Tuman boʻyicha jami 1777 gektar maydonga piyoz, sarimsoqpiyoz kabi ekinlar toʻqsonbosti usulida ekiladi

Shu kunlarda tumanimizga yoʻlingiz tushsa, dala maydonlaridagi qizgʻin ish jarayonlarining ustidan chiqasiz. Qaysi manzilga boqmang, keyingi yil hosili uchun ekin ekayotgan, joriy yildagi hosilni esa yigʻishtirib olayotgan mirishkor-dehqonlarga koʻzingiz tushadi. Ular shu kunlarda asosiy va takroriy ekinlar hosilini yigʻib-terib olish barobarida toʻqsonbosti usulida ekinlar ekishga ham taraddud koʻrmoqdalar.

Tumanimiz aholisining ertaki sabzavot mahsulotlariga boʻlgan talabini toʻliq qondirish maqsadida hosildan boʻshagan maydonlarga sovuqqa chidamli piyoz va sarimsoqpiyoz kabi ekinlarni toʻqsonbosti usulida ekish ishlari boshlanmoqda.

Buning uchun kuzda asosiy ekinlardan boʻshagan maydonlarni sifatli haydab, sovuqqa chidamli ekinlarni oʻz vaqtida ekish muhim masala sanaladi. Bu oʻz navbatida ekin maydonlari va aholi tomorqalaridan samarali foydalanish, eksportbop qishloq xoʻjaligi mahsulotlari yetishtirish va eksport qilish hajmlarini koʻpaytirish, kambagʻallikni qisqartirish hamda aholining moddiy manfaatdorligini oshirishda muhim vositalardan biridir.

6-oktyabr kuni Choykoʻl ovulida faoliyat yurituvchi “Arslon Maqsudov” fermer xoʻjaligida oʻtkazilgan koʻrgazmali seminarda toʻqsonbosti usulida sabzavot ekinlarini ekish hamda shu usulda ekilgan ekinlarni parvarishlashning muhim jihatlari xususida seminar boʻlib oʻtdi.

Seminarda Oʻzbekiston Respublikasi Qishloq xoʻjaligi vazirligining Departament boshligʻi Komiljon Sobirov, Oʻzbekiston Respublikasi Qishloq xoʻjaligida xizmatlar koʻrsatish agentligi rahbari Husniddin Karimov, mazkur agentlikning Qoraqalpogʻiston Respublikasi boʻlimi rahbari Holdor Achilov, Qoraqalpogʻiston Respublikasi Vazirlar Kengashi Raisining oʻrinbosari Daryabay Qaypov, tuman hokimi Sobir Xoʻjametov, sektorlar rahbarlari, ovul hamda mahalla fuqarolar yigʻinlari raislari qatnashdilar.

Seminarda 2024-yil hosili uchun fermer va dehqon xoʻjaliklarida joriy yilda piyoz va sarimsoqpiyoz ekinlarini ekish parametrlari, muddatlari va bu boradagi ustuvor vazifalar haqida tushunchalar berildi.

Shuningdek, mutaxassislar tomonidan ekin maydonlaridan samarali va unumli foydalanish, urugʻlik va mineral oʻgʻitlarni tanlash hamda ishlatish, ularning xususiyatlarini bilish, ekish muddatlarini aniqlash kabi masalalar boʻyicha maʼlumotlar berildi.

Seminarda soʻzga chiqqan mutaxassislar va soha ilgʻorlari sovuqqa chidamli boʻlgan piyoz, sarimsoqpiyoz kabi ekinlarni toʻqsonbosti usulida yetishtirish orqali ulardan yaxshigina daromad olish mumkinligi haqida aytib oʻtdilar.

Aytish joizki, keyingi yillarda respublikada tumanlarning ixtisoslashuvini, mintaqalarning tuproq-iqlim sharoitlari va suv bilan taʼminlanganligini hamda boshqa omillarni eʼtiborga olgan holda qishloq xoʻjaligi ekinlarini oqilona joylashtirishga alohida eʼtibor berib kelinmoqda. Shundan kelib chiqqan holda bu yil tuman boʻyicha jami 1777 gektar maydonga piyoz, sarimsoqpiyoz kabi ekinlarni toʻqsonbosti usulida ekish rejalashtirilgan.

Seminarda ishtirokchilarga ekinlarni toʻqsonbosti usulida ekish va parvarishlash boʻyicha zarur tavsiyalar va tushuntirishlar berildi. Shuningdek, bu boʻyicha amalga oshirilishi lozim boʻlgan agrotexnik tadbirlar haqida soʻz yuritildi.

Tuman hokimligi Axborot xizmati