Maktab oʻquvchilari oʻrtasida «Besh tashabbus olimpiadasi» sport musobaqalari oʻtkazildi

Davlatimiz rahbarining 2022-yil 11-apreldagi “Mahallalarda yoshlarni ommaviy sportga jalb qilishni yangi bosqichga olib chiqish chora-tadbirlari toʻgʻrisida”gi qarorida belgilab berilgan vazifalarning ijrosini taʼminlash maqsadida oʻtgan yili mamlakatimiz boʻylab “Besh tashabbus olimpiadasi” sport musobaqalari oʻtkazila boshlangan edi.

Musobaqalarning oʻtgan yilgi mavsumiy bosqichlarida minglab yoshlar ishtirok etib, bor mahorat va iqtidorlarini namoyish etgan edilar. Mahallalardagi yoshlarning boʻsh vaqtini mazmunli tashkil etish va ularning madaniyat, sanʼat, sport, kitobxonlik, IT yoʻnalishlari boʻyicha iqtidorlarini kashf etish hamda qoʻllab-quvvatlash asosiy maqsad qilingan “Besh tashabbus olimpiadasi” bellashuvlari tobora yoshlarni kengroq jalb etib, nufuzi oshmoqda.

9-oktyabr kuni “Besh tashabbus olimpiadasi” doirasida Maktabgacha va maktab taʼlimi vazirligi tizimidagi taʼlim muassasalari oʻquvchilari oʻrtasida Amudaryo tumanida sportning shashka, yengil atletika, voleybol, stol tennisi, futbol turlari boʻyicha musobaqalar va “Quvnoq startlar” oʻyinlarining tuman bosqichi boʻlib oʻtdi.

Musobaqaga tumandagi mavjud 85ta maktabning sportchi oʻquvchilari qamrab olindi. Bellashuvlarda ishtirok etgan yoshlarning iqtidori hakamlar tomonidan odilona baholab borildi. Musobaqa natijalariga koʻra, “Quvnoq startlar” musobaqasida 1-4-sinf oʻquvchilari oʻrtasida 76-maktab oʻquvchilari birinchi oʻrinni, 51-sonli maktab oʻquvchilari ikkinchi oʻrinni, 28-maktab oʻquvchilari uchinchi oʻrinni egalladilar.

Yengil atletika boʻyicha 8-9-sinf oʻquvchilari oʻrtasidagi bellashuvlarda qiz bolalar oʻrtasida 19-sonli maktab oʻquvchisi Mahliyo Toʻliboyeva birinchi oʻrinni, 73-sonli maktab oʻquvchisi Hilola Shomurodova ikkinchi oʻrinni, 45-sonli maktab oʻquvchisi Gulshoda Qurbonboyeva uchinchi oʻrinni qoʻlga kiritdi. Shuningdek oʻgʻil bolalar oʻrtasida 56-sonli maktab oʻquvchisi Shohrux Rahimov birinchi oʻrinni, 73-sonli maktab oʻquvchisi Adham Oʻrozboyev ikkinchi oʻrinni, 83-sonli maktab oʻquvchisi Sardorbek Sobirov uchinchi oʻrinni egalladilar.

Sportning shashka turi boʻyicha 5-11-sinf oʻquvchilari oʻrtasida kechgan bellashuvlarda qiz bolalar oʻrtasida 15-sonli maktab oʻquvchisi Munisa Nurimbetova, oʻgʻil bolalar oʻrtasida esa 12-sonli maktab oʻquvchisi Bekzod Rahimboyevlar birinchi oʻrinni qoʻlga kiritdi.

Musobaqa natijalariga koʻra, gʻolib deb topilgan yoshlar respublika bosqichiga yoʻllanmani qoʻlga kiritishdi. Ular “Besh tashabbus olimpiadasi” sport musobaqalarining keyingi bosqichlarida ham tumanimiz sport sharafini munosib himoya qiladilar, deb umid qilamiz.

Aytish joizki, amudaryolik yoshlar mamlakat boʻylab oʻtkazib kelinayotgan “Besh tashabbus olimpiadasi” musobaqalarining avvalgi mavsumlarida ham munosib ishtirok etib kelishgan edi. Mazkur musobaqalar tuman yoshlarining intilishlarini, qiziqishlarini, salohiyatini yuzaga chiqarishda muhim maydon boʻlib xizmat qilmoqda.

Tuman hokimligi Axborot xizmati