MAS-RESTLING SPORT TURI BOʻYIChA 12-SONLI MAKTABDA MAHORAT DARSI BOʻLIB OʻTDI

Soʻnggi yillarda mamlakatimizda jismoniy tarbiya va sportni rivojlantirish, sportga ommaviy jalb qilish orqali yoshlarning salomatligini mustahkamlash, iqtidor va salohiyatini yuzaga chiqarishga doimiy ravishda eʼtibor qaratilib kelinmoqda.

Aholi oʻrtasida ayniqsa, maktab oʻquvchilari oʻrtasida jismoniy tarbiya va ommaviy sportni keng targʻib qilish borasida koʻpgina chora-tadbirlar amalga oshirilmoqda. Mahallalarda, koʻp qavatli uylar atrofida “Salomatlik yoʻlaklari”, maktablarda, mahallalarda sport maydonchalari qurilib, toʻgaraklar faoliyati yoʻlga qoʻyilmoqda.

27-sentyabr kuni tumanimizdagi 12-sonli umumtaʼlim maktabining zamonaviy sport zalida yangidan faoliyatini boshlagan mas-restling toʻgaragi aʼzolari uchun ushbu sport turi ustalari mahorat darsi oʻtkazishdi.

Mahorat darslarida Oʻzbekiston bodibilding, fitness va mas-restling Federatsiyasi bosh kotibi hamda Osiyo mas-restling Federatsiyasi bosh kotibi Farhod Matkarimov, mas-restling sport turi boʻyicha Oʻzbekiston bosh murabbiyi Ilyos Qodirov, ushbu sport turi boʻyicha bir necha bor Oʻzbekiston chempioni, jahon chempionati sovrindorlari, Osiyo chempionati gʻoliblari hamda xalqaro toifadagi sport ustalari, maktab rahbarlari, oʻqituvchilari, oʻquvchilar va ularning ota-onalari ishtirok etdilar.

Tadbirni maktab direktori Mahmud Qutlimuradov ochib berdi.

Oʻzbekiston bodibilding, fitness va mas-restling Federatsiyasi bosh kotibi hamda Osiyo mas-restling Federatsiyasi bosh kotibi Farhod Matkarimov soʻzga chiqib, bugungi kunda mamlakatimizda yoshlarning sport bilan shugʻullanishlari uchun yaratib berilayotgan imkoniyatlar, chekka hududlarda yangidan qad rostlayotgan sport inshootlari va natijada sportning tobora ommalashayotgani haqida aytib oʻtdi.

Mas-restling sport turi boʻyicha bosh murabbiy Ilyos Qodirov soʻzga chiqib, navqiron avlodni jismonan sogʻlom, maʼnan yetuk hamda zamonaviy bilim va kasb-hunar sirlarini puxta oʻzlashtirgan mutaxassislar etib tarbiyalash, taʼlim maskanlarining moddiy-texnik bazasini yanada mustahkamlash Prezidentimiz rahnamoligida taʼlim tizimida amalga oshirilayotgan keng koʻlamli islohotlarning ustuvor yoʻnalishidan biri ekanligini aytib oʻtdi. Ushbu hudud yoshlarining sportga qiziqishlari inobatga olingan holda maktabda oʻz faoliyatini boshlagan mas-restling toʻgaragi aʼzolarining qisqa muddatda oʻyin texnikalarini yaxshi oʻzlashtirganiga alohida eʼtibor qaratildi.

Shundan soʻng toʻgarak aʼzolari uchun sport ustalari mahorat darsini oʻtkazishdi. Mashgʻulotlar davomida har bir ishtirokchi ushbu sport turi boʻyicha koʻproq bilim va malakaga ega boʻlishga harakat qilib, berilgan topshiriqlarni bexato bajarishga intildilar. Yoshlar oʻrtasida mas-restling sport turiga boʻlgan qiziqishlarini orttirish hamda targʻib qilish maqsadida tashkil etilgan mashgʻulotlarda 30 nafar oʻquvchi yoshlar shugʻullanib kelmoqda.

Mahorat darsidan keyin ishtirokchilarning ushbu sport turi boʻyicha kuchlarini va epchilliklarini sinovdan oʻtkazish maqsadida maxsus musobaqa tashkil etildi.

Musobaqada mahalladagi hokim yordamchisi Shahzod Karimov hamda maktab direktori homiyligida gʻolib ishtirokchilar qimmatbaho sovgʻa hamda diplomlar bilan taqdirlandilar.

Tuman hokimligi Axborot xizmati