OVUL YoShLARIGA MASLAKDOSh ONAXON

Keksalikni inson umrining donishmand fasli deyishadi. Turmushning achchiq-chuchugini koʻrgan, yaxshilik va yomonlikni, oq va qorani ajrata oladigan, odillik va toʻgʻrisoʻzlik tarafdori, katta hayotiy tajribaga ega boʻlgan bobojonlar oʻgitlari, buvijonlar pand-nasihatlari bilan yoshlarga oʻz yoʻllarini topishida koʻmaklashadi. Oilalar farishtasi, unda oʻz oʻrniga ega boʻlgan keksalarimiz yosh avlodni barkamol insonlar qilib tarbiyalovchi beminnat tarbiyachilardir. Shu sababdan ham nafaqat, har bir xonadon, balki butun yurtga fayz baxsh etib kelayotgan piru-badavlat otaxon va onaxonlar elimizda doim eʼzoz va ehtiromda.

Amudaryo tumanidagi ommaviy axborot vositalaridan biri boʻlgan amunews.uz veb-sayti tahririyatining Oliy Majlis huzuridagi jamoat fondi tomonidan moliyalashtirilgan “Sogʻlom muhit – sogʻlom hayot” grant loyihasi ish rejasiga koʻra ana shunday elda qadrli, yoshlar tarbiyasiga munosib hissa qoʻshib kelayotgan keksalarni ibrat qilib koʻrsatish maqsadida Toʻlqin ovuliga tashrif buyurdik.

Ovulda yurt fayziga aylangan, jamiyat hayotida faol ishtirok etib, yoshlarga toʻgʻri yoʻl koʻrsatib kelayotgan nuroniylar koʻpchilikni tashkil qilar ekan. Fuqarolar yigʻini masʼullari doim ovulning piru-badavlatlari bilan bamaslahat holda ish olib borishgani tufayli hududda tinchlik-osoyishtalik hukmron. Oilalarda oʻzaro kelishmovchilik, ajrim, yoshlar oʻrtasidagi huquqbuzarlik holatlarining oldini olish boʻyicha chora-tadbirlar ham hamkorlikda amalga oshirilgani sababli samarali natijalarga erishilmoqda.

40-yildan ziyod davr mobaynida taʼlim sohasida fidokorona mehnat qilib, yosh avlod taʼlim-tarbiyasiga oʻz hissasini qoʻshgan, ayni paytda keksalik gashtini surayotgan onaxon Hanifa Yaxshimova ham oʻzi nafaqada boʻlishiga qaramasdan, bu boradagi ishlarda fuqarolar yigʻini masʼullariga yaqin maslakdosh boʻlib kelmoqda. U “Bir nuroniy oʻn yoshga masʼul” tamoyiliga koʻra hududdagi yoshlar tarbiyasiga masʼul qilib biriktirilgan. Onaxon yoshlarni milliyligimizni saqlagan holda kiyinish madaniyati, yurish-turish, odob-axloqqa oʻrgatish, oʻqish, hunar oʻrganishiga qiziqishlarini oshirish, jamiyatimizga, qolaversa oilasiga namunali farzandlar boʻlib tarbiyalanishiga oʻz hissasini qoʻshib kelmoqda.

Toʻlqin ovulida tugʻilib voyaga yetgan Hanifa Yaxshimova oilada opalari kabi oʻqituvchilik kasbiga qiziqdi va QDUning biologiya fakultetini tugatib, ovuldagi 33-sonli maktabda ish boshladi. U shu maktab direktori boʻlgan Jongil Ernazarova xonadoniga kelin boʻlib tushdi. Yosh avlodga taʼlim-tarbiya berish bilan birga oilada turmush oʻrtogʻi Baxtiyor Jumabekov bilan 4 nafar farzandni ham oʻqimishli, tarbiyali insonlar qilib voyaga yetkazdi. Hozir nevaralar qurshovida nafaqa gashtini surayotgan onaxonning boy hayotiy tajribasidan ovuldagi muammoli yoshlarni tugri yulga solishda unumli foydalanilmoqda.

Onaxon yoshlar yetakchisi Fozilbek Qurbonboyev bilan birgalikda oʻziga biriktirilgan yoshlar bilan muntazam suhbatlashib, ularning jamiyat uchun foydali insonlar boʻlib yetishishlariga koʻmaklashmoqda. Hududdagi tarbiyasi ogʻir, maktabda mashgʻulotlarga oʻz vaqtida kelmasdan koʻp dars qoldiradigan yoshlarning oʻzlari va ota-onalari bilan suhbatlar oʻtkazilib, sport toʻgaraklariga jalb etildi. Hozirda ular “Besh tashabbus olimpiadasi” musobaqalarining hududiy va tuman bosqichlarida faol qatnashib, faxrli oʻrinlarni egallab kelishmoqda.

Turli oilaviy muammolar girdobida qolgan shu qishloqlik yana bir yosh voyaga yetmasdan turib oʻgʻirlikka qoʻl urgani sababli muntazam nazoratda edi. Unga ham oʻz vaqtida oʻgit-nasihatlar berilib, toʻgʻri yoʻl koʻrsatildi va sport toʻgaraklariga jalb etildi. Ovuldagi oilalardan birida yashovchi yana bir qiz hayotida ham u bilan xonadoniga borib oʻtkazilgan suhbatlar, berilgan nasihatlar muhim ahamiyat kasb etdi. U tikuvchilik hunariga qiziqishini bildirgani sababli, ovuldagi chevarlarga biriktirildi va boʻsh vaqtlarida ushbu hunarni oʻrganishni boshladi.

Shuningdek, muntazam ravishda dars qoldiradigan, boʻsh vaqtlarini bekor oʻtkazadigan ovuldagi yana koʻplab yoshlar roʻyxat qilinib, shu boʻyicha barchasi bilan suhbatlashildi va sport toʻgaraklari, hunar oʻrganish kabilarga jalb etildi.

Ovuldagi nuroniylar ishtirokida yoshlar bilan davra suhbatlari, uchrashuvlar, tumanimizdagi muzey va Chilpiq qalʼasiga sayohatlar tashkil etilib borilmoqda. Boʻsh vaqtlari mazmunli tashkil etilayotgan yoshlarning dunyoqarashi kengayib, kasb-hunarga, bilim olishga yanada qiziqishlari ortmoqda, qalblaridagi yurt taqdiriga daxldorlik hislari mustahkamlanmoqda.

Keksalar bor uyda tinchlik-xotirjamlik, dasturxonlarda fayzu-baraka, qilinayotgan ishlarda rivoj va samara boʻladi. Nuroniylik yoshiga yetganida ham tinib-tinchimasdan oʻzlarining ezgu duolari, dono oʻgitlari, boy tajribalari bilan hayot yoʻllarida yoshlarga qanot va sabot bagʻishlab kelayotgan Hanifa Yaxshimova kabi onaxonlar, piru-badavlat otaxonlar xonadonlarimiz, hayotimizning fayzi va farishtalari doim omon boʻlishsin. Zero, yurtimizdagi tinchlik-osoyishtalik, biz erishayotgan yutuq va muvaffaqiyatlar, turmushimizdagi farovonlik shu nuroniylarimizning ezgu tilaklari, duolari ijobatidir.

Ozoda Xudoyberganova.