli ishlar yoʻlga qoʻyilgan.

16-sentyabr kuni Amudaryo tumanidagi 82-sonli umumtaʼlim maktabida yoshlarni yot gʻoyalardan asrash hamda xotin-qizlar va bolalarga nisbatan zoʻravonlikning oldini olish boʻyicha targʻibot-tushuntirish tadbiri boʻlib oʻtdi.

Tadbirda tuman hokimligining din ishlari boʻyicha bosh mutaxassisi Muzaffar Sherimbetov, Qoraqalpogʻiston Respublikasi “Maʼnaviyat-maʼrifat” markazi tuman boʻlimi bosh mutaxassisi Maxmud Eshmanov, Ayollarni reabilitatsiya qilish va moslashtirish Qoraqalpogʻiston Respublikasi tumanlararo markazi direktori Gavhar Chimbaychiyeva, maktab direktori Zafar Axmanov, oʻqituvchilar hamda yuqori sinf oʻquvchilari ishtirok etdilar.

Tadbirda Ayollarni reabilitatsiya qilish va moslashtirish Qoraqalpogʻiston Respublikasi tumanlararo markazi direktori Gavhar Chimbaychiyeva soʻzga chiqib soʻnggi yillarda ayollar tadbirkorligi, tashabbuslari qoʻllab-quvvatlanib, xotin-qizlar bandligi va ularni kasb-hunarga oʻqitish, ijtimoiy himoyaga muhtoj qizlarga davlat grantlari ajratish, ularning muammolarini oʻrganish va manzilli hal etish borasida amaliy ishlar olib borilayotgani, “Ayollar daftari”ga 6ta mezon asosida 3000 dan ortiq xotin-qizlar kiritilib, ularning muammolari hal etilayotgani haqida aytib oʻtdi.

Shu bilan bir qatorda, jamiyatda xotin-qizlarning oʻz oʻrnini topishiga toʻsqinlik qilib kelayotgan muammo va illatlar ham mavjud boʻlib, ularga qarshi kurashish dolzarb hisoblanadi. Ulardan biri xotin-qizlar va bolalarga nisbatan koʻrsatilayotgan tazyiq va zoʻravonlikdir.

Oʻzbekiston Respublikasida xotin-qizlarni tazyiq va zoʻravonlikdan himoya qilish borasida xalqaro normalar talablariga uygʻun qonunchilik asoslarini yaratish va takomillashtirish, qolaversa, zoʻravonlikdan jabr koʻrgan ayollar va bolalar muhofazasi bilan bevosita shugʻullanuvchi davlat va nodavlat tashkilotlarining tashkiliy-huquqiy asoslari kengaytirildi.

Tadbir davomida tuman hokimligining din ishlari boʻyicha bosh mutaxassisi Muzaffar Sherimbetov yoshlar har bir jamiyatning eng ishongan va muhim qatlami hisoblanishini, mamlakatning ertangi kuni ularning qanday shaxs boʻlib shakllanishlari hamda maqsadlariga bogʻliqligini, shu sababdan ularni zararli gʻoyalar va yot fikrlardan himoyalash dolzarb mavzu ekanligini taʼkidlab oʻtdi.

Hozirda yoshlar ongiga taʼsir qilib, ularga oʻz buzgʻunchi gʻoyalarini singdirishni yoki ularni toʻgʻri yoʻldan ozdirishni maqsad qilgan kuchlar tobora ortib bormoqda. Bu holat oddiy kompyuter oʻyinlaridan tortib internet saytlari, ijtimoiy tarmoqlar, mobil aloqa dasturlarida ham koʻzga tashlanadi. Yuzaki qaraganda, arzimas tuyuladigan bu harakatlar vaqt oʻtgani sari jiddiylashib boraveradi.

Aytish kerakki, mamlakatimizda yoshlarni terroristik, ekstremistik va boshqa buzgʻunchi gʻoyalar taʼsiridan himoya qilishga qaratilgan jamiyatda ijtimoiy-maʼnaviy muhitni sogʻlomlashtirish boʻyicha keng koʻlamli chora-tadbirlar amalga oshirilmoqda. Bu borada umumtaʼlim maktablari oʻquvchilari orasida tashkil etilayotgan targʻibot va tushuntirish tadbirlarining ahamiyati katta.

Targʻibot tadbiri davomida oʻquvchilarga sababsiz dars qoldirmasliklari, oʻtilayotgan har bir darsni qunt bilan oʻzlashtirishlari lozimligi, maktabga oʻz vaqtida kelish va ketish zarurligi, shuningdek, har bir oʻquvchi odob-axloq qoidalariga amal qilishlari, har bir daqiqadan unumli foydalanib bilim olishlari lozimligi tushuntirildi.

Yigʻilish soʻngida mavzu yuzasidan ishtirokchilar oʻzlarini qiziqtirgan savollariga javoblar oldilar.

Sevara Ismoilova, Tuman hokimligi Axborot xizmati