STRATEGIYa HAR BIR INSONGA SALOHIYaTINI ROʻYoBGA ChIQARIShIDA MUNOSIB ShAROITLAR YaRATADI

Davlatimiz rahbarining maxsus Farmoni bilan Yangi Oʻzbekiston taraqqiyot strategiyasini amalga oshirish jarayonida orttirilgan tajriba va jamoatchilik muhokamasi natijalari asosida ishlab chiqilgan “Oʻzbekiston – 2030” strategiyasi tasdiqlandi. Mazkur strategiyadan koʻzlangan asosiy maqsad – islohotlar samaradorligini oshirish, davlat va jamiyatning jadal rivojlanishi uchun zarur shart-sharoitlar yaratish, aholi farovonligiga erishishdir.

Ushbu strategiyada barqaror iqtisodiy oʻsish orqali daromadi oʻrtachadan yuqori boʻlgan davlatlar qatoridan oʻrin olish, aholi talablariga va xalqaro standartlarga toʻliq javob beradigan taʼlim, tibbiyot va ijtimoiy himoya tizimini tashkil qilish, aholi uchun qulay ekologik sharoitlarni yaratish, xalq xizmatidagi adolatli va zamonaviy davlatni barpo etish, mamlakatning suvereniteti va xavfsizligini kafolatli taʼminlash kabilar koʻzda tutilgan. Unda har bir insonga oʻz salohiyatini roʻyobga chiqarishi uchun munosib sharoitlar yaratishga qaratilgan 44 ta maqsad, yaʼni 1-maqsaddan – 44-maqsadgacha ushbu ustuvor yoʻnalish tarkibiga kiradi. Bunda taʼlim, tibbiyot, ijtimoiy himoya, yoshlar siyosati, maʼnaviyat masalalariga taalluqli 156 ta amaliy chora-tadbir va 70 ta vazifa qamrab olingan boʻlib, 130 ta maqsadli koʻrsatkichni ishlab chiqish belgilangan. Shuningdek, 38 ta normativ-huquqiy hujjat loyihalarini tayyorlash va qabul qilish koʻzda tutilgan.

Strategiya doirasida ilm-fan va innovatsiyalar sohasi, ijtimoiy xizmatlar koʻrsatish, yoshlarga oid davlat siyosati va sportni ommalashtirish, maʼnaviy taraqqiyotni taʼminlash va madaniyat sohasini yangi bosqichga olib chiqish boʻyicha amalga oshiriladigan barcha islohotlarda inson, insonning qadri, huquqlari, erkinliklari va qonuniy manfatlari ustuvor ahamiyat kasb etadi. “Oʻzbekiston – 2030” strategiyasida belgilangan maqsad-vazifalar BMTning Barqaror rivojlanish maqsadlarini amalga oshirish uchun oʻziga xos “yoʻl xaritasi” vazifasini oʻtaydi.

Mazkur Strategiyani amalga oshirish va uning maqsadli koʻrsatkichlariga erishish barcha davlat organlari va tashkilotlarning eng ustuvor vazifasidir.

S. Davletmuradov, Qoraqalpogʻiston Respublikasi sudi sudyasi.