TENGDOShLAR XORIJIY TILLARNI OʻRGANISh BORASIDA SUHBATLAShDI

Til bilgan – el biladi, deydi xalqimiz. Chindan-da xorijiy tillarni bilish kishiga koʻp imkoniyatlar yaratadi. Shuning uchun bugungi kunda yurtimizda kadrlar zimmasiga qoʻyiladigan asosiy talablardan biri chet tillarni mukammal bilishdir.

Shu boisdan ham mamlakatimizda xorijiy tillarni yosh avlodga oʻrgatishga ulkan eʼtibor qaratilmoqda. Natijada yoshlarga bu borada yetarli sharoitlar yaratildi, oʻquv dasturlari va darsliklar zamon talablariga javob beradigan darajada mukammallashtirildi, taʼlim tizimining barcha bosqichlarida chet tillarni uzluksiz oʻqitish yoʻlga qoʻyildi. Shuningdek, oʻqituvchilar malakasini oshirishga, ularning orasida oʻz ustida ishlaydigan, taʼlim berishda yutuqlarga erishayotganlarini ragʻbatlantirib borish tizimi yoʻlga qoʻyildi. Taʼlim sohasida izchil islohotlar olib borilayotgani tufayli chet tilini mukammal biladigan oʻquvchilar, pedagoglarga imtiyozlar, malaka sertifikatlari berilib, muntazam ragʻbatlantirib borilayotir.

Amudaryo tumanida bu borada olib borilayotgan saʼy-harakatlar tufayli oʻquvchilar orasida xorijiy tillarni oʻrganishga qiziqish tobora ortib borayotir.

7-oktyabr kuni tumanning Amir Temur nomli ovulida joylashgan 4-sonli maktabda oʻquvchilarning ingliz tilini oʻrganishga qiziqishlarini yanada oshirish maqsadida “Biz ­– kelajak egalarimiz” deb nomlangan davra suhbati oʻtkazildi. Tadbir oʻzbek va ingliz tillarida boʻlib oʻtdi. Unda 40-sonli maktabning ingliz tilini puxta oʻzlashtirgan va asosiy fanlar olimpiadalarida muvaffaqiyatli ishtirok etgan bir guruh oʻquvchilari, ingliz tili fani oʻqituvchisi Madina Jumaniyozova, mazkur maktab oʻqituvchilari, oʻquvchilari ishtirok etdilar.

Tadbirni 4-sonli maktabning ona tili va adabiyoti fani oʻqituvchisi Gavhar Sobirova ochdi va oʻzaro doʻstlik aloqalarini bogʻlash, taʼlim olishda erishayotgan yutuqlari haqida suhbatlashish va tengqurlarini ham ingliz tilini chuqur oʻrganishga daʼvat etish maqsadida tashrif buyurgan oʻquvchilarga, ularning ustoziga va davra suhbati tashkilotchisi, mazkur maktab ingliz tili fani oʻqituvchisi Barchinoy Sobirovaga minnatdorchilik bildirdi.

Tadbirda ikkala maktab oʻquvchilari davra suhbati mavzusi yuzasidan ingliz tilida oʻzaro muloqotga kirishdilar. Albatta, bugungi tezkor zamonamizga mos kadrlar boʻlib yetishish, yurtimiz ravnaqiga hissa qoʻshish uchun xorijiy tillarni oʻrganish juda muhim. Bu borada ingliz tilini bilish darajasi boʻyicha sertifikat olishga erishgan 40-sonli maktab oʻquvchilari Laylo Kamolova, Gulnoza Ilhomova, Feruza Hayitjonova, Iroda Norboyeva, Hilola Saʼdullayeva, Zarina Xoʻjaberganovalar oʻzlarining ingliz tili oʻrganishdagi ustozlarining fidoyiliklari, ota-onalarining qoʻllab-quvvatlaganliklari haqida, ilm olishda mashaqqatlardan choʻchimaslik lozimligi haqida ingliz tilida gapirib berdilar va tengdoshlarini ham ushbu tilni chuqur oʻrganishga daʼvat etdilar.

Madina Jumaniyozovaning kasbiy faoliyatiga doir, shogirdlarining erishayotgan yutuqlariga doir suhbatini oʻquvchilar ham, oʻqituvchilar ham qiziqib tingladilar. Taniqli oʻqituvchi oʻquvchilarni qiziqtirgan savollarga ham batafsil javoblar qaytardi.

Davra suhbati barcha ishtirokchilar uchun esda qolarli voqea boʻldi.

Oygul RAJABOVA